TAMAITAI FAILAUTUSI AOAO O LE FORUM

I se gaioiga e lei faatinoina muamua i le tala faasolopito o le fono a taitai o atunuu o le Pasefika, ua palotaina nei e taitai o lo o auai i le fono lona 45 a le Forum o lo o usuia i Palau se tamaitai e avea ma failautusi aoao o le faalapotopotoga, e faauluulu i ai lona ofisa autu i Suva i Fiti.

O le tamaitai ua filifilia o Dame Meg Taylor o Papua Niu Kini, ma o le a ia suia le tofa Tuiloma Neroni Slade, lea ua see ese i le maea ai o le 6 tausaga o ia tauaveina lea tofiga. E toafa ni alii sa latou tauva mo lea tofiga taualoa. Na faaalia e le peresetene o Palau, o ia foi o le taitaifono e faapea, o lea filifiliga na autasi uma i ai sui usufono lea o lo o aofia ai le alii palemia, le susuga Tuilaepa Lupesoliai Sailele Malielegaoi.

Na faaalia foi le agaga fiafia o le palemia o Papua Niu Kini i lea filifiliga ma na ia taua, e tele le tomai ma le agavaa o Dame Meg Taylor i mataupu faavaomalo aua sa avea o ia ma amepasa o Papua Niu Kini i Malo Aufaatasi, ma sa ia tauaveina foi le tofi o le Komesina o Sulufaiga o le Faalapotopotoga o Tupe Faavaomalo (IFC) ma le Faletupe o le Lalolagi.

FAATAITAI SAILINI FAAILO

O le itula e 3 i le afiafi o le aso Faraile na sei mavae atu nei na faia ai le faataitaiga e tatala aloaia ai le fa’aaogaina o sailini mo lapataiga o faalavelave matuia i itumalo o lo o faatutu ai sailini e aofia ai Aleipata Itupa I Luga, Aleipata Itupa I Lalo, Lepa/Saleapaga, Lotofaga, Falealili, Siumu, Safata, Lefaga ma Faleaseela ma Aiga I le Tai.

E 25 sekone na faa’e’e ai ia sailini. Sa faataitai muamua ona faa’e’e ia sailini taitasi i le aso Lulu ma le aso Tofi mo le faamoemoe i le aso Faraile.

O le aso Gafua o le vaiaso a sau, le aso 4 o Aukuso, o le a amatalia aloaia ai faataitaiga tai masina o sailini i le itula e 3 I le afiafi mo le 25 sekone.

MOLIMAU ALII NA SAO MAI LE FAALAVELAVE

O le vaiaso nei na molimau ai le alii na faasaoina mai le faalavelave na maliliu ai ni alii se toalua i le tausaga na te’a nei, ma na ia teena ai le folasaga a le loia a le tamaitai o lo o tuuaia i lona aveina o le taavale, o Leslie Kohlhase, e faapea o ia na aveina le taavale. Na faamatala e le alii o Faatoia Tupu, 21 tausaga o Sinamoga e faapea, o Leslie lava na ia uliina le taavale ina ua latou o ese mai le lotoa o le kamupani o le Le Well lea sa fai ai le latou inuga pia ina ua tapunia falekalapu i le po na tupu ai le faalavelave.

Na molimau Faatoia, o le isi alii ua maliu o Thesaurus Heather sa nonofo ma Leslie i luma o le pikiapu, ao laua ma le isi alii ua maliu o Jerry Risale sa la nonofo i le keli o le pikiapu. Fai mai a ia, sa muamua tuu se tasi alii i luma o le faleaiga o le Treasure Garden i Savalalo faatoa agai atu ai loa i Vailoa, Faleata lea na lavea ai le taavale. Peitai, ina ua suesue lea alii e le loia a Leslie, le susuga Leiataualesa Daryl Clarke, na faaalia e le alii loia e faapea, o lo o i ai le molimau sa i ai i le taimi na tu ai le taavale i luma o le Treasure Garden.

Na saunoa Leiataualesa, na vaaia e se alii sekulati o le Treasure Garden, le oso atu o Faatoia i luma ave le taavale, ae soso Leslie i le isi itu i luma lava o le taavale, ae oso mai le alii o Thesaurus Heather lea sa toalua ma Leslie i luma, i tua o le pikiapu. O lo o tetee Faatoia i lea faamatalaga a le alii loia, ma o loo tutumau pea o ia i lana molimau, o ia sa nofo i tua o le pikiapu. O le a faaauau i le vaiaso fou lea faamasinoga.

Saunia: Lilomaiava Andrew Fa’asau, Naenae Productions