TELE’A VAIFALE

Ua toe tolopo mo le vaiaso fou le mataupu a Tele’a Vaifale lea na fofogaina i luma o le fa’amasinoga i le vaiaso nei, ina ua teena e le ali’i e 23 tausaga le matua se tasi o moliga sa latou malilie ma le malo e tali ioe i ai.

Na fautua le afioga i le ali’i fa’amasino sili ia Michael Kruse i le loia fautua a Vaifale, ina ia toe fa’amanino atili i le ua molia tuutuuga uma o le maliliega sa latou sainia ma le malo, ina ia o o atu i le aso lea ua toe tolopo i ai lana mataupu ua malamalama lelei o ia i vaega uma o le maliliega, ae afai e leai, o le a fa’atulaga loa le aso e faia ai lana fa’amasinoga autu.

Na ulua’i tu’uaia e le malo le ali’i o Vaifale i moliaga mamafa e aofia ai le faiaiga ma se teineititi e laititi i lalo o le tulafono, faia o gaioiga faa feusuaiga, tagofia o itutinosa o se teineititi, faia o amioga faasotoma, taofia faapagota o se tagata i se auala fa’asolitulafono, atoa ai ma le moliaga mama e tasi o le fa’ao’olima i le tulaga tolu.

I lalo o le maliliega lea ua sainia e Vaifale ma le malo, ua ia sauni ai e tali ioe i moliaga mamafa e tolu  o le faia o amioga fa’a feusuaiga, tagofia o itutinosa o se teineititi, ma lona taofia fa’apagota o se tagata i se auala fa’asolitulafono.

Ina ua fesiligia Vaifale e le fa’amasinoga i lana tali i moliaga e tolu, sa ia tali ioe i le moliaga o le faia o amioga fa’a feusuaiga ma le tagofia o itutinosa o se teineititi, ae tali tete’e i le moliaga o lona taofia fa’apagota lea o se tagata i se auala fa’asolitulafono.

Ina ua toe fesili Kruse ia Vaifale pe aisea ua ia tali tete’e ai i le moliaga lea, na tali le ua molia, na te le i fa’atinoina le solitulafono lea.

O lo o taofia pea Vaifale i le toese i Tafuna e fa’atali ai le vaiaso fou lea ua fa’atulaga e toe fofogaina ai lana mataupu.

O tu’uaiga fa’asaga ia Vaifale na afua mai i le fa’alavelave lea na tula’i mai i le masina o Iuni 2014, ina ia ua fa’amalosia se teineititi e 14 tausaga le matua na alu e saili lona uso matua i se taimi o le po, lea na ia toso fa’amalosi ai i se togavao ma fai i ai uiga mataga i se fale tu’ufua sa latalata ane i ai.

FILISI FINAUGA

O le ali’i lea na vaovao ma se agaese i le tamaloa la te tuaoi, e mafua mai ina tula’i mai se vevesi i le latou tuaoi, ua molia nei e le malo i le moliaga mama o le fa’atupu vevesi i nofoaga faitele ma le faamoemoe, e ono faila e le malo ni isi moliaga fa’aopoopo fa’asaga ia te ia, pe afai e mae’a suesuega o lo o fa’asolo fa’asaga i lenei mataupu.

Na taua i fa’amaumauga a le fa’amasinoga e fa’apea, sa ‘ona le ali’i o Filisi Finauga i le taimi na tula’i mai ai le fa’alavelave e pei ona molia ai o ia.

O se vevesi na tula’i mai i le tuaoi a Finauga ma le tama na a’afia, ma vaovao ai loa le ua molia ma le agaese i le tama na a’afia ma lona aiga.

Ua poloaina e le fa’amasinoga fa’aitumalo le ali’i o Finauga e aua nei ona toe taumafai e fa’afesootai le aiga tuaoi na latou vevesi, aua fo’i nei ona toe taumafai e soli se isi tulafono a le malo, a ia avea o ia ma tagatanuu lelei e tausisi i tulafono uma a le malo.

O le vaiaso fou lea ua fa’atulaga e toe tula’i ai Finauga i luma o le fa’amasinoga, ma iloa ai loa pe i ai ni isi moliaga fa’aopoopo e ono faila fa’asaga ia te ia.