TOLOPO LE LAUINA FA’ASALAGA LEPUAI

Ua talia e le fa’amasinoga maualuga se talosaga na faila e le loia a le malo ia Tiffany Oldfield, mo se avanoa e toe tolopo ai le lauina o le fa’asalaga a le ali’i o Lepuai Allen Mayer lea na fuafua mo le aso 8 Ianuari 2015, ona o ni isi o mafua’aga tatau i le le avanoa lea o loia.

Na taua e Oldfield i lana talosaga sa faila i le fa’amasinoga e fa’apea, talu ai o se aoaoga mo loia e faia i Amerika i le ogatotonu o le masina o Ianuari 2015, ua mafua ai ona ia manatu e talosagaina le toe tolopo o le lauina o le fa’asalaga fa’asaga i lenei mataupu, ina ia maua ai le avanoa e auai ai i lea fonotaga mo loia.

Na taua e le tama’ita’i loia le mae’a lea ona ia talanoa ma le loia a Lepuai, susuga Marcellus Tala Uiaalelei i luga o le imeli e tusa ai o lenei mataupu, ma ua ia fa’ailoa mai fo’i lona le tete’e i le talosaga e pei ona tu’uina atu.

O le susuga a Lepuai, lea sa avea muamua ma pule o le lala o le kamupani va’a o le Pacific Shipping Services (PSS), ua ta’usala e le fa’amasinoga maualuga i le moliaga mamafa o lona fa’aaoga fa’asolitulafono lea o se vaega tupe tele e tusa ma le $200,000 sa tu’uina atu na te va’ava’aia ma tausia lelei.

Na ta’utino Lepuai i luma o le fa’amasinoga e fa’apea, i se taimi o le masina o Iulai 2012 e o o atu ia Oketopa 2013, a o avea o ia ma pulesili o le PSS, sa ia aoina mai ai tupe a le kamupani ma teu i totonu o se teugatupe sa alu i lalo o le igoa o le kamupani i le faletupe o Hawaii, ae na o ia sa saini ai i lea teugatupe.

Ina ua fesiligia e le fa’amasinoga le ua molia i le aso na talia ai le latou maliliega sa sainia ma le malo, sa ia ta’utino ai, e silia i le $200,000 le tupe a le PSS sa ia fa’aaogaina e aunoa ma se fa’atanaga a le kamupani.

O le aso 22 Ianuari 2015 lea ua toe fa’atulaga e lau ai le fa’asalaga o Lepuai, lea o lo o tumau pea tuutuuga o lo o tatala ai o ia i tua mai le fa’amasinoga.

RICHARD FILIPO

O le vaiaso na te’a nei na faila ai e le malo le moliaga mamafa o le ave ta’avale a o se’i le laisene fa’asaga ia Richard Filipo, e mafua mai i le fa’alavelave lea na maua ai o ia e leoleo o lo o ia fa’afoeina se ta’avale i luga o le auala i Nuuuli i se auala saoasaoa, ae toe leai fo’i sona laisene sa tauaveina i lea aso.

Na avea le alu saoasaoa o le ta’avale na fa’afoe e le ua molia ma itu na taofi ai loa e leoleo sa tiute i luga o le alatele le ta’avale i lea aso, se’i fesiligia le mafua’aga o le soona alu saoasaoa.

A o fesiligia e leoleo ia Filipo, na fa’amaonia ai o lana laisene ave ta’avale o lo o se’i e le fa’amasinoga fa’aitumalo mo le 6 masina, talu mai le masina o Aokuso, e mafua mai ina ua ta’usala o ia e le fa’amasinoga i le moliaga o le ave ta’avale ‘ona.

O le solitulafono o le ave ta’avale a o se’i le laisene, e mafai ona fa’asala ai se tasi i le toese i Tafuna mo le umi e le silia i le 5 tausaga, pe fa’asala fo’i i le salatupe e le sili atu i le $5,000, ae fa’amalosia ai le tuliina o aso e 90 i le toese.