Ads by Google Ads by Google

Tala ‘oto’oto mai Samoa

TIGAINA TURISI INITIA INA UA FASI I SE FALE KALAPU

O lo o fa’ata’otolia nei i le maota gasegase i Moto’otua ia se ali’i turisi Initia na fasi e ni isi i se fale kalapu i le po o le Aso To’ona’i na se’i mavae atu.  Na fa’amaonia lenei ripoti e se leoleo mai Tafa’igata, lea sa tiute i le falema’i.

TU’UA’IA NI LEOLEO I LE FA’ATAU FUALA’AU FA’ASAINA

E to’alua ni leoleo o lo o ua su’esu’eina nei, ina ua a’afia i la’ua i se molimau i se fa’amasinoga e fa’atatau i fuala’au fa’asaina, lea na ta’ua ai e lea molimau, o ni isi o tagata o lo o fa’atau fuala’au fa’asaina.

Na fa’amaonia mai e le sui Komesina o Leoleo, le susuga Le’aupepe Fatu Pula ia le faia nei o se su’esu’ega e fa’asaga i nei leoleo.

O nei leoleo o lo o talitonuina e galulu i le vaega e gafa ma le puipuiga o le Ao o le Malo.  Ma na saunoa Le’aupepe, o lo o masalomia le fa’aaogaina e nei leoleo o fuala’au fa’asaina.

E le i mafai ona fa’amaonia e Le’aupepe pe ua fa’amalolo nei leoleo a’o fa’agasolo ia a la’ua su’esu’ega.

FA’ASAOINA SOIFUA O SE ALI’I NA TANUMIA I SE LIFI

O lo o fa’ata’otolia nei i le maota gasegase i Moto’otua ia se ali’i e 27 tausaga, o Oloie Fa’ato’a mai i Sa’asa’ai i Savai’i, na tanumia i se lifi (forklift), a’o faia ni ana galuega i lona aiga i le Aso Lulu o le vaiaso ua mavae.

Na fa’atopetope atu Fa’ato’a mai i le falema’i i Tuasivi i Savaii, i le falema’i i Moto’otua i le Aso Faraile, ina ua amata ona tau fa’aletonu ona togafitiga.

Na fa’amatala e Fa’ato’a, e le i silafia e le ave lifi, o la sa i ai o ia i tua o le ta’avale, ina ua amata ona solomuli le lifi.  O lo o ia taumafai nei e toe fa’agaioi ona vae, ina ua mae’a sana ta’otoga e toe fa’agatasi lona sulugatiti lea na taomia.

LOKA SE TAMALOA INA UA LE MAFAI ONA TOTOGI AITALAFU A LANA UO

Na fa’aalia le le fiafia o le tina ia Rosa Latulipe, ina ua loka si ona to’alua o Filipo, i le Tafaigata i le Aso Tofi o le vaiaso ua mavae, ona sa ta’ua e leoleo, ua le totogia e Filipo se nonogatupe na lagolagoina e Filipo, mo se tamaloa na maliu i le 2006.

O Latulipe e galue mo le SSC (Samoa Shipping Corporation) ma sa ia lagolagoina se nonogatupe mo se ali’i na la galulue fa’atasi, lea ua maliu, o Fa’atoafe Viane Tele’a mai i Leauva’a.

Na fa’amatala e Rosa, na lagolagoina e lona to’alua ia le nonogatupe a Viane i le 2005, ona o lona alofa ia Viane ina ua sulufa’i atu ia te ia mo sana fesoasoani, aua se tupe mo se fa’alavelave a lona aiga. 

Na ta’ua e Rosa, e tatau i le Faletupe o Atina’e, lea na fai ai le nonogatupe, ona fa’amalosia le avea na’o tagata o aiga ma lagolago i le faia o nonogatupe, ma le tutupu o fa’alavelave fa’apenei, aemaise lava i taimi e maliliu ai tagata e ana ia nonogatupe.

Sa ia fa’aalia foi, o lo o la galulue ma lona to’alua i le tau totogia o lenei nonogatupe.  Ae sa ia fa’aalia le i ai o sona manatu, ina ia toe sui tulafono a le faletupe ina ia le a’afia tagata e latou te le’i maua se sene e tasi mai i le tupe na nonoina.  Sa ia fesiligia fo’i po o i ai se tulafono a le faletupe e fa’aleaoga ai nonogatupe fa’apenei, pe afai ua maliu le tagata sa faia le nonogatupe.

Aumai: Samoa Observer