KOMITI FAAFOE MO LE FALETUSI A FELETI BARSTOW

Ua i luma o le Fono Faitulafono tofiga a le alii kovana sili ia Lolo Moliga, mo le tofia lea o ni isi e to’afitu e avea ma totino o le Komiti Faafoe o le Faletusi a Feleti Barstow.

O i latou ua tofia e le alii kovana e aofia ai Tom Drabble, Gwen Tauiliili-Langkilde, Tapaau Dr. Dan Aga, Wendy Malepeai, David Addison, Rev. Albert Toeaina ma Bessie Manase.

I sana tusi i taitai o le fono na taua ai e Lolo e faapea, o i latou ua ia filifilia e avea ma totino o le Komiti Faafoe o le faletusi, e le gata ua i ai o latou tomai ma agavaa e faatino ai galuega faapenei, ae o ni isi foi ua sauni e ofoina atu o latou taimi e auauna ai i le malo mo lenei galuega.

Sa taua foi e le alii kovana e faapea, o totino uma o le komiti faafoe a le faletusi o lo o i ai, ua uma a latou taimi faatulagaina mo le komiti e aunoa ma le toe tofia o ni isi e sui tulaga ia te i latou, e na o le toalua foi totino o le komiti o lo o alala i Amerika Samoa.

Mo i latou ua tofia e le kovana e avea ma totino o le komiti faafoe a le faletusi, o Drabble ma Gwen Tauiliili-Langkilde lea e i ai o la agavaa i tulaga o pisinisi tua, faapea ai Tapaau o lo o fai ma sui o le Kolisi Tuufaatasi ma Wendy o lo o fai ma sui o le atunuu lautele, e ta’ifa tausaga o le a galulue ai o totino o le komiti.

O le isi toatolu o totino o le komiti e ta’ilua tausaga o le a galulue ai, o i latou ia e aofia ai Addison, o lo o fai ma sui o le kolisi tuufaatasi, Rev. Albert o lo o fai ma sui o le atunuu lautele, ma Manase o lo o fai ma sui o le Matagaluega o Aoga.

FIA MALAMALAMA MAUGA TULAGA O LO O I AI FALEMA’I

Ua i ai le fuafuaga o se taimi o le vaiaso fou o le a feiloa’i ai le Komiti o le LBJ/Soifua Maloloina a le maota maualuga, ma sui o le Komiti Faafoe o le Falema’i faapea ai lana taupulega, mo le faamaninoina o nisi o mataupu o lo o fia malamalama i ai le afioga i le alii senatoa ia Mauga Tasi Asuega, o ia fo’i lea o le taitaifono o le komiti faapea ai nisi o sui o le maota.

Na taua e Mauga i le vaiaso nei e faapea, e tele tulaga fou o lo o tulai mai i le falema’i e ao ona silafia e le Fono, aemaise lava i ana faiga faavae o lo o lima taitaiina ai le tele o ana faaiuga fai.

Talu ai le faaauau pea o tulaga faaletonu i le itu tau tupe mo le falema’i, na taua ai e Mauga le tatau lea ona tuuina mai e le falemai i le maota maualuga, ripoti e tatau i ana tupe maua aemaise ai ana aitalafu o lo o i ai, ina ia manino i ai le fono mo ana faaiuga fai.

O le taitaifono o le Komiti Faafoe a le falema’i atoa ai ma le pulesili fou ua i ai, o i laua ia ua fuafua e molimau i luma o le komiti a le senate pe a faataunuuina lea iloiloga i se taimi o le vaiaso fou.

MATAUPU A LE FONO MA LE ALII KOVANA

Na faamanino e le peresetene o le Senate ia Gaoteote Palaie Tofau i luma o le Senate i le aso Lua na te’a nei, e le o toe umi se taimi ae maea loa ona galulue loia mo le faamautuina o le mataupu a le Senate, lea o lo o fuafua e tuuina atu i luma o le Fa’amasinoga, e faatatau i le malosi e teena ai e le kovana le se vaega o le paketi e pasia atu e le fono.

Saunoa Gaoteote e faapea, e le tuua le mataupu e pei ona pasia e le Senate, i le tuuina atu lea o le mataupu lenei e fai mai e le faamasinoga sona faaiuga, ona o se mataupu e taua ma aoga mo le lumana’i o tupulaga o lo o faasolo atu e fai ma sui o le atunuu i le fono faitulafono.

O le afioga i le alii senatoa ia Soliai Tuipine Fuimaono na toe fesiligia le mataupu lenei i le vaiaso nei, po o fea ua o o i ai.

Saunoa Soliai e faapea, e le tatau ona tuua le mataupu lenei e foia i tua, ae tatau pea lava ona tuuina atu i le faamasinoga, ina ia manino mai ai se faaiuga mo le manuia o galuega a le fono ma le faigamalo i le lumana’i.