Ads by Google Ads by Google

Toe taliu mai i fanua usugafono LMS i Aukilani NZ

I le amataga o le 2016 na usuia ai le fonotele a le LMS “Lonetona Misionare Sosaiete” o i latou na afua mai olaga tautua o latou tua’a ma i latou fo’i i le ekalesia tele na soloa’i mai ai le Ekalesia Fa’apotopotoga Kerisiano i Amerika Samoa, lea ua suia i ai le igoa i lenei vaitau o tatou galulue ai. Ua fa’ailoa mai, “O i latou na amata tapena olaga talavou e le vasega o le aufaigaluega sa ulufale mai a’o fa’ailo le Ekalesia Aoao o le LMS.”

 

Ua toe taliu mai i fanua le aumalaga peita’i, o le fonotaga sa fa’atautaia mai ia Ianuari 26 se’ia pa’ia Ianuari 29.

 

Na talia i latou e le LMS i Aukilani, peita’i, e i ai fo’i sui totino ma le sosaiete a le LMS i Ueligitone, Niu Sila. I Samoa Tuto’atasi ua i ai le LMS i Salafai, lea e fa’alagi o le ulua’i LMS lea, aua sa to’ai taunu’u le Talalelei i Sapapali’i Savaii. O le lala lea sa talimalo i le tausaga ua te’a, Ianuari 2015.

 

I le fonotaga lenei ua i ai lava mataupu sa lautogia e talanoaina, peita’i, o na mea e taoto lava i le sosaiete ma lona fa’avae ma le silafia patino a ona totino ae matele lava i mea e fa’aleleia atili le mafutaga, ma ia feso’ota’i atili loto ina ia fiafia e tautua ma auauna i le Atua e ala i mafutaga fa’amalosi’au i agaga ma galuega lelei e ao ina faia.

 

O fonotaga i tausaga ta’itasi e palotaina ai tofiga e tutula’i mo le isi tausaga fou. Peita’i i le fonotaga lenei, ua toe pasia ai sui sa tutula’i mai e fa’aauau le nofoa’iga.  A’o tofiga mo le tatou lava sosaiete LMS i Amerika Samoa, ua tula’i mai ai le Peresetene: Rev. Dr Elia Ta’ase, Sui Peresetene: Tiakono To’ia Ulugaono, Failautusi / Teutupe ua tula’i ai le faletua o Vaitupu Ulugaono.

 

I le sosaiete LMS - AS e latalata i le to’a 20 sui totino o lo’o galuluei ai, ae talu ona taliu mai nei le fonotaga e i ai nisi o sui fou ua ofi mai i le mafutaga.

 

Ua mae’a fo’i le fonotaga i Niu Sila lea e lua ai lala ma’oti, Aukilani ma Ueligitone o lona uiga ua toe lafo mai i Samoa mo le tausaga o lumana’i. Lea la ua mae’a talimalo Samoa Tuto’atasi ae ua filifili nei e talimalo Amerika Samoa.

 

“Peita’i, ua talosaga mai se tasi o sui totino LMS-AS ua avea nei ma fa’afeagaiga i San Francisco ina ia avatu ia i latou ma lana ekalesia e talimalo i le 2017,” o se tala lea a Rev. Dr Elia Ta’ase.

 

“Na fa’ailo uma atu i sui usufono sa auai, ina ia iloilo toto’a i le fa’ai’uga a’o le’i faia le palota, aua e taugata pasese, e sailia visa e malaga ai, peita’i, e le’i i ai se tasi na auese e tatau ona masi’i e tali le vala’au ua o’o mai, aua o le mea faigata, e fa’ailo ai le soifua fa’atuatua  e aga i ai le finagalo o le Atua.”

 

Ua mae’a pasia fo’i ma le suiga o le vaitau e talimalo ai San Francisco o le a suia i le masina o Iulai, ae ia mae’a a’oga i le vaitau ua mae’a lelei ai nisi o tiute fa’atino i Ekalesia i lala taitasi, ma ua avanoa fo’i fanau i tu’uaga o a’oga.

 

I le taimi nei e fa lala ua fa’amauina mo le LMS- lua i Niu Sila, lua i le atu Samoa, ae o lea ua tula’i mai, atonu o se isi lea lala o le a tula’i mai le Malo tele o Amerika.

 

Sa fa’amatalaina e sui usufono le nofoaga sa faia ai latou fonotaga i aso e tolu, “O se Kolisi sili ona matagofie ona faleaoga sa matou fa’aaogaina, ae maise fo’i o nofoaga sa matou nonofo ai, ma potu fono sa faia ai matou tauaofiaga, ae maise fo’i o fale’ai sa tausia fa’apitoa ai i matou ma saunia ai matou tausamiga, e matua sili atu fo’i i ni faletalimalo i lea lava malo.”

 

O le aoga a le “Kings College” lea e matua taugata lava o latou pili e a’o’oga ai fanau, na tali ai lenei usugafono.