Ads by Google Ads by Google

Tala o Faamasinoga

FELETI NIUE

O le aso Faraile o le vaiaso nei lea ua faatulaga e faataunuu ai le uluai iloiloga o le mataupu a le alii o Feleti Niue, ona o tuuaiga i lona le usitaia lea o se tasi o poloaiga o lana faanofovaavaaia mai le Faamasinoga Maualuga.

O lea iloiloga na afua mai i se poloaiga sa tuuina atu e le faamasinoga i le masina o Iulai na tea nei, e saili mai ai Niue ina ua le oo atu i le taimi na fofogaina ai lana iloiloga i luma o le faamasinoga.

O lea iloiloga e fia iloa ai e le faamasinoga pe o usitaia e Niue poloaiga uma o lana faanofovaavaaia sa tuuina atu i le taimi na lau ai lona faasalaga, ina ua tausalaina o ia i le solitulafono o lona fesoasoani lea i lona tama i le umia o vaega o le laau faasaina o le mariuana, ma faasala ai o ia i le toese mo le umi e 20 masina, o se tasi lea o tuutuuga o lana faanofovaavaaia e 5 tausaga.

O se tasi o poloaiga sa tuuina atu e le faamasinoga ia Niue e usitai i ai, e aofia ai le alu e vaai le Ofisa faanofovaavaaia faatasi i le masina, ma ia oo atu foi i luma o le faamasinoga i le taimi e valaauina ai lana iloiloga, peitai ina ua magalo le ua molia mai le toese, e le gata e lei oo atu e vaai le Ofisa Faanofovaavaaia, ae lei oo atu foi i le taimi na valaauina ai lana mataupu.

Ua toe taofia nei i le toese Niue e faatali ai lana iloiloga lea ua faatulaga i le faaiuga o le vaiaso nei.

MICHAEL AGASIVA

Ua taoto atu nei i se faaiuga a le faamasinoga maualuga le talosaga na faaulu e le alii o Michael Agasiva, e talosagaina ai le faamasinoga ina ia toe iloilo lana faasalaga ua tuuina atu ia te ia, atoa ai ma le isi talosaga mo le toe faia lea o se isi ana faamasinoga fou.

I le maea ai ona faafofoga e le faamasinoga i manatu mai itu e lua o lenei mataupu, na tuuina mai ai loa lana faaiuga ina ia taoto atu talosaga sei iloilo e le faamasinoga ona faatoa tuuina mai ai lea o sana faaiuga tusitusia i se taimi o i luma.

O talosaga a Agasiva ua i luma o le faamasinoga, na faia ina ua faasala e le faamasinoga o ia na te tuliina le umi e 5 tausaga i le toese i Tafuna i le masina na tea nei, ina ua tausala e le faamasinoga o ia i le solitulafono o le faaoolima i le tulaga lua, ona o se faalavelave na tulai mai i le aso 29 Setema 2009 i Amaluia, lea sa ia faaaogaina ai se agaese e faaoo ai manu’a i le alii na aafia i lenei mataupu.

Sa tumau pea le tetee o Agasiva i lea tuuaiga mai lava i le taimi na tulai mai ai lenei faalavelave seia oo lava i le taimi na lau ai lona faasalaga.

I faamaumauga a le faamasinoga na taua ai e faapea, o se feeseeseaiga i le va o le ua molia ma le alii na aafia, na mafua ai loa ona faaaoga e le ua molia le pito mafolafola o le agaese e sasa ai le na manu’a, ma o ni tuuaiga na matua teena e Agasiva.

O loo taofia i le toese Agasiva mo le tuliina o lana faasalaga e faatali ai se faaiuga o lana talosaga lea ua i luma nei o le faamasinoga.

O le tamaitai loia sili lagolago ia Cecilia Reyna o loo tulai mo le malo ae o Sharron Rancourt lea ua tulai mo Agasiva i lenei mataupu.

NOFOVAAVAAIA SE ALII TALAVOU

O le alii e 20 tausaga le matua lea na ia aveina le taavale lea na oso i tua ma le auala i le po o le aso 30 Tesema i Tafuna ma manu’a ai se vaega o lona tino, ua faamalumalu le tuuina atu o ia i le toese mo le 90 aso, ae ua faanofovaavaaia o ia mo le 24 masina  i lalo o poloaiga a le faamasinoga.

O nisi o ia poloaiga e aofia ai lona totogiina o le salatupe e $300, ina ua faamaonia le  moliaga o le ave taavale ‘ona, atoa ai ma le inupia ae lei atoa le 21 tausaga le matua. O se tasi lenei o alii sa taofia i le taimi o poloka a leoleo i aso malolo na te’a atu nei ina ua tulai mai ai se faalavelave tau taavale i le taavale sa ia aveina.

Na faailoa e le alii faamasino o John Ward II i le alii lea, o le ‘ava malosi e le o se uo lelei lea ia te ia, e le gata e sese ai ana faaiuga, ae i’u ina ma’imau ai ma lona ola pe afai ae faaauau pea ona ia faia le solitulafono o le ‘ona ma alu i le taavale.

Na faatoese le ua molia i le faamasinoga ma lona aiga e tusa ai o lana solitulafono sa fai, ma ia tautino ai o le a le toe tulai mai lea solitulafono i le lumanai, peitai na  saunoa Ward, e le o upu e taua ae manaomia le tautala ma savali ai.

O nisi o tuutuuga o lana faanofovaavaaia e aofia ai le faasa lea ona ia toe  aveina se taavale mo le 12 masina, faasa foi ona ia toe tagofia le ava malosi.