SU E LEVAOPOLO LE TV1

O le a ono oo atu i luma o le Faamasinoga le mataupu ua tusi atu ai nei le afioga i le alii faipule o le itumalo o Gagaemauga Numera Lua, le Tofa Levaopolo Talatonu, i le Ofisa Faasalalau o le TV1, po o le Samoa Quality Broadcasting Ltd. (SQB).

O lenei tusi o lo o faailo atu ai i le TV1 le totogiina atu ia te ia o se tinoitupe, ona o Tala Fou na faasalalauina ta’u leagaina ai lona tagata a o faagasolo le fofogaina o le mataupu i le va o le alii faipule ma le Ofisa o Tiute lea e lei mamao atu. O lo o finau le tofa ia Levaopolo, sa ta’u leagaina lona tagata, o lona aiga, o lona itumalo ma lana pisinisi i Tala Fou a le TV1 i lea taimi, e faapea sa ia faatauina atu fagu malosi na tuuaia ai o ia ma lana pisinisi, peitai e le i iai se faamatalaga faapea i tolaulauga o taualumaga o le Faamasinoga i lea aso.

Na fesiligia le tamaitai pule o le TV1, le afioga ia Galumalemana Faiesea Lei Sam-Matafeo e uiga i lenei mataupu ma le tusi ua tuuina atu a le alii faipule e totogi atu le silia i le $700,000, ona ua faaleagaina o ia i lea tala fou. Peitai na saunoa le afioga ia Galumalemana, o le itu tau i le faaleagaina o tagata i se mataupu faapenei, o le matafaioi lea a le Faamasinoga e ala i sana faaiuga.

KOMESINA O SAMOA I AUSETALIA

O le aso e faatautaia ai toe sauniga o le Komesina Maualuga o Samoa i Ausetalia, le afioga Lemalu Samau Tate Simi, lea na tuumalo i le faaiuga o le vaiaso na te’a nei i Ausetalia, ao sauniuni atu le atunuu i le faamanatuina o le Eseta o lenei tausaga. O le afioga Lemalu na tofia e avea ma Komesina Maualuga o Samoa i Ausetalia i le 2009, e sui tulaga i le afioga Leiataua Dr. Kirifoti Eteuati.

Ae lei tofia o ia i lea tofiga taualoa, sa avea o ia ma ofisa sili o pulega o le Matagaluega o Fefaatauaiga, Alamanuia ma Leipa. Ua loa tausaga o le tautua a lenei tamalii e le gata i matagaluega a le malo, ae faapea foi i faalapotopotoga eseese i totonu o le atunuu. Sa ia tauaveina le tofi peresetene o le Koluse Mumu a Samoa mai le 1995 i le 2009, sa avea o ia ma sui o le pulega a le Iuni Lakapi a Samoa mai le 1986 i le 2004. Sa aoaoina o ia i le Kolisi o Samoa ae lei malaga atu i Niu Sila e faaauau ai ana aoaoga. Sa galue o ia i lea atunuu mai le 1972 i le 1977, ae lei toe taliu mai o ia i Samoa I le 1978. O ona toe sauniga i le aso o le a faagasolo i le malumalu o le Ekalesia Faapotopotoga Kerisiano i Samoa i lona afioaga o Fagalii. O lo o soifua pea lona faletua o Peseta Noumea Simi ma o la alo e toafa.

TUUMALO TOOMATA ALAPATI POESE

O le faaiuga o le vaiaso fou o lo o faamoemoe e faatautaia ai toe sauniga o le sa avea ma Fa’aao o le Iunivesete Aoao o Samoa, le afioga ia Toomata Alapati Poese Toomata. O le vaveao o le aso Sa o le Toetu na faamanavaina ai e le Matai Sili galuega a lea tamalii. Na faailoa mai i a tatou tala i se faatalanoaga ma lona faletua i le aso ananafi le tina ia Matalena Ale Toomata, le maliu filemu ai o le tama o le aiga mai i lona gasegase o le kanesa o le mama.

O lea gasegase e faapea faatoa maua i le faaiuga o le tausaga na sei mavae atu ia Tesema. E maliu le afioga ia Toomata o lo o avea o le Fa’aao o le Iunivesete Aoao o Samoa i le Papaigalagala. O se tamalii ua loa tausaga o tulai mai i le tofi o le itumalo o Salega i le motu tele i Salafai, talu mai le tausaga e 1999 , na filifilia ai i le palota laitiiti ina ua tuumalo le afioga ia Luagalau Levaula Kamu. O le tausaga e 2011 na maea ai lana tautua i le Palemene.

MALEMO I LE SAMI

O le amataga o le vaiaso nei na tulai mai ai se faalavelave na maliu ai se tama i le afioaga o Lalomanu, Aleipata. O lea tama e 36 tausaga le matua sa alu se latou faiva na agai i le gataifale, ae sua mai le tai ma faigata ai ona toe aau ma agai ane i uta i le pa’u matu ma sa iu ina tafea ai.

O lenei faalavelave na faamautu mai e le komesina le tumau o le Matagaluega o Leoleo ma Falepuipui i se feiloaiga ma tusitala, le afioga ia Fauono Talelei Tapu, ma e faapea na agai atu le fesoasoani a le matagaluega i le nofoaga na tulai mai ai lea mataupu, ma maua ai le tino o le tama ua maliu i le aso na sosoo ai. O lenei tama e nofo i se tina o Lalomanu ma e toafa o la alo. O ona nuu o Samusu ma Patamea i le motu tele o Salafai.

Saunia:  Lilomaiava Andrew Fa’asau, Naenae Productions