Na faia se tula’i fa’aaloalo a le maota maualuga a le Senate i le taeao ananafi, e aloaia ai le soifua galue o le latou uso a Senatoa, le afioga i le Maopu ia Saole Mila na tu’umalo i le vaiaso na te’a nei i le aai o Seattle i Amerika.

O le afioga i le Peresetee o le Senate ia Gaoteote Palaie Tofau na valaauina le maota mo le tula’i fa’aaloalo, ao lumana’i ai le sauniga lotu e tatala aloaia ai galuega a le maota, i le mae’a ai o sana malologa mo le 2 ma le afa vaiaso na tuana’i atu nei.

E to’a 11 afioga i senatoa sa auai i le tauaofiaga ananafi, o i latou uma fo’i ia na vaaia le tutula’i e fa’ailoa ai lo latou fa’aaloalo i le afioga a Saole ua tuua le malo, ae i le mae’a ai o le viiga o le Atua, na saunia ai loa e le afioga i le ali’i Senatoa ia Matautia Afonotele le talosaga, e manatua ai le malaga a le afioga i le ali’i Senatoa.

Saunoa Gaoteote e fa’apea, e le faigofie lenei taimi i le maota ona o le motusia ai o le mafutaga ma lo latou uso a Senatoa, o le sa latou galulue fa’atasi ma fai fai mea fa’atasi i le tele o taimi.

Na taofi mo ni nai sekone le saunoaga a le ali’i peresetene ona ia toe saunoa lea e fa’apea, “O le taua o le valaau a le Atua ia Saole, e fai ma lesona mo tatou uma o loo soifua ma ola i lenei taimi, e lelei le valaau mai o le Matai ae o loo tatou galulue pea e tautua le atunuu e pei ona valaauina i ai tatou.”

I le mae’a ai o le tauaofiaga a le Senate ananafi, na sosoo ai loa ma se latou fonotaga faapitoa sa talosagaina e le alii peresetene.

E tusa ai ma se molimau mai le aiga o le afioga i le ali’i senatoa ua tuumalo, o Saole ma lona faletua na malaga i asiasi i aiga ma fanau i Amerika, ae tula’i mai ai se gasegase sa maliu ai Saole.

Ua fa’amaonia mai fo’i e le aiga, o le afioga a Saole o le a lagomau lava i Seatte i le aai o loo i ai le to’atele o lona aiga ma fanau.

O se tasi o mataupu sa pulunaunau ai lava le ali’i senatoa ao ia nofoia le nofoa, o le talosaga lea i le Ofisa o Aoga mo se pasi e fela’ua’i ai fanau aoga i le motu o Aunu’u i le taimi nei.

Na saunoa Saole i se tasi o iloiloga sa faia a le komiti o Aoga a le Senate ma sui o le Ofisa o Aoga, o le tulaga lea ua i ai, ua amata ona fa’atau e matua o fanau aoga i Aunu’u uila vilivae e o ai fanau i le aoga, ona o le leai o se pasi aoga.

O le a manatua pea lenei ta’ita’i e le galo.