Ads by Google Ads by Google

TAPUNI ALOAIA LE POLOKALAME A LE NEG

O le aso 30 Iuni 2013, o a taeao lea ua faatulaga e tapuni ma faamuta aloaia ai le polokalame na faatupe mai e le malo tele o le Iunaite Setete mo Amerika Samoa, le National Emergency Grant (NEG), i le maea ai lea o le taimi na faatulaga e faatautaia ai lea polokalame.

 

Na taua e Silia Time o lo o avea ma pule lagolago i lenei polokalame i le Samoa News e faapea, o le vaega mulimuli lenei o le polokalame a le NEG i le atunuu talu ona tuuina mai e le malo tele i le tuana’i ai o le galulolo i le 2009, ma e le toe faalogoina fo’i lenei polokalame i le atunuu i le lumana’i.

 

E $24 miliona na ofoina mai e le malo tele o Amerika mo Amerika Samoa i lalo o le polokalame a le NEG, e fesoasoani ai i le toe sailia o galuega a i latou na aafia a latou galuega i le galulolo o le 2009, aemaise ai o le taimi tonu lava fo’i lea na tapunia ai ma le kamupani i’a o le COS Samoa Packing, lea sa galulue ai le to’atele o le atunuu.

 

O le agaga autu o le polokalame o le NEG e pei ona tuuina mai e le Matagaluega o Tagata Faigaluega a le malo tele (DOL), e le gata e fesoasoani ai i le toe faamamaina o vaega sa faaleagaina i le galulolo, ae fesoasoani foi i le faatupeina o ni aoaoga mo le toe sailia o ni isi galuega fou mo i latou ua leai ni galuega.

 

Talu mai le silia i le tolu tausaga o faamanuiaina pea Amerika Samoa i le polokalame a le NEG, o le aso Faraile ananafi na faamuta aloaia ai loa galuega sa galulue ai i latou na faatupe i lalo o le polokalame.

 

O le vaega mulimuli na faamanuiaina i le polokalame a le NEG o i latou e to’a 346 na galulue mo le tuu faatasia o le lisi o tagata uma o le atunuu sa tautua ma o lo o tautua pea i totonu o vaega au a le malo tele atoa ai ma o latou aiga.

 

E 38 nofoaga eseese i totonu o le atunuu na vaevaeina i ai i latou e to’a 346 na galulue i le vaega mulimuli o le polokalame mo le 3 vaiaso le umi, ma ua maea ona tuuina atu a latou ripoti i le Ofisa autu i Utulei e tusa ai o le taunuuga o le latou galuega, ma o le aso fo’i ananafi na faia ai ‘aiga fiafia a ni isi o vaega sa mafai ona galulue i ni isi o afioaga i le atunuu e faamavae atu ai i le uso ma tuafafine sa latou galulue faatasi i totonu o le polokalame mo le tele o tausaga aemaise ai le tolu vaiaso ua tuana’i atu.

 

Na asia e le Samoa News le vaega sa galulue i le afioaga o Pago Pago, ma faailoa mai ai e le latou ta’ita’i ia Marla Iuliano le faafiafiaina o i latou e to’a 14 sa latou galulue faatasi i le tulaga manuia sa i ai le tolu vaiaso o le latou polokalame.

 

“O lea ua i’u manuia le galuega na matou galuluea ai mo le tolu vaiaso, ma ua matou manatu ai e tatau ona faia sa matou ‘aiga fiafia matou te faamavae ai, ona o lea ua faamuta aloaia le polokalame matou te le toe maua foi se avanoa e galulue faatasi ai ma i latou nei,” o le saunoaga lea a Iuliano i le Samoa News.

 

I le tolu vaiaso na galulue ai Iuliano ma lana vaega e to’a 14 i Pago Pago, sa mafai ai ona latou tuuina atu pepa faatumu i tagata e silia ma le to’a 80 sa tautua i vaega au a le malo tele i totonu o Pago Pago.

 

O le faafitauli o le galuega e pei ona saunoa le faletua ia Iuliano, o ta’ifeau ma le vevela o le la i le taimi e faatinoina ai la latou galuega, peita’i sa fesoasoani le Ali’i i taimi uma na faatino ai la latou galuega lea ua mafua ai ona i’u manuia.

 

Na taua e Mataio Amituana’i o Fagatogo sa galue ai i le polokalame a le NEG, e ui ua faamuta le polokalame peitai sa tele le fesoasoani a le polokalame mo ia ma lona aiga, e le gata ua ia maua ai isi agavaa faaopoopo e pei o le kuka ma le fai togalaau ‘aina, ae sa mafai foi ona fesoasoani tupe sa ia maua mai i le polokalame e faatino ai ni isi o manaoga mo lona aiga.

 

O ni isi o tagata o le atunuu na maua le avanoa e galulue ai mo le polokalame a le NEG i tausaga ua mavae atu, sa latou faaalia le agaga faafetai i le malo ona o le faaavanoaina mai o lenei polokalame e maua ai fesoasoani mo i latou, e le gata sa faamanuiaina i tupe mai totogi o galuega na galulue ai ae o isi ua faamanuiaina i tomai ma agavaa faaopoopo sa latou aoaoina mai i le polokalame.

 

O le aso ananafi na taamilo atu ai sui o le Matagaluega o Tagata Faigaluega a le malo o lo o gafa ma le vaavaaia o le polokalame a le NEG i nofoaga eseese sa galulue ai i latou e to’a 346 mo le tolu vaiaso mo le tapunia aloaia lea o a latou polokalame aemaise ai o le aoina atu o faamaumauga i totonu.

 

Na taua e Silia i le Samoa News e faapea, talu mai le aso Tofi na te’a nei, e tusa ma le to’a 1,321 le aofa’i o tagata sa tautua i vaega ‘au eseese a le malo tele ua mafai ona faamauina o latou suafa, ma le silia i le to’a 4,000 o latou aiga ua uma fo’i ona lesitala, ae o lo o i ai le faamoemoe e i ai le avanoa e toe faaopoopo atu ai le aofa’i ua i ai pe afai ae maea uma atu ripoti a ni isi o vaega.

 

“E ui i nai tulaga faaletonu sa tau maitauina i le amataina mai o le polokalame mo lenei tolu vaiaso, ae o le agaga faafetai e momoli atu i taitai o vaega taitasi ona o le galuega fita ma le mae’a lelei sa latou faatinoina, e momoli atu ai fo’i le faafetai ia i latou uma sa galulue i lenei polokalame ina ua faamuta aloaia e aunoa ma se faalavelave matuia na tula’i mai,” o le saunoaga lea a Silia.

 

Ina ua faatoa tatala le polokalame o le NEG i le tolu tausaga talu ai, e silia i le to’a 2,000 tagata o le atunuu na maua galuega e galulue ai, ma le silia i le to’a 2,400 isi sa maua le avanoa  e auai ai i a’oa’oga eseese e fesoasoani ai ia i latou ia maua le isi tomai ma le agavaa faaopoopo e sailia ai ni a latou galuega.

 

O ni isi o aoaoga sa faia e aofia ai aoaoga kuka, su’isu’i aemaise ai aoaoga mo le amataina o ni faatoaga e fesoasoani ai i tupe maua a aiga.

 

O le taimi lenei i le tausaga na te’a nei na fuafua e faamuta aloaia ai le polokalame, peitai na toe talia e le malo tele le talosaga ina ia toe faaauau le polokalame seia oo mai i le aso 30 Iuni 2013 e pei ona i ai nei.