E toe fa’atalofa atu i le aufaitau i le fa’aiuga o lenei vaiaso, ae alo mai loa i le toe sosooina o le tatou tala fa’asolo, lea na gata mai i le vaiaso na te’a nei i le taimi lea na vaaia ai e Kati le tau fai fenegoa’i solo o tagata i totonu o le fale kalapu, e foliga mai e i ai se mea o le a tupu ia te ia.

E lei toe fa’atali Kati ina ua ia vaaia le gaioiga ia, ae ua tago atu nei i lana ato ta’ita’i lea e i ai lana masini computer faapea ai ma le isi ato o lo o teu ai ana fana fa’apitoa atoa ai ma pulu, ua uu mai ma savali agai atu loa i le isi tulimanu o le fale ina ia lilo atu ai o ia i le vaai a tagata nei, ao ia taumafai pea e vili le telefoni a lana paga lea ua alu i totonu o le potu, e logo i ai le vaaiga lea ua ia maitauina i totonu o le fale kalapu o lo o tafao ai. Ina ua fiu Kati e fa’afeso’ota’i lana paga o lo o i totonu o le fale talimalo, na ia manatu ai loa ua tatau ona fai se isi ana gaioiga ina ne’i tuai ae televave gaioiga a le au fa’atupu fa’alavelave, o lea na faanatinati atu ai loa le ali’i i le vaega o lo o paka ai ta’avale, ua oso i lana ta’avale ma aga’i ese atu loa ma le nofoaga lea ae aga’i atu i le isi fale talimalo, o iina lea na toe sui atoa ai teuga a le tama, paka ai ma lana ta’avale ae oso i le taxi ma toe fo’i atu loa i le fale kalapu lea na tafao muamua ai.

Na te’i le tama ina ua taunu’u atu i luma o le faitoto’a o le fale kalapu o lo o tutu mai ai ni alii leoleo po se to’alua e siaki ato a tagata e ulufale i totonu, ae lei i ai ni tagata fa’apea i le taimi na tafao ai. Na ona uma lava ona kilia o Kati savali sa’o atu loa i luga o le laulau ma saofa’i ai, ae oka lana ipu kofe, ona toe faaauau lea o le faitauina o lana nusipepa, ma taumafai e fa’afeso’ota’i lana paga na la to’alua, ae na matua te’i le tama ina ua fetaui lava le ea atu i luga ae ona vaaia loa lana paga ua toe savali mai i totonu o le fale kalapu, ae ua faigata la ona ia iloaina teuga fou a Kati lea ua fai nei, o le mafua’aga fo’i lena la te lei talanoa ai, ae ua nofo mamao mai i le isi laulau. Na aapa Kati i lana telefoni ma text lana faatonuga i le tama’ita’i e fa’ailoa i ai o ia ma ona teuga ua faia, ae sili pe a toe fo’i i totonu o le potu, e i ai  le vaega leaga lea o lo o feofeoa’i solo i totonu o le fale kalapu ma le fale talimalo e tatau ona mata’ala i ai.

Na te’i Kati ina ua ia vaaia le ave taxi lea na momolia atua o ia i le fale kalapu o lo o tu mai luma o le faitoto’a, o lo o talanoa i alii leoleo po e to’alua o lo o tiute ai, e lei umi ae vaaia ua tusi lona lima ma fa’asino aga’i atu i le vaega tonu o lo o saofa’i atu ai, ona manatu lea o Kati, pei uma lava o ia lea ua o lo o tau saili e le ave taxi, e le iloa po o sana meatotino na galo i totonu o le taxi, ia po o se isi lava fo’i mafua’aga tatau, ae na matua fa’ateia le tama ina ua ia vaaia le tuu e le isi leoleo po se fana i le ave taxi, ona tu loa lea i luga o le Kati ma savali telea’i aga’i i le la potu ma lana paga, ae ta’atia ai pea le tamaitai i le vaega lea o lo o tafao ai i totonu o le fale kalapu, peita’i na tuai le savali a Kati ae vave ona iloa mai e le alii ave taxi.