$6.9 PILIONA TALA LE TUPE UA LE MAUA

E $3 piliona tala Amerika po o le $6.9 piliona tala Samoa le tupe mama ua le maua e atunuu o le itulagi o le Pasefika sa faatauina atu i fafo le ava, ona o le tapu na faamamaluina e le Iuni a Europa (E.U.) lea ua atoa nei le 12 tausaga, e faasa ai le toe faatauina atu o oloa e gaosia i le ava.

O lea aofaiga na faailoaina i le fonotaga lona lua a le E.U. ma le fono a faipisinisi o le Pasefika na usuia i Vanuatu i le vaiaso na te’a nei. Na tuuina atu foi e sui o atunuu o le Pasefika i le faalapotopotoga o atunuu Aferika, Karipiane ma le Pasefika (A.C.P.) i se fono lata mai nei a le A.C.P. ma le E.U. na usuia i Aferika. O le tapu na faamamaluina e sui o le soifua maloloina a Siamani i le 2001 na faaleaogaina e le Faamasinoga Maualuga a lea atunuu i le aso 10 o Iuni, 2014.

O le faauluuluga o le Faalapotopotoga o le Gaosi Oloa a Samoa (S.A.M.E.), le susuga Tagaloa Eddie Wilson na fai ma sui o Samoa i le fonotaga i Vanuatu i le vaiaso na te’a nei ma na ia faaalia, ua amata nei ona faagaioi le toe atinaeina o le ava Samoa mo le faatauina atu i atunuu Europa ma ua mataitu foi le tulaga lelei o le ava e faatauina atu i fafo.

APILI LE SUI PALEMIA I LONA MOLIAGA

Ua toe apili e le alii sui palemia, le tofa Fonotoe Nuafesili Pierre Lauofo, le faaiuga a le Faamasinoga Faaitumalo lea na faamaonia ai lona moliaga o le uunaia lea o le minisita lagolago ia Muagututia Peter Ah Him e faalavelave i galuega a leoleo, ma faasalaina ai o ia i le salatupe e $200 e totogi i le Matagaluega o Leoleo. Peitai o le aso Gafua o le vaiaso nei na faaulu ai e lana loia, le susuga Donald Kerslake, le apili faasaga i lea faaiuga i luma o le afiga Faamasino Sili Patu Tiavaasu’e Falefatu Sapolu i le Faamasinoga Maualuga.

Ina ua lauina e le afioga Faamasino Vaepule Vaemoa Vaai le faasalagai o Fonotoe i ni nai masina ua tuanai atu, na saunoa le alii faamasino, o i latou na aafia ma le amanaiaina i lea mataupu o alii leoleo sa faatino o latou tiute i le faamalosia lea o tulafono i luga o ala tetele. Fai mai a ia, na maua e ia alii leoleo le lagona le fiafia ma le le amanaiaina ina ua o ese le alii sui palemia ma le minisita lagolago mai le nofoaga sa tulai mai ai lea mataupu, ma e oo mai i le taimi nei e lei tuuina atu lava se faamaluluga aloaia a i laua na molia i alii leoleo. Ua faatulaga nei e le Faamasinoga Maualuga le aso 29 o Setema, 2014 e faagasolo ai le apili a le alii sui palemia.

FAAUU LEOLEO FOU E TO’A 98

O le aso Faraile o le vaiaso na te’a nei na faauuina ai ma faatauto alii ma tamaitai leoleo fou e to’a 98 ina ua maea aoaoga faapitoa i le galuega faaleoleo sa latou feagai ai mo le 16 vaiaso ua tuanai. Na faatumuina le Hall a Tupulaga Talavou a le EFKS i Mulinuu i le sauniga o le faauuga. I lana saunoaga autu, na faamamafa e le alii palemia, le susuga Tuilaepa Lupesoliai Sailele Malielegaoi le faatinoina o o latou tiute ma le faamaoni ma le maelega.

“Aua nei outou mulimuli i tulaga vae a nisi o leoleo ua faate’a mai le matagaluega ona o le le faamaoni ma le faaaoga sese o le malosiaga faaletulafono ua tuuina atu i le faatinoina o o latou tiute,” o le fautuaga lea a le alii palemia. O lo o lagolagoina malosi e le malo le faafaigaluegaina o ia sui fou o le Matagaluega o Leoleo ina ia mautinoa le malu puipuia o le fonotaga a atumotu laity tau atia’e o le lalolagi lea o le a talimalo ai le atunuu ia Setema. Na saunoa le alii komesina le tumau, le susuga Fauono Talalelei Tapu e faapea, e to’a 100 i latou sa auai i le amataga o aoaoga faapitoa sa faagasolo. Peitai, e toalua e le i mafai ona faamaeaina ia aoaoga.

TAUMAFAI E PULE I LONA OLA

O lo o faataotolia nei i le falemai se alii talavou na taumafai e pule i lona ola, ae lei manuia ana taumafaiga. O lea alii mai le afioaga o Falelatai na taumafai e pule i lona ola e ala i lona faaaogaina o se laau malosi. Na lipotia mai e faapea, sa faau e lea alii le gutu o le laau malosi i lalo o lona auvae ma ia faapaina ai le laau malosi agai i luga i lona ao.

Peitai e lei lavea lona faiai ma e ui ua leai sona auvae sei tulou, ae o lo o ola pea o ia ma o lo faataotolia pea i le potu o gasegase tigaina i le falemai i Motootua. O lenei faalavelave na tulai ma i le tolu vaiaso talu ai ma e le o mautinoa le mafuaaga. Ae o le faaiuga o le vaiaso na te’a nei na lipotia mai ai le pule o se alii talavou mai le afioaga o Leulumoega i lona ola e ala i lona inuina o le vailaau fanavao. O lo o masalomia o se feeseeseaiga a lea alii ma ona matua na mafua ai ona ia pule i lona ola.

Saunia: Lilomaiava Andrew Fa’asau, Naenae Productions