FA’ATULAGA FA’AMASINOGA AUTU TAMA AOGA DON BOSCO

Ua talia e le fa’amasinoga maualuga talosaga na fa’aulu e ali’i loia o lo o tula’i mo ali’i aoga e to’atolu mai Don Bosco, lea o lo o tu’uaia i lo latou faia o uiga mataga i se tama’ita’i e 15 tausaga le matua, ina ia fa’atulaga loa se aso e fa’ataunu’u ai le fa’amasinoga autu o lenei mataupu, se’i iloilo ai mau a le malo pe mafai ona ta’usala ai i latou nei o lo o tu’uaia.

O ali’i aoga mai Don Bosco o lo o tu’uaia i lenei mataupu e aofia ai Vaega Anderson, Falesefulu Susuga ma Nomani Tepa, lea o lo o tu’uaia i latou moliaga ta’i fa e aofia ai moliaga mamafa o le faiaiga ma se tama’ita’i e laititi i lalo o le tulafono; faia o uiga mataga fa’a feusuaiga, faapea ai ma le tagofia o itutinosa o se tama’ita’i e lei fa’aipoipo i ai, atoa ai ma le moliaga mama o le faia lea o ni gaioiga e ono lamatia ai le saogalemu o fanau laiti..

O tu’uaiga fa’asaga i ali’i nei e to’atolu, na alia’e mai i le masina o Aperila 2015, i le taimi ao i ai sui o le aoga a Don Bosco i le atunu’u, ina ua malaga mai e fai ma sui o le malo o Samoa i le fa’amanatuina o le 115 tausaga o le fu’a a Amerika Samoa.

O le taeao ananafi na toe tolopo mai i ai le mataupu fa’asaga i ali’i nei e to’atolu, i le mae’a ai o se iloiloga sa fa’atautaia i le lua vaiaso talu ai, ma toe tolopo mai ai loa le mataupu e toe fofogaina i le taeao ananafi.

Ina ua valaau le mataupu, sa fa’ailoa e ali’i loia fautua o loo tula’i mo i latou nei ia Michael White, lea o loo tula’i mo Anderson, ma Douglas Fiaui o lo o tula’i mo Susuga ma Tepa, ua mae’a ona latou tauaaoina mau fa’amaonia o le mataupu mai le itu a le malo, atoa ai ma se ofa sa manatu le malo e tuuina atu ina ia fa’amutaina ai lenei mataupu, ma ua latou talosagaina ai loa le fa’atulaga o se aso e faia ai le fa’amasinoga autu o lenei mataupu.

MANU LEFATIA

O le aso 31 Iulai 2015 lea ua toe tolopo i ai le mataupu a le ali’i o Manu Lefatia, ina ua talia e le fa’amasinoga maualuga se talosaga na fa’aulu e lana loia fautua ia Sharron Rancourt, mo se avanoa e toe tolopo ai lenei mataupu i se isi lua vaiaso, ae se’i fa’aauau suesuega a le malo mo le tuu faatasia o a latou mau faamaonia o loo totoe mo lenei mataupu.

Na taua e Rancourt i luma o le fa’amasinoga maualuga ananafi e fa’apea, ua mae’a ona tauaao atu e le malo se vaega o a latou mafau fa’amaonia, peita’i e le’i mae’a atu, ma, o loo manaomia e le malo se isi taimi e fa’amae’a lelei ai a latou suesuega.

O Lefatia o loo tu’uaia fa’atasi ma ni isi ali’i se to’afa i le mataupu lea na o latou osofaia ai le Ofisa o Leoleo i Leone i le masina o Novema 2014 i se taimi o le vaveao, lea na tafana ai tioata o le Ofisa o Leoleo, e ui e leai se isi na manu’a.

O lo o taofia pea Lefatia i le toese i Tafuna e aunoa ma se tupe ua fa’atulaga e tatala ai o ia i tua, e fa’atali ai le aso 31 Iulai lea ua fa’atulaga e toe tul’ai ai i luma o le fa’amasinoga.

ROPATI LEVI

O le ali’i talavou lea na tu’uaia i lona fa’ao’olima lea i se alii ave taxi i luma o se faleoloa i Tafuna i le masina o Aperila na te’a nei, ua poloaina e le fa’amasinoga ina ia fa’anofovaavaaia o ia mo le 18 masina, i lalo o tuutuuga na te tuliina aso e 45 i le toese i Tafuna.

Peita’i ua manatu le fa’amasinoga, ua lava po e 6 lea na tofia ai le alii o Ropati Levi i le toese e fai ma ana faasalaga i lenei mataupu, ae o le a nofovaavaaia o ia i lalo o poloaiga e ao ona usita’i i ai.

O ni isi o ia poloaiga e aofia ai lona totogiina o le salatupe e $200 i le fa’amasinoga, fa’asa ona ia toe tagofia le ava malosi, fa’asa ona toe eva ma tagata inupia pe toe alu foi e tafao i fale kalapu poo nofoaga o loo faatau ai le ava malosi, fa’asa fo’i ona ia toe soliina se tulafono a le malo, a ia avea o ia ma tagatanu’u lelei e tausisi i tulafono a le malo i taimi nei.

Ua poloaina fo’i e le fa’amasinoga ia Levi ina ia fa’atoese i le ali’i na a’afia i lenei mataupu, i luma o se sui o le Ofisa Fa’anofovaavaaia.

O Levi na ta’usala e le fa’amasinoga fa’aitumalo i moliaga mama e lua o le fa’aoolima i le tulaga tolu atoa ai ma le fa’atupu vevesi i nofoaga faitele, e mafua mai ina ua ia ioeina tu’uaiga a le malo fa’asaga ia te ia, e mafua mai i le fa’alavelave lea na ia fa’ao’olima ai se ali’i ave taxi i luma o se faleoloa i Tafuna.