Ads by Google Ads by Google

Tala otooto o Fa’amasinoga

PERENISE TAALA

 

Ua i luma nei o le fa’amasinoga maualuga se maliliega ua mae’a ona sainia e le malo ma le ali’i o Perenise Taala, ma le manatu o le maliliega lenei o le a fa’amuta ai loa taualumaga uma o le mataupu e pei ona tu’uaia ai le ua molia e le malo.

 

O Taala na ulua’i tuuaia e le malo i moliaga mamafa e lua o le maliu lea o se tagata i le ta’avale sa ia aveina, atoa ai ma le ave ta’avale ‘ona ua maliu ai se tagata, fa’apea ai le moliaga mama o le ave ta’avale fa’atautala.

 

I lalo o le maliliega lea ua sainia e Taala ma talia e le fa’amasinoga maualuga, ua ia tali ioe ai i le moliaga mama o le ave ta’avale ‘ona ma i’u ina maliu ai se tagata, ae solofua e le fa’amasinoga isi moliaga o lo o totoe.

 

I le tali ioe ai o Ta’ala i lea moliaga, sa ia ta’utino ai e fa’apea, i se taimi o le aso 23 Setema 2014, sa ia fa’afoeina ai se ta’avale i luga o le auala ao ia ‘ona, ma i’u ina lavea ai lana ta’avale lea na i’u ina maliu ai se ali’i sa ti’eti’e i le pito i tua o lana ta’avale.

 

MOLIA SE ALII FA’AO’OLIMA LONA TO’ALUA

 

E 27 tausaga o se ali’i mai Leone ua molia e le malo i le faaoolima i le tulaga tolu faapea ai ma le faatupu vevesi i totonu o lona aiga, e mafua mai i le fa’alavelave lea ua tu’uaia ai o ia, o lona fa’ao’olima lea i lona to’alua i le aso 19 Setema 2014, e ala i lona fasi ma folafola le fasiotiina o ia.

 

O le fa’alavelave lenei na tofu atu i le Ofisa o Leoleo i Leone, ina ua alu i ai le tina na a’afia ma tagi i leoleo mo se fesoasoani.

 

Na taua e le tina talavou na a’afia i leoleo ina ua fesiligia o ia e fa’apea, o le la vevesi ma lona to’alua na afua atu ina ua tuai ona manava i le aso e pei ona taua, lea na ia taunuu ai i le fale pe tusa o le itula e 11:00 i le po, ma tuuaia ai loa o ia e lona to’alua o lo o fai se la fa’anunumi ma se isi tamaloa.

 

Na fai fai tetele amioga a le ua molia e pei ona taua e le fafine i leoleo, e le gata sa ia lafo upu malolosi ia te ia, ae sa palauvale atu fo’i ia te ia, ma i’u ai loa i le titina e lona to’alua o lona ua toe po ona foliga.

 

Na taua e le fafine i leoleo lona tagi i le fefe, peita’i na folafola e lona to’alua ona fasiotiina o ia pe afai e alu ese ma le la potu. Na taua fo’i e le fafine i leoleo lona fia sola i fafo ma le potu e logo le ofisa o leoleo, peita’i na folafola e le ua molia le fasioitiina o ia pe afai ae alu ese.

 

Na toe fa’aauau le vevesi ina ua malama le taeao na soso’o ai, e ala i le fa’aigoa e le ua molia o lona to’alua i le mau igoa eseese, atoa ai ma lona tu’uaia o ia i le faia lea o se la fa’anunumi ma se isi tamaloa, ae o le taimi lava na alu ai le fafine e fa’aaoga le fale taele, o le taimi lea na maua ai loa ma lona avanoa e sola ese ai mai le fale ma fa’asasa’o loa i le ofisa o leoleo e logo i ai lana tagi.

 

E le i mana’o le ua molia e fai sana fa’amatalaga i leoleo ina ua fesiligia o ia.

 

I luma o le fa’amasinoga fa’aitumalo, sa ia teena ai tuuaiga fa’asaga ia te ia, ma ua tolopo lana mataupu e toe valaau i le masina fou, ae ua poloaina o ia e le fa’amasinoga e aua ne’i ona toe taumafai e fa’afesootai lona to’alua i so o se auala.