LOKA NI FAFINE INA UA INU I LUGA O LE VA’ALELE

E to’alua ni fafine nai Kanata na taofia e leoleo i le malae va’alele i Kanata lava i le taeao ananafi, ina ua maua sa inu i luga o le va’alele lea na latou malaga mai ai ma tagata e to’a 80 mai le atunuu o Cuba. Na taua i se ripoti e fa’apea, e le i umi ona tuua e le vaalele le malae vaalele i Cuba, ae amata loa le fiafia a le to’alua lea, ina ua o i totonu o se fale taele o le vaalele ma inu toe ulaula ai.

O LE A SE FA’AIUGA A OBAMA MO LE ISIS?

Ao faatali ai le lalolagi ma tagata uma o Amerika i se fa’aiuga a le alii peresetene o Barack Obama i le vaega faatupu fa’alavelave mai Isalama, le ISIS, na taua e Obama i lana saunoaga i le taeao ananafi, e le o mautu se faaiuga i le taimi nei mo le vaega a le ISIS i Suria. Sa ia taua i tusitala e faapea, ua uma ona ia faatonuina ana faufautua maualuluga ina ia tapena se fuafuaga faataoto mo le ISIS. Sa ia faailoa i tagata Amerika le tatau lea ona mautinoa le gaioiga e tatau ona faia mo le ISIS, ae tatau foi ona fesiligia se fautuaga mai le Konekeresi i le gaioiga tonu e tatau ona faia. O le vaiaso na te’a nei na amata tu’i fesili ai e tusitala i Amerika ia Obama mo se fa’aiuga fa’asaga i le ISIS, i le mae’a ai lea ona fa’alavelave matuia lea na fasiotia ai e le ISIS se alii tusitala mai Amerika o James Foley, ina ua latou aveese lona ulu (tulou).

TALOSAGA SE TAMAITAI I LE ISIS TATALA TAGATA AMERIKA O LO O TAOFIA

Ua talosagaina e se tamaitai mai Pakistan le vaega a le ISIS i Suria o lo o latou taofia faapagota ni tagata Amerika, ina ia tatala ma fa’asaoloto i latou uma, e le mana’omia ni vevesi e tula’i mai ona o le igoa o lona uso o ‘Aafia’. Na taua e le tamaitai o Fowzia Siddiqui i se faatalatalanoaga ma le CNN e fa’apea, talu ai e le o ni tagata faatupu faalavelave lo latou aiga, ua latou talosagaina ai le tatau lea ona faasaoloto tagata Amerika uma o lo o taofia faapologa e le ISIS. O Fowzia, o le uso lea o le tamaitai o Dr. Aafia Siddiqui o lo o tuli sona faasalaga faafalepuipui i totonu o Amerika mo le 86 tausaga le umi, ina ua tausala o ia i le tausaga e 2010 i moliaga mamafa e aofia ai lona taumafai e fasioti ni leoleo sa latou taofia faapagota o ia. O Dr. A’afia, sa faaigoaina o ia e le vaega a le FBI o ‘Lady al-Qaeda’, ma o lo o talosagaina e le vaega a le ISIS le malo o Amerika e tatala atu i tua Dr. Aafia ona faatoa faasaoloto lea o isi tagata Amerika o lo o latou taofia faapagota.

MALILIU NI TURISI INA UA FETOAI NI PASI LA’U PASESE

E to’a 9 turisi na maliliu ina ua fetoai ni pasi se lua i le itu i matu o Aikupito i le taeao ananafi. Mai le to’a 38 o tagata na maliliu i lenei fa’alavelave, o le to’a 9 o i latou o tagata turisi na malaga e fia maimoa i vaega o le atunuu. Na taua i se ripoti e fa’apea, e foliga mai e masani alii ave pasi sa faafoeina pasi na fetoai, ma o lo o tau sailia e leoleo i le taimi nei ali’i ave pasi, lea na sosola i le taimi na mae’a ai ona tupu le fa’alavelave.

TAPUNI LALA E 12 O LE FALE’AIGA MCDONALDS I RUSIA

E 12 lala o le faleaiga lauiloa mai Amerika o le McDonalds ua tapunia i vaega eseese o Rusia, ona o tuuaiga i lo latou le usitaia o tulafono tau soifua maloloina, peitai na taua i ni ripoti e faapea, e masalomia o vevesi o lo o tulai mai i le va o Rusia ma isi malo aufaatasi e aofia ai ma Amerika, ua mafua ai ona tapunia faleaiga nei. O le tausaga e 1990 na faatoa tatala ai i Rusia se lala o le faleaiga a le McDonalds, ma ua vaaia le to’atele o tagata malaga e fiafia i ai.

fa’aliliu S.A.M