PENIAMINA FA’AMAILE

E 20 aso lea ua poloaina e le fa’amasinoga fa’aitumalo e taofia ai le ali’i o Peniamina Fa’amaile i le falepuipui i Tafuna, ina ua ta’usala o ia i le moliaga mama o le fa’atupu vevesi i nofoaga faitele, e mafua mai i se fa’alavelave lea na tula’i mai i le masina na te’a nei, ina ua latou pisapisao ma ni isi o ana uo ao faia sa latou inugapia, ma avea ai ma itu na fa’alavelave ai i isi aiga tuaoi.

E taofia e leoleo ia Fa’amaile i le fa’alavelave lea, ae o le taimi lea o lo o nofovaavaaia ai o ia mo le 24 masina, ona o se mataupu na tula’i mai i le fa’aiuga o le tausaga na te’a nei, lea fo’i na ta’usala ai o ia i le moliaga o le fa’atupu vevesi i nofoaga faitele.

Na fautuaina e le ali’i fa’amasino ia Elvis P. Patea le ali’i o Fa’amaile, afai e toe molia atu o ia i luma o le fa’amasinoga i se isi solitulafono i totonu o le 24 masina lea ua nofovaavaaia ai, o le a sili atu loa ona mamafa se isi fa’asalaga e tu’uina atu ia te ia.

Ua poloaina fo’i o ia na te totogi le salatupe e $100 i totonu o le ulua’i 45 aso talu ona magalo mai i le toese.

O isi tuutuuga o lana nofovaavaaia e 24 masina lea ua tuuina atu e le fa’amasinoga, o le fa’asa lea ona ia toe tagofia le ava malosi ma ua fa’asa fo’i ona ia toe solia se tulafono.

LEO PETELO

O le aso 1 Aokuso 2014 lea ua fa’atulaga e faia ai le ulua’i iloiloga o le mataupu a le ali’i o Leo Petelo, i le mae’a ai lea ona ia teena i le taeao ananafi o tu’uaiga fa’asaga ia te ia i luma o le fa’amasinoga maualuga.

O le ali’i loia fautua ia Michael White na fa’aleoina le tali tete’e a Petelo, lea fo’i e le i fa’atuiese i ai le loia a le malo ia Tony Graf.

O Petelo o lo o tu’uaia i lona faia o ni uiga mataga i se teineititi e la te tuaoi e 13 tausaga le matua, e ala i lona toso fa’amalosi atu o ia ma kisi i ai, atoa ai ma lona tagofia o ona itutinosa e pei ona taua i fa’amaumauga a le fa’amasinoga.

O lo o taofia pea i le toese ia Petelo ina ua le mafai ona ia totogiina le tupe e $25,000 na fa’atulaga e tatala ai o ia i tua.

ARONA AMITUANA’I

O le aso Gafua o le vaiaso fou lea ua fa’atulaga e tula’i ai Arona Amituana’i i luma o le fa’amasinoga maualuga, ina ua ia fa’aagafua ona aia tatau fa’aletulafono, ma le fa’ataunu’uina ai lana ulua’i iloiloga lea na fa’amoemoe e faia i le taeao ananafi i luma o le fa’amasinoga fa’aitumalo.

E lua mataupu o lo o tu’uaia ai e le malo ia Amituana’i, e mafua mai i le fa’alavelave lea na tula’i mai i le masina o Novema 2013 i Pago Pago, lea na ia fa’ao’olima ai i se tama matua e ana le fale sa ulufale fa’amalosi ai i totonu, fa’apea ai ma le fa’alavelave na tula’i mai i Nu’uuli i le masina o Iuni na te’a nei, lea na ia tete’e ai i leoleo atoa ai ma lona fa’ao’olima i le isi leoleo, ao taumafai leoleo e fa’ataunu’u se poloaiga a le fa’amasinoga e pu’e fa’apagota ai o ia.

O lo o taofia pea Amituana’i i le toese i Tafuna, se’i vagana ua ia totogi le vaega tupe e $32,000 ua fa’atulaga e le fa’amasinoga ona fa’atoa mafai lea ona tatala o ia i tua.