O le itula e 9:00 i le taeao nei lea ua fa’atulaga e tatala aloaia ai tauaofiaga a le Fono Faitulafono, mo le Fono Fa’apitoa lona tolu lea ua valaauina e le afioga i le ali’i kovana ia Lolo Matalasi Moliga mo le umi e le silia i le 10 aso.

E ono mataupu fa’apitoa a le alii kovana ua fa’amoemoe e talanoaina i le fono fa’apitoa lenei, fa’atasi ai ma mataupu tuua a le Fono Faitulafono e tapunia lana tauaofiaga i le aso Faraile na te’a nei e le i mautu i ai se finagalo a afioga i senatoa ma faipule.

E tapunia le tauaofiaga lona fa a le Fono i le aso Faraile na te’a nei, e lua mataupu o le fono fa’apitoa a le ali’i kovana ua taunu’u i le fono, o lisi ia i le va o le malo ma kamupani e lua i le atunu’u, le GHC Reid Corporation fa’apea ai ma le Pacific Grading Corporation.

Na fa’ailoa e le peresetene o le Senate ia Gaoteote Palaie Tofau i luma o le maota maualuga i le aso Faraile na te’a nei e fa’apea, afai e tuai ona taunu’u atu mataupu o le fono fa’apitoa a le alii kovana, o le a fa’amuamua loa ona talanoaina e le maota ana mataupu tuua e pei ona aofia ai i mataupu o le fono fa’apitoa, ina ia fa’aaoga tatau i ai aso o le fono fa’apitoa.

“Talosia ae vave i ai se finagalo o le la itu o le maota i mataupu e pei ona atugalu i ai a outou afioga i senatoa, ina ia pasia nei mataupu taua ma vave tu’uina atu i le ali’i kovana mo sana fa’aiuga”, o le saunoaga lea a Gaoteote e aunoa ma lona fa’aigoaina po o a mataupu taua ua fuafua le fono e talanoaina.

“O lea ua mae’a ona tu’uina atu la tatou talosaga i le afioga i le fofoga fetalai ma le maota o sui mo mataupu e pei ona outou atugalu i ai, ma, talosia ia tafa so latou finagalo ma vave fai i ai sa latou fa’aiuga”, o le isi saunoaga lea a Gaoteote.

Saunoa le Fofoga Fetalai o le maota o sui ia Savali Talavou Ale i luma o le maota i le vaiaso na te’a nei e fa’apea, o le taua o le fono fa’apitoa ua valaauina e le alii kovana, o le a mafai ai loa ona fai se fa’aiuga a le maota i mataupu tuua a le fono lea ua aofia ai mataupu o le fono faapitoa.

Na toe fa’amanatu e le fofoga fetalai i afioga i faipule se talosaga ua mae’a ona tu’uina atu “e le maota o Tama o le atunu’u”, e fa’atatau i ni mataupu o lo o taoto i komiti a le latou maota ina ia vave faia i ai sa latou fa’aiuga.

E fa’alua ona tuuina atu se talosaga mai le maota maualuga i le maota o sui, e talosagaina ai le fa’anatinati ona faia o se latou fa’aiuga i ni isi o pili taua o lo o taoto i komiti a le maota o sui, ona ua leai ni aso o le tauaofiaga na mae’a atu nei o totogi, peita’i e tapunia lava le tauaofiaga i le aso Faraile na te’a nei e le i faia lava se fa’aiuga a afioga i faipule i pili e pei ona fa’aoloolo maau atu ai afioga i senatoa, aemaise lava i pili e sii ai totogi o le kovana ma le lutena kovana, ma le pili e fa’aopoopo ai le ta’i $10,000 i alauni a senatoa ma faipule.

Na taua e le taitaifono o le komiti o le Paketi a le maota o sui ia Timusa Tini Lam Yuen i le Samoa News i le vaiaso nei e fa’apea, o le avanoa lelei lenei e talanoaina ai loa e le komiti pili e lua e pei ona taua, ma fai loa i ai sa latou fa’aiuga i le talia po o le teena fo’i.