TOE MOLIA JASON TE’I I LE FA’AMASINOGA

Ua toe a’afia fo’i le ali’i o Jason Te’i i le tulafono, ina ua taofia e leoleo o ia i le toese i Tafuna i le fa’aiuga o le vaiaso na te’a nei, e mafua mai i se vevesi na tula’i mai i Pagai, lea o lo o tuuaia ai o ia i lona fa’aleagaina lea o meatino a se aiga, atoa ai ma lona fa’ao’olima i se isi tagata.

Na taua e ni isi o le aiga o Te’i i leoleo e fa’apea, o le vevesi na tula’i mai ina ua fa’ateia le ua molia i le tauai e ni tagata o le latou fale, ao faia se taugaupu i le va o le ua molia ma lona to’alua, ma fa’asaga atu ai loa le ua molia ma tauai le fale o le aiga o lo o latou tuaoi, ma tula’i mai ai loa le vevesi.

Ae na taua e sui o le aiga na a’afia lo latou fale i lenei mataupu e fa’apea, na fa’ateia i latou ina ua togi atu e le ua molia ni ma’a ma taei ai tioata o le latou fale, ma mafua ai loa ona latou aga’i atu i luma e fesiligia le ua molia i le mafua’aga o le gaioiga sa ia faia, ae fa’afuase’i ai loa ona osofa’i e le ua molia se tasi o le latou aiga ma tulai mai ai loa le fa’alavelave.

Na taua e le molimau i leoleo lona vaaia o Te’i o ia tauaia ma’a aga’i atu i le latou fale, lea na fa’aleagaina ai tioata o le latou fale fou e le i leva ona fai.

O moliaga mama e fa ua tu’uaia ai e le malo ia Te’i e aofia ai le faatupu vevesi i nofoaga faitele, lua moliaga o le fa’aleaga meatotino i le tulaga tolu, ma le moliaga e tasi o lona tete’e atu lea i leoleo ao taumafai e pu’e fa’apagota o ia.

Ina ua loka e leoleo lima o Te’i ma tu’u o ia i totonu o le ta’avale a leoleo, e le gata sa ia palauvale i le alii na la vevesi, ae sa ia folafola i ai, e fa’atali pe a toe fo’i mai i tua, e le uma le mea sa tupu.

Talu ai o le tulaga i le faalavelave sa tulai mai, atoa ai ma le tulaga lea, o Te’i o lo o nofovaavaaia i luma o le fa’amasinoga, ua fa’atulaga ai loa e le fa’amasinoga le tupe e $500 e totogi ona fa’atoa mafai lea ona tatala Te’i i tua, e fa’atalitali ai talualumaga o lana mataupu fou lea ua fa’agasolo i luma o le fa’amasinoga i le taimi nei.

FA’AI’U INUGAPIA A NI ALI’I SE TO’ALUA I FUSUAGA

O le isi to’atasi o le to’alua lea na fa’ai’u le la inugapia i se fusuaga i le fa’aiuga o le vaiaso na te’a nei, ua toe tatala i tua e le fa’amasinoga fa’aitumalo i le taeao ananafi, i le mae’a ai lea o po e lua na taofia ai o ia i le toese i Tafuna, ona o tu’uaiga i lona faia lea o ni gaioiga e save’u ai le nonofo filemu o tagata lautele.

O le mataupu e pei ona molia ai Ioane Faima e le malo, na tula’i mai i le po o le aso To’ona’i na te’a nei i Aua, ina ua fa’ai’u le la inugapia ma lana uo e igoa ia Asalemo i luga o le fale o se isi aiga, ma vili ai loa e le aiga lea leoleo mo se fesoasoani.

Na avea le laulau vavale o le to’alua lea atoa ai ma le leo tetele ma itu na feala ai aiga tuaoi i le leva o le po, i lo latou fia iloaina lea o le vevesi o lo o tupu.

Na taunuu leoleo ma latou pu’e faapagota mai ai Faima, ae lei maua Asalemo ina ua sola ese ina ua ia vaaia leoleo ua aga’i atu.

Na taua e Faima i leoleo e fa’apea, o le vevesi na mafua mai ina ua fesili atu Asalemo ia te ia, po o fai se la faanunumi ma lona afafine, ae sa tali atu iai e leai, ae na avea lea ma itu na ita ai loa lana uo ia te ia ma amata ai loa le la vevesi.

E lei mafai e leoleo ona fa’aauau le latou sailiga mo Asalemo i le po lea, ina ua pogisa ma vaaia fo’i le le saogalemu mo leoleo.

FOLAFOLA LE FASIOTI O LONA TUAOI

O le ali’i lea na ia fa’aleaga meatotino a lona aiga ina ua ova le ‘ona ma laulau vavale solo i lona to’alua, sa ia folafola lona fasiotia o le alii la te tuaoi lea na viliina le ofisa o leoleo ma mafua ai ona loka o ia, pe afai ae tatala mai i tua i le toese i Tafuna.

Na teena e le alii o Losi Laumatia le moliaga o le fa’atupu vevesi i nofoaga faitele, ina ua tulai i luma o le fa’amasinoga fa’aitumalo i le taeao ananafi, e mafua mai i le fa’alavelave lea na ia faia ai ni gaioiga e save’u ai le nonofo filemu a tagata lautele i le fa’aiuga o le vaiaso na te’a nei.

O le afiafi o le aso To’ona’i na te’a nei e pei ona taua i fa’amaumauga a le fa’amasinoga, na vili ai e se molimau le ofisa o leoleo i Tafuna mo se fesoasoani, ina ua fa’alogoina le laulau vavale mai o le alii o Laumatia i totonu o lona fale, ma tauai solo meatotino i totonu ma fafo o le fale.

Na mafai e le molimau ona ia pu’eina i lana telefoni ni isi o gaioiga a le ua molia sa faia, lea e aofia ai le taimi sa ia lafo ai upu masoa.

Na fa’afuase’i ona ulufale leoleo i totonu o le fale ma latou pu’e fa’apagota le ua molia ma auina atu loa i totonu o le ta’avale a leoleo sa paka i fafo, ma o iina na lafo ai loa e le ua molia upu tau fa’afefe i le alii la te tuaoi sa vilia leoleo, e maua lona iuga pe a tatala mai o ia i tua.

O isi poloaiga ua tatala ai i tua Laumatia e aofia ai le faasa lea ona ia toe tagofia le ‘ava malosi, fa’asa ona ia toe faia ni gaioiga e save’u ai le nonofo filemu i totonu o lona aiga ma tuaoi, ua fa’asa fo’i ona ia toe faia ni uiga tau fa’amata’u i lona aiga.

O le vaiaso fou lea ua fa’amoemoe e toe tula’i ai le ua molia i luma o le fa’amasinoga fa’aitumalo.