CARMEN HUNKIN

O le aso 28 Aokuso lea ua fa’atulaga e lau ai le fa’asalaga a Carmen Hunkin i luma o le fa’amasinoga maualuga, i le mae’a ai lea ona talia e le fa’amasinoga o se maliliega sa latou sainia ma le malo, lea ua ia tali ioe ai i le moliaga mamafa e tasi ae solofua e le fa’amasinoga isi moliaga o loo totoe i le pepa o le tagi sa fa’aulu e le malo fa’asaga ia te ia.

I le tali ioe ai o Hunkin i le moliaga o lona tagofia lea o itutinosa o se ali’i e talavou i lalo o le tulafono, sa ia taua ai e fa’apea, i se taimi o le masina o Oketopa 2013 e oo mai ia Iulai 2014, sa ia tagofia ai itutinosa o se ali’i e 16 tausaga matua, ona o lona naunau ia mafai ai ona fa’amalie lagona tu’inanau sa ia te ia.

MANU LEFATIA

O le aso 11 Aokuso lea ua faatulaga e faia ai le iloiloga faapitoa o le mataupu a Manu Lefatia, i le mae’a ai lea ona faila e lana loia fautua o se talosaga i le fa’amasinoga, ina ua tuana’i le taimi sa tatau ai ona tuu atu e le malo mau faamaonia faasaga i lenei mataupu.

Ua fa’alua ona valaau le mataupu a Lefatia i luma o le fa’amasinoga talu ona mae’a le ulua’i taimi na tula’i ai i luma o le fa’amasinoga maualuga, o faatonuina pea e le faamasinoga le malo ina ia tuu atu mau faamaonia o lenei mataupu i le itu tete’e, peita’i e oo mai lava i le iloiloga ananafi, e lei mae’a lava ona tauaao e Lefatia ma lana loia mau faaaonia mai le malo.

Na taua e le loia a le malo o Russel Smith i le taeao ananafi ina ua fesiligia e le faamasinoga le mafua’aga o le tuai ona tuu atu o mau faamaonia i le itu tete’e, o loo latou faatali pea i se ripoti mai le vaega a le FBI e tusa ai o ni isi o faamaumauga e tatau ona tuuina atu i le itu tete’e, peita’i e oo mai lava i le taimi nei e lei oo mai lava ia faamaumauga.

Na taua e Smith i le faamasinoga e faapea, e taua tele le maea o faamaumauga a le malo ina ia mafai ai ona tuuina atu mau faamaonia uma i le itu tete’e.

O le aso 25 Ianuari 2016 lea ua faatulaga e faia ai le faamasinoga autu o Lefatia,  peita’i o le aso 11 Aokuso lea ua faatulaga e toe valaau ai lana mataupu, ma o loo taofia pea o ia i le toese i le taimi nei e faatali ai le isi ana iloiloga lea ua fa’atulaga i le masina fou.

O Lefatia o loo tuuaia e le malo i moliaga o le faaoolima atoa ai ma le faaaoga faasolitulafono aupega, e mafua mai i le faalavelave lea na osofa’i ai e ni isi le ofisa o leoleo i Leone i le masina o Novema 2014.

E tusa ai ma faamaumauga a le fa’amasinoga, o Lefatia ma isi alii e to’atolu o loo tu’uaia fa’atasi i latou i lenei mataupu, i le mae’a ai lea ona fa’ailoa e ni molimau i leoleo lo latou faalogo o faamatala e isi alii sa i ai faatasi ma Lefatia lo latou osofaia o le ofisa o leoleo i Leone.

TALOSAGA  SOLOFUA MOLIAGA FA’ASAGA ALII FAAOOLIMA LANA UO TEINE

Ua taoto atu nei i se faaiuga a le fa’amasinoga maualuga le talosaga lea ua faila e le malo, e talosagaina ai ali’i fa’amasino mo se fa’aiuga e solofua ai moliaga fa’asaga i le ali’i lea o loo tu’uaia i lona fa’aoolima lea i lana uo tiene i le faaiuga o le tausaga e 2013.

O le mataupu o loo tuuaia ai e le malo le alii o loo molia, o loo aofia ai moliaga o le faaoolima i le tulaga lua, faaoolima i le tulaga tolu, atoa ai ma lona faia o ni gaioiga e save’u ai le nonofo filemu o tagata lautele.

I faamaumauga a le fa’amasinoga i le ulua’i taimi na latou failaina ai lenei mataupu i luma o le fa’amasinoga, sa latou taua ai le faaoolima o le alii o loo tuuaia i lana uo teine i totonu o se fale kalapu, e ala i lona savali atu ma toso mai lona ulu mai luga o le dance floor o loo siva ai ae tu’i ona foliga.

I faamaumauga a le faamasinoga o loo taua ai e faapea, e to’atolu molimau sa mafai ona latou molimauina gaioiga uma sa faia e le ua molia i lana uo teine, peita’i i le talosaga a le malo lea ua i luma o le fa’amasinoga, o loo taua ai e faapea, e to’alua molimau ua le mananao e molimau mo le malo i lenei mataupu, ona o lea ua la faailoa i le malo, e le moni faamatalaga o loo i totonu o le ripoti a leoleo. Sa la taua foi e faapea, e le’i faaoolima lava le ua molia i lana uo teine, e leai fo’i se vevesi na tula’i mai.

E oo lava foi i le tamaitai na aafia e pei ona taua e le malo i le latou faafinauga, e le o manao o ia e faia sana faamatalaga faasaga i le ua molia, ae o loo tatalo foi o ia talosia e le faaauau e le malo la latou tagi faasaga i le ua molia.

Ona o nei mafuaaga e tele, ua mafua ai loa ona talosaga le malo i le fa’amasinoga mo sana faaiuga e solofua ai le tagi sa latou ulua’i fa’aulu fa’asaga i lenei mataupu.

O le vaiaso fou lea o loo faatulaga e faia ai le faamasinoga autu o lenei mataupu.