Na fa’aalia e le Fa’atonusili o le Matagaluega o Aoga a le malo i se feiloaiga ma Tusitala i le vaiaso nei, tulaga ta’uleleia o loo i ai le auaunaga a faiaoga e to’a 11 mai Samoa, lea o loo galulue fa’akonekarate i aoga eseese i totonu o le Teritori.

Na taua e Vaitinasa Dr. Salu Hunkin-Finau e fa’apea, na pau ripoti o loo tuuina atu i lona Ofisa e fa’atatau i le auaunaga a faiaoga mai Samoa, e na o ripoti lelei lava mai puleaoga o aoga eseese o loo tautua ai i latou nei.

Ina ua fesiligia e tusitala ia Vaitinasa pe o i ai se isi fuafuaga a le Ofisa o Aoga e toe aumai ni isi faiaoga mai Samoa, na saunoa le tama’ita’i Fa’atonusili, “e leai, o faiaoga lava e to’a 11 ia na malaga mai i le tausaga na te’a nei, o loo fa’aauau pea ona galulue mo le Ofisa o Aoga, o le tausaga mulimuli fo’i lenei o le latou konekarate e lua tausaga o loo galulue ai.”

Saunoa atili Vaitinasa e fa’apea, afai ae mae’a tausaga e lua o konekarate mo faiaoga mai Samoa, ona tu’u atu lava lea o le avanoa e filifili ai le tagata pe fa’aauau pea ona fia galue i Amerika Samoa, pe ua finagalo fo’i e toe fo’i i Samoa.

Sa ia taua fo’i e fa’apea, e ui i le tele o fa’aupuga ma tala sa faia fa’asaga ia te ia i Samoa ma Amerika Samoa nei, ona o le mataupu e fa’atatau i faiaoga mai Samoa, ae o ripoti ua tauaao e lona ofisa o loo taua ai le tele o le fesoasoani a nai faiaoga mai Samoa, i le a’oa’oina lea o fanau aoga a le atunu’u.

O se tasi o itu lelei mo faiaoga mai Samoa, e le gata ua aloaia la latou tusi pasi tikeri fa’a faiaoga mai le Iunivesite Aoao a Samoa (National University of Samoa) i lalo o le fa’atulagaina o tulaga tau aoaoga a Amerika, ae ua mafai fo’i ona totogi i latou i totogi o loo totogi ai faiaoga ua maua fa’ailoga i totonu o Amerika Samoa.

Ina ua fesiligia Vaitinasa e tusitala poo lava faiaoga mo le toe amataina o lenei tausaga aoga fou, na tali le tama’ita’i fa’atonusili e fa’apea, o loo lava ma totoe faiaoga e amataina galuega mo le toe a’e mai o fanau aoga, se’i vagana lava ua i ai ni isi faiaoga e fa’amavae i le taimi tonu lava e a’e mai ai aoga, ona fa’atoa tula’i mai ai loa lea o se isi manaoga fa’apitoa mo ni isi faiaoga fou e tatau ona toe fa’a faigaluega.

O se tasi o fa’afitauli e masani lava ona fetaia’i ma le Ofisa o Aoga, o le a’e mai lea o fanau mo le amataina o le tausaga aoga ae tula’i mai le fa’afitauli o le le lava o faiaoga, ae na saunoa Vaitinasa e fa’apea, e mafua ona tula’i mai lea fa’afitauli, ona o ni isi o faiaoga, e a’e mai le tausaga aoga e fa’atoa tuuina atu le tusi fa’amavae.

Sa ia taua fo’i e fa’apea, soo se taimi lava e tuu atu ai se tusi fa’amavae a se faiaoga, e latou te aloaia ma talia, ona o le faitalia lava a le faiaoga ua mafua ai ona fa’amavae.

Ae o se tala fiafia mo le Matagaluega o Aoga i lenei tausaga aoga, le mafai lea ona fa’aopoopo mai le isi fesoasoani mai faiaoga e to’a 22 mai Amerika, o loo ofo fua mai lo latou taimi e galulue ai mo le tausaga atoa, i lalo o ni feagaiga faapitoa.

Saunoa atili Vaitinasa e fa’apea, e 35 faiaoga mai fafo sa talosagaina e malaga mai, peita’i e na o le to’a 22 lea ua mafai ona taunu’u mai i le atunu’u, ma ua fuafua fo’i e fa’asoasoa atu i latou i aoga eseese i le atunu’u, fuafua lava i le aoga o loo tula’i mai ai le manaoga.

O ni isi o nei faiaoga o le a galulue i Manu’a, ae o isi o le a vaevae i aoga eseese i totonu o Tutuila nei.