Ads by Google Ads by Google

Tumau le poloaiga e taofia ai le Poloketi taligalu


[ata: foa'i]

Pago Pago - AMERIKA SAMOA

Na ta'u sao lava e le Susuga i le Ta’ita’i Itu (District Commander) Lt. Col. Christopher R. Pevey, i le Senate, e le o iai se taimi mautinoa po o afea e aveese ai le taofiga o le Poloketi o taligalu, ae na ia folafola e toe foi ane se tali, o le mataupu lena.

O Lt. Col. Pevey, e faamautu i Honolulu ma o lo o avea nei o ia ma ‘District Commander’ o le U.S Army Corps of Engineers (USACE).

Sa ia tali atu ai i le taitaifono o le Komiti, afioga i le Senatoa, Satele Lili’o Aliita’i, ina fia malamalama le afioga Satele, po o afea e aveese ai le taofiga  a le USACE i le poloketi o taligalu, ma le poloaiga o taofia ai poloketi o alavai.
E le'i faailoaina e Satele  le poloketi o le taligalu ma ala vai, peita'i sa ia ta'u I le vaega le USACE, e iai galuega ua uma ona faatino.
Na tali atu iai Pevey, "e faigata ona avatu se taimi" ma ia otooto atu le faagasologa masani o le faatanaga ma le taimi e fai ai se faaiuga o le pemita. "Ae o le tali sao lava i lau fesili i le taimi nei - e fua lava i luga o le mataupu le fofo mo le poloaiga e taofi ma le leai ose poloaiga”.
 Na ta'ua e Pevey, e tutusa lava le fesili a le Taitaifono ma lana fesili na fai i lana vaega i Honolulu a'o lei malaga mai iinei, ae leai se tali mo le taimi nei.
 "Peita'i o le a avatu le tali po o le a le umi e faatali ai. Ma ou te manatu e le tatau ona umi fua se taimi, ae o le 'a logo atu lava le taimi tonu”.
I le maitau a le Samoa News na taumafai atu lava Satele mo le taimi e aveese ai le poloaiga o le taofiga, e tau lava i le faaiuga o le faatalanoaga.
Pei ona lipotia talu ai nei e le Samoa News, na avatu e le USACE se Tusi Sala (Notice of Violation) faasaga i le ASG, ona o ni gaioiga e le'i faatagaina i gatai o Tula, ma masalomia ai ni gaioiga na faatino e le Paramount Builders Inc. i le vaitafe ua ta’ua o Amaile, i Nu’uuli — o na poloketi e lua, e leai ni pemita mai le malo feterale .
I le amataga o le faatalanoaga lea e tasi le itula,  na faamatala e Satele i le vaega a le USACE o le auga o le faatalanoaga, "e le gata ia maua ai se malamalamaaga o le manaoga e tatau ona faamalie, e toe faaauau ai mo se taimi vave le galuega o taligalu, ae e taua tele foi, le silafia o auala e le toe tupu ai le faatuai i le galuega lea ma isi poloketi”.  
Na ia ta'ua foi, "Ua tafia o tatou matafaga, ae o le fesoasoani mo le taimi lenei ma le agai atu i le lumana'i, o le a talia ma le agaga faafetai. O le 2022 na molimauina ai aafiaga i o tatou matafaga, ma e le o toe iai se taimi" e faatali ai.
O le faamoemoega o le afioga a Satele, e mata'ituina e le vaega lea ma fesoasoani i le teritori, e le gata ina ia puipuia ai o le siosiomaga, ae ia faamautinoa foi le saogalemu ma le soifua lelei o tagata.
Na ta'ua e Pevey, i le taimi o le aufaigaluega inei, sa tilotilo ai foi i nisi o poloketi i le teritori.  "O le tatou faapaaga ua faia nei, o lo o matou taufai ai e fuafua pe faapefea ona fesoasoani e faaititia popolega o loo iai”.
Na ia ta'ua fo'i o lesi aoga o le malaga mai, "ina ia iloa nisi popolega o le poloketi, ma pe faapefea ona fesoasoani ."
Pei ose faataitaiga, ua uma ona feiloai le latou vaega ma tagata faigaluega, e aofia ai le feiloaiga ma le Sui Kovana ma lana aufaigaluega , faapena foi ona feiloai atu i le Kovana i le vaiaso talu ai, i Honolulu.
"Peita'i o fea e mafai ai ona aumai le fesoasoani faapitoa i luga o le laulau ma faamatala atu, pe afai o loo iai isi poloketi o ave iai le faataua o loo faagasolo i le taimi nei?"
Na ia faailoa atu foi, "Ou te leiloa nei faaletonu, o lea faato'a iloa atu ina ua oo mai iinei.  Ma, o le a toe foi e vaili faaletonu – Ou te le o iloa pe maua uma tali i atugaluga" pei ona laga e le Senate ananafi. (Na te lei faailoaina atugaluga na faatatau iai lana tala.)
"Peita'i o le 'a mata'ituina po o fea o iai na vaega i le faasologa," ae na ia ta'ua ma ia faamauina, e iai le faasologa o le faiga o galuega i lalo o aiaiga a le EPA , ma "o le a matou tilotilo I se auala e amata faagaioi ai.  Peita'i , e tatau ona iai se faamatalaga lelei, i le gasologa o iai nei," ma ia ta'u i Senatoa le tiute o le USACE ma le galulue ai ma isi lala o le malo feterale, e aofia ai i taimi o aafiaga i faalavelave faafuase'i.
O le vaega lea, a'o lei toe foi atu i Honolulu sa o latou o’o atu e vaai poloketi i le itu atu i Sasa'e o Tutuila.

FAAMATALAGA I TUA ATU
O fesili na agia i le fonotaga a le maota ma  le Faatonu o Galuega Lautele (Public Works), Faleosina Voight,  ina ua avatu  e le U.S. Army Corps of Engineers le "Notice of Violation" i le malo o Amerika Samoa. Ona o ni gaioiga e le'i faatagaina , e aofia ai le faaotaota i sami o le Iunaite Setete ma le faatino o galuega e le fatagaina i le gataifale po o le aloalo o le nuu o Tula.
I le taimi nei, ua faapea mai le malo Amerika Samoa, o lo o iai se tulaga o faalavelave faafuase'i i poloketi na. Ma e le mafai ona faatali i le pemita mai le malo feterale, aua o lo o faatino, o lo o faaauau foi i vai o le Iunite Setete (WOTUS), ma e i lalo o le Corps Jurisdiction, pei ona ta'ua e Linda Speerstra, Pule o le US Corps Regulatory Office.
 I le tusi atu a Speerstra ia Voigt, na ta'u atu, o Sami o le Pasefika e folau ai ona tagata ma o sami o le Iunaite Setete (WOTUS)  e i lalo o le puleaga a le U.S.Army Corps.
Ae na saunoa le afioga Kovana Lemanu P. S. Mauga, e oo lava I le tama'i motu teritori, e le faatuaoia lava i aafiaga o suiga o le tau.
O le faataua a le malo, ia faaauau ai ona fai galuega e puipuia ai o tatou tagata, ma faasao laufanua ua tafia ona o se siitia o le suasami.
O le a lipotia atu lava e le Samoa News i ana lomiga i le lumana'i isi matapu e faatalanoaina.