Ads by Google Ads by Google

TEPA I LA TA MALO

SAUNI VUI MA NI ISI ITUMALO TUALAUTA E FESOASOANI AUALA

 

Ua faalauiloa e le afioga i le tama’ita’i faipule ia Vui Florence Vaili Saulo i sana tusi na tuuina atu i le kovana sili i le vaiaso na te’a nei, lona sauni faatasi ai ma ni isi o aiga o lona itumalo o Tualauta e fesoasoani i le toe faafouina o ni isi o auala tua i totonu o le itumalo, i lalo o se fesoasoani mai i le malo.

 

E 20 auala tua i totonu o Tafuna, Vaitogi, Pava’ia’i ma Iliili na taua e Vui i lana tusi ia Lolo Matalasi Moliga, ua latou sauni e toe faafouina.

 

Saunoa Vui e faapea, o ni isi o aiga o lona itumalo, ua leva ona latou mananao e tuuina atu la latou fesoasoani e faaleleia ai auala, ona ua latou iloa o le finagalo foi lea o le faigamalo ua tulai mai, ia galulue tagata uma mo le manuia o le atunuu.

 

Na faafetaia e Vui i lana tusi aiga ua naunau e tuuina atu la latou fesoasoani mo le faaleleia o auala mo tagata uma o le atunuu.

 

I se fonotaga a le tamaitai faipule ma le kovana sili ia Lolo i le masina na te’a nei, na saunoa ai le alii kovana e faapea, e tatau ona tulai mai tagata o le atunuu ma itumalo e fesoasoani i le galuega a le malo o lo o taumafai, e pei o le faaleleia o auala i vaega eseese o le atunuu.

 

Mo se faataitaiga e pei ona taua e Lolo ia Vui i lea fonotaga, o le galuega o le uafu i Auasi lea o lo o faatupe e le malo mea e faatino ai le galuega, ae o tagata lava o le nuu o Auasi o lo o galulue e fausia le galuega, ma o le ituaiga lima fesoasoani lea na taua e Lolo ua manaomia i le atunuu i le taimi nei.

 

FA’A TAUA LE SUAVAI TAUMAFA MO LE OLA

 

O le avea ai o le masina lenei o Me ma masina ua faataua ai le suavai taumafa mo le ola o le tagata, ua faalauiloa mai ai e le Ofisa o le ASEPA i le atunuu fautuaga e ao ona nofo uta uma i ai le atunuu, ina ia saogalemu le suavai mo le taumafa ma ia toaaga tagata uma e taumafa le suavai.

 

Na taua e se sui o le polokalama a le ASEPA mo le faataua o le suavai taumafa ia Tumau Lokeni e faapea, “o le suavai taumafa o le mea alofa na tuuina mai e le Atua mo Samoa, e tatau fo’i i tagata uma ona faapelepele i ai.”

 

“O le fautuaga, faapupuna muamua le suavai faatoa taumafa ai, ina ia mautinoa le soifua maloloina o lou aiga,” o le fautuaga lea na tuuina mai e Lokeni i le latou polokalame na faalauiloa i luma o le maota o le malo i Utulei, le EOB i le taeao ananafi.

 

O fautuaga masani lava mo le soifua maloloina o tagata uma e pei ona tuuina mai e le AS-EPA, e le tatau ona kukaina meaai i vai e ki sa’o mai le paipa, ae tatau ona faapupuna muamua le suavai, pe faatau mai fo’i ni faguvai mai faleoloa ina ia mautinoa o lo o saogalemu le suavai mo le kukaina o meaai.

 

NOFOAGA FOU MO LE OFISA O LE PUIPUIGA O LE SAOGALEMU LOTOIFALE

 

O le masina o Aokuso lea ua faalauiloa mai e le Faatonusili o le Matagaluega o le Puipuiga o le Saogalemu Lotoifale, e tatau ona nofoia ai le latou Ofisa fou lea o lo o i ai nei i Ottoville.

 

I ni masina e le’i mamao atu na faamaonia ai e Utualii Iuni Savusa i luma o le Fono Faitulafono e faapea, o lo o tau fuafua feuiaiga mo le faatauina e le matagaluega o le latou fale fou i Tafuna.

 

O le fale fogafale lua ua taua o le Ottoville Center One, lea e pulea e le aiga o Haleck ua faatau atu e le matagaluega i le tupe e $1.5 miliona, lea e aofia ai le fale ma le fanua e afa eka.

 

E tusa ai o le saunoaga a Savusa, o le vaega a le FEMA o lo o gafa ma le faatupeina atoa o lenei faamoemoe.