VESI MALUA

E 12 masina lea ua nofovaavaaia ai le alii o Vesi Malua i luma o le fa’amasinoga fa’aitumalo, ina ua ta’usala o ia i le moliaga o le fa’ao’olima i le tulaga tolu, e mafua mai i le fa’alavelave lea na ia tu’iina ai se ali’i ave taxi na musu e momoli o ia i le nofoaga sa mana’o e alu i ai.

Na fa’atoese Malua i le fa’amasinoga e tusa ai o lana solitulafono sa faia, sa ia fa’atoese fo’i i le ali’i ave taxi na a’afia, lea fo’i sa i ai i totonu o le potu fa’amasino i le taimi na lau ai lona fa’asalaga.

O aso e 13 lea na taofia ai Malua i le toese a o fa’atalitali taualumaga o lana mataupu, ua manatu le fa’amasinoga o le a avea lea e fai ma ana fa’asalaga i lenei mataupu.

O ni isi o poloaiga o lana nofovaavaaia e aofia ai le fa’asa ona ia toe tagofia le ava malosi, auai i ni aoaoga e fesoasoani ai i le tulaga o le ita, ma ia alu e fa’atoese i le ali’i ave taxi sa ia fa’ao’olima i ai, i le taimi ma le aso e fa’atulaga atu e le ofisa nofova’ava’aia.

O Malua na onana ma ni isi o ana uo i le fale kalapu o le Bowling Alley i se po o le masina o Aperila na te’a nei, ma latou viliina ai loa se taxi e momoli ai i latou i Iliili, peita’i ina ua taunu’u le taxi i le vaega e paka ai ta’avale i le Bowling Alley, na musu le ave taxi e ave Malua ma ana uo ona ua ova tele le ‘onana, aemaise ai fo’i sa lafo e le ua molia ni upu tau fa’amata’u i le ali’i ave taxi.

A o taumafai le ave taxi e fa’amalamalama ia Malua ma ana uo le mafua’aga o lana fa’aiuga na te le avea i latou i lana ta’avale, na fa’afuase’i ona tu’i e le ua molia le gutu o le ave taxi peita’i e le i manu’a ai o ia

Na vave ona oso le taxi a le ali’i na a’afia ma ia fa’afeso’ota’iina loa leoleo mo se fesoasoani, ma agai atu ai loa leoleo ma taofia fa’apagota Malua.

ANDREW FILIPO

O le vaiaso nei na faila ai e le malo le moliaga mamafa o le ave ta’avale a o se’i le laisene fa’asaga ia Andrew Filipo, ona o le fa’alavelave lea ua tuuaia ai o ia i lona fa’afoeina o se ta’avale i le masina o Me na te’a nei i luga o le auala i Iliili, a o se’i e le fa’amasinoga lona laisene ave ta’avale mo le umi e 6 masina.

Na teena Filipo le moliaga mamafa ua faia fa’asaga ia te ia, ma ua fa’atulaga nei lana ulua’i iloiloga mo lenei mataupu, a o fa’atali ai feutanaiga o lo o fa’agasolo i le va o itu e lua, mo le tau sailia o se maliliega aufa’atasi ma fa’amuta ai loa lenei mataupu.

I fa’amaumauga a le fa’amasinoga o lo o taua ai e fa’apea,  o le aso 24 o Me 2014 sa maua ai e leoleo Filipo o ave ta’avale ae o lo’o se’i mo le 6 masina lona laisene ina ua ta’usala e le fa’amasinoga fa’aitumalo o ia i le moliaga o le ave ta’avale ‘ona.

Ua fa’atali nei Filipo mo le fa’ataunu’uina o lea poloaiga a le fa’amasinoga, pe afai ae ta’usala o ia i le moliaga o le ave ta’avale a o se’i lona laisene.