19 SIKOLASIPI OFOINA E LE MALO MO POLOKALAMA JSA

E to’a 19 tama ma teine aoga sa faauu mai i Aoga Maualuluga i le atunuu i le vaiaso na te’a nei ua faamanuiaina i avanoa sikolasipi mai le malo o Amerika Samoa, e aooga fua ai i Iunivesite ma Kolisi i totonu o Amerika faapea ai ma Saina.

O le polokalame o avanoa sikolasipi a le malo mo fanau aoga, o lo o faatupeina mai e le Matagaluega o le Initeria, ma o se tasi lenei o polokalame o lo o faaauau pea e le malo i tausaga aoga taitasi, ina ia maua ai avanoa e ulufale atu ai fanau i le isi laasaga o tulaga tau i aoaoga.

O le lisi la lenei o i latou ua faamanuiaina i avanoa sikolasipi a le malo, faatasi ai ma aoga o le a aooga ai i le isi tausaga aoga o lo o sosoo nei.

O le ulua’i tausaga fo’i lenei ua mafai ai ona auina atu fanau e aoaoina i totonu o le malo o Saina i lalo o avanoa sikolasipi a le malo.

SU’EGA ULUFALE AOGA MATATA ESEESE

Mo le vasega o matua o lo’o i ai le fa’anaunauta’iga e fia fa’aulu lona alo i le a’oga maualuga a Nuuuli Polytech - po’o le a’oga Matata Eseese a le tatou Malo, ua fa’atulaga aso nei i le amataga o le vaiaso a sau, e faia ai su’ega ulufale, e mua’i taga’i toto’a ai le Fa’auluuluga ma le Aufaigaluega a lea A’oga, i se agava’a o lou alo a’o le’i taliaina o ia e lesitala mo le tausaga a’oga o lumana’i.

- Iuni 11, 2013 ua fa’atulaga mo le fanau mai le itu i sisifo o le tatou malo, e afua atu i Tafuna se’ia pa’ia Fagali’i.

- Iuni 12, 2013 ua fa’atulaga mo le fanau fia ulufale mai Nu’uuli e o’o lava i Onenoa po’o le itu i sasa’e atoa o le motu o Tutuila aofia ai ma le Manu’atele.

- O le aso 13 & 14 Iuni, 2013 o le a fa’atulaga e faia ai le iloiloga ma le togia o su’ega a le fanau, ma o le a faia ai fa’atalanoaga ta’itasi o le fanau filifilia i le Ofisa o le a’oga.

TAUTUA FALE TALAVAI & FA’INIFO

Ua ese le taumafaiga lea ua faia i le taimi nei ina ia mafai ona fa’aitiitia atili le umi o tatalia avanoa e va’aia ai e foma’i Fa’inifo le mamalu lautele, ae maise fo’i o le talaina mai o Vai ma Fuala’au mai le Faletalavai.

Mo le Faletalavai, ua augani mai lea Auaunaga ina ia vala’au atu pe afai e te mana’omia le toe fa’atumu o au fuala’au fa’atulaga masani. Afai e te vala’au atu i le telefoni e mana’omia ona e fa’ailoa atu lou suafa, lau numera falema’i, le igoa o au fuala’au ma le tele, ma e tatau fo’i ona tu’u ai ma le numera o lau telefoni e maua ai oe i taimi uma.

O le a fa’ato’a mafai ona piki au fuala’au i le aso e soso’o ai, pe a ta le 10:00 i le taeao. Afai o le aso Faraile lea ua e vala’au mai ai, e fa’ato’a maua au fuala’au i le aso Gafua, 10:00 i le taeao.

O le telefoni e fa’aaogaina: 633-1222 Ext: 555. E ese mai lea ua mafai fo’i ona e fa’aaogaina mai lau Emeli po’o le Upega Tafa’ilagi: rx.refill@lbj.as

Mo le tautua lautele i le Fale Fa’inifo, ua fautuaina ina ia vala’au muamua mai mo lea tautua a’o le’i e malaga mai i le falema’i.  Afai e te le o tigaina i lou oloa, ia vave la ona e vala’au ma fa’atulaga ai lou avanoa mo so’o se foma’i nifo lava o galue.

E mana’omia ona e silafia lou numera falema’i, o lou suafa ma lou aso fanau e fa’amauina e i latou, fa’atasi ai ma le numera telefoni e maua ai oe i taimi uma. Peita’i, afai lava ua tigaina se tasi i lona oloa, ma e tatau lava ona va’aia se foma’i, e sau pea i lea itu o le tautua, ma fa’atali ai sou avanoa, pe afai o le a i ai se tasi na fa’atulaga sona taimi mo le foma’i, ae ua le o’o atu.