TALI IOE SELAPI TUITELELEAPAGA I TU’UAIGA A LE MALO

O le tama’ita’i faigaluega a le Matagaluega o Aoga a le malo, lea na tu’uaia i lona gaoia o le siaki a se faiaoga ma ia tala i se faleoloa i Iliili, ua ia ta’utino i le fa’amasinoga maualuga, e fa’amaonia tu’uaiga fa’asaga ia te ia.

E lua moliaga mamafa na ulua’i tu’uaia ai e le malo ia Selapi Tuiteleleapaga i le ulua’i taimi ina ua fa’atoa tula’i mai lenei mataupu, ae i lalo o se maliliega na sainia e le ua molia ma le malo, lea fo’i ua talia e le fa’amasinoga, ua ia tali ioe ai i le isi moliaga e tasi o le gaoi, ae solofua e le fa’amasinoga le isi moliaga o le ave fa’agaoi lea o ni meatotino sa tu’uina atu i lalo o lana vaavaaiga.

I le tali ioe ai o Tuiteleleapaga i le moliaga o le gaoi, sa ia ta’utino ai i le fa’amasinoga e fa’apea, i se taimi o le tausaga na te’a nei, sa ia gaoia ai le siaki sa tu’uina atu mo se faiaoga a le aoga tulaga muamua a Lupelele i le aofa’i e $1,131.97.

O Tuiteleleapaga sa avea ma Failautusi o le aoga i le taimi na tula’i mai ai le fa’alavelave, ae sa la malaga ma le sui pule a le aoga e piki mai siaki o totogi o faiaoga ma le aufaigaluega i le aso 22 Setema 2014.

Na fa’ailoa e Tuiteleleapaga i leoleo e fa’apea, o ia sa talaina le siaki, ona ia fa’aaoga lea o le $200 e fai ai le fa’atau a se tasi o lona aiga sa malaga i Niu Sila, ona ia toe tu’u lea i ai o le tinoitupe e $400, ae o le sui na totoe sa ia fa’aaoga mo ia lava.

FALEPUIPUI SOPI SENIO JR MO LE 20 MASINA

O le ali’i lea na taumafai e gaoi tupe mai le masini ATM a le ANZ Bank, e ala i lona taumafai e talepe le masini, ua poloaina e le fa’amasinoga ina ia taofia o ia i le toese i Tafuna mo le umi e 20 masina, o se tasi lea o tu’utu’uga o lana nofova’ava’aia e 5 tausaga.

O isi tuutuuga o le nofovaavaaia a Sopi Senio Jr e aofia ai lona totogiina o le salatupe e $1,000, auai i ni aoaoga e fesoasoani ai i le tulaga o le ita, atoa ai ma lona toe totogiina o le lata i le $4,500 mo le masini sa ia fa’aleagaina.

O le fa’alavelave ua ta’usala ai Senio Jr na afua mai i le 2013, ina ua ia taumafai e fa’aleaga le masini ATM sa i luma o le faleoloa o KJ & P Kruse i Leone, ma le fa’amoemoe na te gaoia ai se tupe, peita’i na fo’i fua lana taumafaiga ina ua uma ana taumafaiga e le matala le masini, se’i vagana ai le fa’aleagaina, ma i’u ina maua ai o ia e leoleo, e mafua mai i ni ata sa pu’eina e le masini pu’eata sa i luma o le faleoloa.

E o o mai i le taimi nei, e le i toe i ai lava se masini ATM a le faletupe o le ANZ Bank i le itu i Sisifo, mo le fa’aaogaina e le mamalu o le atunu’u, talu mai le fa’alavelave na fa’aleagaina ai e le ua molia le masini.