NOFOSALA LJ SOLO MOLIAGA UMIA FA’ASOLITULAFONO MARIUANA

O le aso 8 Aperila 2016 lea ua fa’atulaga e le fa’amasinoga maualuga e tu’uina atu ai sana fa’asalaga i le ali’i o LJ Solo, i le mae’a ai lea ona ta’usala o ia e le fa’amasinoga  i le moliaga o lona umia fa’asolitulafono lea o vaega o le laau fa’asaina o le mariuana.

O moliaga e tolu na ulua’i tu’uaia e le malo ia Solo talu mai le tausaga na te’a nei, e aofia ai le moliaga mamafa o lona umia fa’asolitulafono lea o vaega o le laau fa’asaina o le mariuana, fa’apea ai ma moliaga mama e lua o le ave ta’avale ‘ona fa’apea ma le ave ta’avale fa’atamala.

I lalo o se maliliega na sainia e Solo ma le malo, lea fo’i ua talia e le fa’amasinoga, sa ia tali ai e le tete’e o ia i le moliaga e pei ona ta’usala ai o ia.

I le tali ai o Solo, 27 tausaga le matua e le tete’e o ia i le moliaga, sa ia ta’utino ai e fa’apea, i se taimi o le aso 13 Novema 2015, sa ia umia ai vaega o le laau fa’asaina o le mariuana i le taimi na ia fa’afoeina ai se ta’avale, ma o lea gaioiga sa ia faia, sa le tusa lea ma ala o le tulafono.

Ina ua fesiligia e le afioga i le fa’amasino sili ia Michael Kruse le itu a le malo e fa’amanino mau fa’amaonia o lo o lagolagoina ai le mataupu fa’asaga ia Solo, na taua ai e le loia a le malo e fa’apea, i le po e pei ona taua na tula’i mai ai le fa’alavelave lea na lavea ai le ta’avale a Solo, sa maua ai e leoleo i lalo o le nofoa o le ta’avale se tama’i taga pepa o lo o i ai lau mariuana.

Na taua atili e le malo e fa’apea, ina ua tula’i mai le fa’alavelave, sa oso le ua molia aga’i i le nofoa o le pasese ma nofo ai, peita’i sa i ai molimau e to’alua sa i ai i le taimi o le fa’alavelave na la fa’ailoa i leoleo lo la vaaia o Solo o ia fa’afoeina le ta’avale.

Na fa’ailoa e Kruse ia Solo e fa’apea, tusa lava pe o lea ua ia tali e le tete’e i le moliaga e pei ona ta’usala ai o ia, e tatau fo’i ona ia silafia, e tutusa lava le ituaiga fa’asalaga e tu’u atu e le fa’amasinoga i le tagata e tali ioe i le moliaga lea ua ta’usala ai o ia, ma le fa’asalaga e tu’uina atu i le tagata e tali e le tete’e.

O le ali’i loia ia Marcellus Tala Uiagalelei o lo o tula’i mo Solo.

JOE TOGITOGI

O le taeao ananafi lea na amata aloaia ai le fa’amasinoga iloilo a le ali’i o Joe Togitogi i luma o le fa’amasino sili ia Michael Kruse (Bench Trial), e mafua mai i tu’uaiga o lo o tu’uaia ai o ia e le malo, ona o le fa’alavelave lea na ia fa’ao’olima ai i se ali’i i Nu’uuli i le tausaga na te’a nei.

O le afioga i le fa’amasino silii ma ana fa’amasino lagolago ia Muasau Tasina Tofili ma Tunupopo Faleafaga o lo o iloiloina le mataupu a Togitogi.

E le i umi lava ona magalo mai Togitogi i tua mai le toese i Tafuna, e mafua mai i le fa’alavelave lea na taumafai e fa’ao’o ni manu’a i se isi tagata i Nu’uuli, ae alia’e mai loa ma le mataupu fou lea ua tu’uaia ai o ia e le malo.

O moliaga o lo o tu’uaia ai e le malo ia Togitogi i le mataupu lenei e aofia ai le fa’ao’olima i le tulaga muamua ma le fa’atupu vevesi i nofoaga faitele, ma o lo o teena malosi e Togitogi tu’uaiga fa’asaga ia te ia.

O lo o tu’uaia e le malo ia Togitogi i lona tu’iina lea o le ali’i na manu’a, sosoo ai loa ma le tulioso atu o isi tamaiti Nu’uuli ma fasi to’atele le ali’i na a’afia, peita’i na taua e Togitogi i leoleo e fa’apea, na muamua tu’i e le ali’i na manu’a o ia, e mafua mai ina ua masalosalo le ali’i lea o ia na gaioia le TV mai le fale a lana uo teine.

O lo o finau Togitogi o isi tamaiti sa latou i ai fa’atasi na latou fa’ao’o manu’a i le ali’i na a’afia, peita’i na taua e le ali’i na a’afia i sana molimau i luma o le fa’amasinoga i le tausaga na te’a nei, ina ua faia le ulua’i iloiloga o lenei mataupu, o Togitogi lava na muamua tuia o ia ma manu’a ai.

UATAU FALANI

O le ali’i lea na ia taumafai e osofa’i le fale o se aiga i Tafuna i le vaveao o le aso 23 Tesema 2015, ua ia ta’utino i le fa’amasinoga e fa’amaonia tu’uaiga fa’asaga ia te ia.

O le ali’i o Uatau Falani na ulua’i tu’uaia e le malo i le moliaga mamafa o lona taumafai lea e talepe le fale o se isi aiga, ae i lalo o se maliliega ua mae’a ona sainia e le ua molia ma le malo, ua manatu ai le malo latou te suia le moliaga e tu’uaia ai Falani, ina ia fa’ailoa ai le moliaga mama o lona tu fua lea i le fanua ma le fale o le isi aiga.

I le maliliega ua sainia e Falani ma le malo lea na fofogaina i luma o le fa’amasinoga maualuga i le taeao ananafi, na tali ioe ai Falani e fa’apea, i le vaveao o le aso e pei ona taua, sa ia alu ai i le fale o le aiga na a’afia ma ia taumafai e vane le faitoto’a o le fale.

Na fesili le fa’amasino sili lagolago ia Lyle L. Richmond i le loia a le malo ia Russel Smith pe sa fesiligia e le malo le aiga na a’afia i lenei mataupu, ae na tali Smith e leai, ona o le talitonuga o le malo, e leai ni meatotino na gaoia e Falani, e leai fo’i la se mafua’aga e tau fesiligia ai fua le aiga na a’afia, peita’i na saunoa Richmond, tusa lava pe leai ni meatotino sa gaoiga, e manatu le fa’amasinoga e tatau lava ona silafia e le aiga na a’afia tulaga o le mataupu.

O le aso Tofi lea ua toe tolopo i ai lenei mataupu, ae se’i feso’ota’i le itu a le malo i le aiga na a’afia i lenei mataupu.