FILIFILIA LE TAITAIFONO FOU O LE EFKS

O le aso Faraile na sei mavae atu nei na maea ai le Fonotele i Malua ma na filifilia ai le susuga i le Toeaina ia Tavita Roma e avea ma Taitaifono fou o le Ekalesia Faapotopotoga Kerisiano i Samoa. Ua suia nei e ia le susuga i le Toeaina ia Tautiaga Senara sa seei muamua i le tofi, lea ua filifilia e avea ma Sui Taitaifono.

O tausaga taitasi e palotaina ai le tofi sui taitaifono ae see le sa seei ai i le tofi taitaifono. O i latou sa fai i ai le filifiliga a le Au Toeaina e aofia ai le susuga i le Toeaina ia Tautiaga Senara lea na maua palota e 452, ma le susuga i le Toeaina ia Solomona Tuatagaloa na maua palota e 208. E toa 10 i latou sa faia i ai le filifiliga ma sa aofia ai le minisita o Faatoaga ma Faigafaiva, le afioga Le Mamea Ropati Mualia.

O le Taitaifono fou ua i ai nei, le susuga i le Toeaina ia Tavita Roma o lo o tausi nuu nei i le afioaga o Salailua ma ua silia ma le 20 tausaga o galulue ai o ia ma le faletua i lea afioaga.

LUA OSOFAIGA A LEOLEO MO FUALAAU FAASAINA I LE ASO E TASI, TO’A 10 UA MOLIA

E silia ma le toa 50 ia malu o le malo sa auai i ni osofaiga se lua mo fualaau faasaina i le taeao o le aso Faraile na sei mavae atu nei lea na molia ai tagata e to’a 10. O le tasi o ia osofaiga lea na lipotia atu i a tatou Tala Mai Samoa I le aso ananafi i le maketi i Fugalei i le lotoa a Toleafoa Faafisi ma atufalega o lo o sosoo atu ai lea sa pueina ma molia ai e leoleo ni tagata e toatolu.

O le isi osofaiga na faatinoina i le afioaga o Magiagi ma e toafitu i latou na molia ai. Mai le to’a 10 ua molia, e toalua o ni tamaitai, e taitasi mai i ia nofoaga. Na faaalia e se tasi o sosia o faamatalaga, o nei osofaiga na faatino e leoleo ina ua logoina i latou e se tagata o lo o faatauina mariuana i ia nofoaga.

E pei ona silafia, e le o toe faia ni feiloaiga po o ni faatalatalanoaga a leoleo ma le au tusitala ona o se fautuaga mai le alii palemia, ae ua nao pepa o faamatalaga e saunia e leoleo e fua i fesili a le au tusitala e imeli atu, e faamatuuina faalauaitele i le au tusitala.

TOE FOI MAI LE MALAGA A FAUMUINA TIATIA LIUGA MAI SAINA

O se taimi o le faaiuga o le tausaga nei e lea o lo o I ai le fuafuaga a le malo e amatalia ai loa galuega mo le fausia o le maota fogafale 15 a le malo i le nofoaga o lo o i ai nei le fili maketi Savalalo.

O le vaiaso ua tuanai na taunuu manuia mai ai i fanua le faigamalaga a le minisita o Tupe, le afioga Faumuina Tiatia Liuga ma lana au malaga lea na afea ai le malo Saina e faatalamoa le faatinoga o lea atinae, i se tau aofai pe tusa ma le $55 miliona tala. Na saunoa Faumuina, o lo o talia nei se manatu o le malo Saina i lenei talosaga a le malo Samoa, ma o se taimi o le faaiuga o le tausaga o le a amatalia ai loa lea galuega tele.

MOLIA LEMOLI NIKO I LE FASIOTI TAGATA I LE MATAUPU O LE AUIVI NA MAUA I FALEASIU

O le vaiaso nei na faamaonia ai i luma o le Faamasinoga Maualuga e tauala i faatonu e toafa na filifilia le moliaga o le fasioti tagata faamoemoeina faasaga ia Lemoli Niko, o se tasi o i latou e toalima ia na molia i le mataupu lea na maua ai ni ponaivi o se tagata soifua i le afioaga o Faleasiu i le tausaga e 2011.

Ua faamaonia lea solitulafono faasaga ia Lemoli Niko ma ua faasalaina ai nei o ia i le solo atoa i le toese. O lea mataupu ua lata i le fa vaiaso o suesueina i luma o le Faamasinoga. O le tausaga e 2010 na tulai mai ai lenei faalavelave, ao le tausaga e 2011 faatoa maua ai le auivi o le alii na fasiotia e le ua molia ma amata sailiili ai loa lea mataupu.

TUUFAATASIA KONESETI FAAPITOA FESOASOANI MO HARRY MILLER

Ua fuafuaina se koneseti faapitoa e aloaia ai se tasi o alii musika iloga o le atunuu o lo o faataotolia nei i Niu Sila i le faamai o le kanesa o le mama, le susuga Harry Miller, ma saili ai se seleni e fesoasoani i le totogiina o ona togifitiga. O lea koneseti o lo o faamoemoe e faataunuuina i le aso 3 o Iuni, 2013, le aso malolo o le Tutoatasi, i le faletalimalo o le Manumea Hotel i Vailima.

O lo o tuufaatasia lea koneseti e susuga Mac Toomalatai ma Etene Fau Sa’aga o le faili o le Y-Not ma Apulu Lance Polu o le faili o le Tama Uli. Na muai iloa ua aafia le susuga Harry Miller i le kanesa o le mama, ina ua toeititi a matapogia o ia ao tata o ia i le tatalaga o le Vaiaso o Aoga Katoliko i le malumalu o le Ekalesia Katoliko Aiga Paia i Amerika Samoa i le aso 27 o Ianuari. Sa auina atu o ia i le falemai ma iloa ai i suesuega a fomai, ua tuga le sosolo o le kanesa i ona mama, ma sa auina atu loa o ia i Niu Sila mo suesuega faaopopo ma iloa ai o lo o aafia foi lona fai’ai i se tuma.

E pei ona silafia, o lenei tamalii e soifua mai i se aiga musika ma sa amata tata mai o ia ma lona tua’a ua faiilagi le folauga, le susuga Willie Miller faapea ona uso o Latu ma Maua.

Lilomaiava Andrew Fa’asau, Naenae Productions