TU’UAIA SE ALI’I I LE FA’ATUPU VEVESI TOTONU LONA AIGA

E 41 tausaga o se ali’i mai Fagaalu na taofia e leoleo i le fa’aiuga o le vaiaso na te’a nei, ona o tu’uaiga i lona faia lea o ni gaioiga e save’u ai le nonofo filemu a tagata o lona aiga.

O le mataupu lenei na tofu atu i le Ofisa o Leoleo i Fagatogo, ina ua talosagaina e se tina talavou e 32 tausaga se fesoasoani a leoleo, ona o se vevesi o lo o tula’i mai i totonu o lona aiga, pe tusa lea o le itula e 2:41 i le vaveao o le aso Sa na te’a nei.

Na taua e le tina na a’afia e fa’apea, o le vevesi na amata e le ali’i ua molia, ina ua alu atu i totonu o lona potu ae fa’ateia o ia i lona alu atu o lo o i ai le ua molia i totonu o lona potu, ma fa’afuase’i ai loa ona oso atu le ua molia ma fusi o ia ma taumafai e kisi atu ia te ia, peita’i sa ia taumafai e una’i ese.

O le tina talavou na a’afia e nonofo ma le tama a le ali’i ua molia e pei ona taua i fa’amaumauga a le fa’amasinoga.

Ina ua iloa mai e le uso laititi a le ali’i ua molia le gaioiga a le ua molia o lo o fai atu i totonu o le potu, sa alu ai loa le ali’i laititi ma ta’u i lona tama, ma alu atu ai loa lona tama ma tau upu ma le ua molia, ma tula’i mai ai loa le vevesi.

Ina ua taunu’u leoleo ma taofi le ua molia i totonu o le ta’avale a leoleo, sa fa’alogoina le malosi o le manogi ‘ava malosi i le tino o le ali’i ua molia, ma i’u ina taofia ai loa o ia i le toese i le po lea ina ua mae’a ni isi o su’esu’ega sa faia e tusa ai o le mea sa tupu.

Na teena e le ua molia tu’uaiga fa’asaga ia te ia i le taeao ananafi ina ua tula’i i luma o le fa’amasinoga fa’aitumalo, ma ua poloaina nei o ia e aua nei ona toe taumafai e fa’afeso’ota’i lona mother-in-law lea na a’afia i ana gaioiga sa faia, ao faagasolo ai taualumaga o lana mataupu.

MOLIA SE ALI’I I LONA FA’AO’OLIMA I LONA TO’ALUA

E 32 tausaga o se tama talavou na taofia e leoleo i le fa’aiuga o le vaiaso na te’a nei, ona o tu’uaiga i lona fa’ao’olima lea i lona to’alua.

O lenei mataupu na tofu atu i le ofisa o leoleo i Tafuna, ina ua faila e le fafine na a’afia sana tagi fa’asaga i lona to’alua, i lona fa’ao’olima lea ia te ia ma folafola le fasiotiina o ia.

Na taua e le tina na a’afia i leoleo e fa’apea, o le vevesi na amata mai i se la taugaupu ma lona to’alua, ae na avea le le fiafia o le ua molia i ni fa’aupuga sa ia lafo atu ia te ia ma itu na aapa atu ai loa lona to’alua ma fasi loa o ia, e ala i lona po o ona foliga, toso lona lauulu toe oomi ona foliga.

Ina ua mae’a ona faia e le ua molia nei gaioiga uma i lona to’alua, sa ia tuua loa le latou fale i Fogagogo ae alu ese, e pei ona taua i fa’amaumauga a le fa’amasinoga.

Na talosagaina e le Ofisa o leoleo i Tafuna le fesoasoani a le Ofisa o Leoleo i Leone mo le tau sailia o le ua molia, ina ua masalomia o lo o nofo i lona uncle i se isi nu’u, ae i le taeao o le aso Gafua na te’a nei, 13 Oketopa 2014, na toe logo ai e le fafine le ofisa o leoleo i Tafuna, o lona to’alua lea ua toe fo’i atu i le latou fale i Fogagogo, ma aga’i atu ai loa leoleo ma pu’e fa’apagota mai le ua molia ma taofia ai i le toese i Tafuna.

O le taeao ananafi na tula’i ai le ua molia ma ia teena tu’uaiga fa’asaga ia te ia, ma ua toe tolopo nei lana mataupu e toe valaau i le vaiaso fou, ma le tuutuuga a le faamasinoga ua faasa ona ia toe taumafai e faafesootai lona toalua i so o se auala, sei vagana ua mae’a taualumaga o lana mataupu.