I le amata aloaia ai o le suiga fou lea ua faia e le Ofisa o Tagata Matutua i le taeao ananafi, e ala i le tufatufaina atu lea o taumafa vela mo tama ma tina matutua ua agava’a i lalo o le polokalame, na fa’aalia ai e ni isi o tagata matutua a latou faitioga ma fa’asea fa’asaga i lenei suiga.

O ni isi o tagata matutua na fa’asea i le tuai o le taimi na tufatufa ai taumafa i ni isi o nofoaga e aofia ai le nofoaga autu i Pago Pago i le taeao ananafi, e o ni isi na fa’asea ma faitio i le fa’aletonu o taumafa sa mafai ona tufatufa atu i tagata matutua.

E ui i ia fa’asea, ae sa i ai fo’i ni isi o tama ma tina matutua na manatu e fa’afetaia le malo ona o le suiga ua faia i le polokalame, lea ua mafua ai ona maua e tagata matutua le avanoa e aai ai i taumafa o le polokalame.

“Ou te fa’afetaia le Fa’atonusili o le Polokalame aemaise ai o le faigamalo, ona o le avanoa ua mafai ona ou maua ou te agava’a ai i lenei polokalame, o ai na ilu ilu ma talo talo ou te maua se ipu meaai maua fua i lenei taeao, e ui i le fa’aletonu o tulaga o meaai ae viia le Atua i lana foa’i i lenei aso”, o le saunoaga lea a se tasi o tama e le i finagalo e fa’ailoa lona suafa.

E ta ane le itula e 8:30 i le taeao ananafi, ua amata ona gasolosolo ta’itasi atu ni isi o tama ma tina matutua i le nofoaga autu i Pago Pago mo le tauaaoina o a latou taumafa, peita’i na fa’ailoa i ai e ni isi o le aufaigaluega, o le polokalame e amata i le itula e 9:00 ae o le taumafa fa’atoa tufatufa i le itula e 10:00.

O ni isi o tama ma tina na aga’i atu mo le fia maua o ni a latou taumafa na toe fo’i i o latou aiga, ona e le i lesitalaina o latou suafa ina ia mafai ai ona agava’a i le suiga fou lenei o le polokalame, e pei ona fa’alauiloa ai e le Ofisa o le TAOA i luga o le nusipepa, leitio ma le televise.

Talu mai le itula e 8:30 lea na amata agai atu ai tagata matutua mo le tauaaoina o a latou taumafa, o le te’a o le itula e 11:00 na fa’atoa tufatufa ai taumafa.

O le to’atele o tagata matutua, na ona maua lava o a latou taumafa amata ona gasolo lea i o latou aiga, ae o ni isi e leai ni ta’avale sa talisua ai lava i le totonu o le fale fa’atoa amata ai ona gasolosolo i o latou aiga.

Na taua e le isi tama matua i lana tomumu i le Samoa News e fa’apea, “se’i vaai ua alu le kaeao ao legei o meaai a kamaiki gei ipu meaai”.

E tomumu lava le tama ma valaau mai i le sui o le Samoa News se’i pu’e le ata o lana ipu meaai, ona toe fa’apea lea o le isi ana tomumu, “e sili ai lava le koe fo’i i pepa meaai ka’i $40 sa sau ai kagaka makukua mai le kele o kausaga, ao legei suiga ua faia, o le ma’imauga o le kaimi”.

Na taua e se sui o le Ofisa o TAOA i le Samoa News e fa’apea, e foliga mai e le o maua e tama ma tina matutua le autu tonu o le polokalame, e le na o taumafa e ala ai ona aga’i atu tagata matutua i le nofoaga, ae o le agaga autu, ia maua le avanoa e mafuta faatasi ai tama ma tina matutua i se taimi o le aso, ma fai a latou ta’aloga e pei o pele suipi, pe talatalanoa fo’i tala o mea sa tutupu i Samoa i aso ua mavae.

E le i maua se taimi o le afioga i le Fa’atonu o le TAOA e tali mai ai i sona finagalo e faatatau i lenei mataupu, ona sa pisi o ia i ana asiasiga i isi nofoaga sa tufatufa ai fo’i taumafa i le aso ananafi, peita’i na taua e se sui o le TAOA e fa’apea, talu ai o le ulua’i taimi lenei fa’atoa amata ai le polokalame, atonu o le a sili atu ona lelei le auaunaga i le aso lona lua nai lo le ulua’i aso ananafi.

O le aso Tofi nei lea fo’i ua fa’amoemoe e toe tufatufa ai taumafa mo tagata matutua.