Ao lei fa’aleo e le afioga i le Matua ia Pulu Ae Ae Jr lona lagolagoina o le fuafuaga e sii ai totogi o ta’ita’i o le atunuu faapea ai ma le Fono Faitulafono, sa ia fautuaina muamua sui o le Fono, e le tatau ona latou “tete’e” pe “feita” i le fa’asea soo ma le muimui o le atunu’u e fa’atatau i si’itaga o totogi, ae tatau ona latou vaai i le mafua’aga e ala ai ona fa’asea le atunuu aemaise lava i tagata totogi lafoga e aofia ai ma ia.

“Aua le feita fua i le muimui a tagata, aua fo’i tou te soona lalafo ni fa’amatalaga e fa’atatau i finagalo o le atunuu, e le atagia mai ai iina o outou o ni ta’ita’i e loloto le tofa ma le fa’autaga”, o le saunoaga lea a Pulu i se talanoaga ma le Samoa News ananafi.

“O le aia tatau lava lena a soo se tagata aemaise lava i tagata totogi lafoga, o le fa’asea ona o le fia malamalama i tulaga o tupe ma soo se mea e fai i totonu o le malo, ae o le tiute o outou o ta’ita’i o le Fono, fa’amanino i le atunuu mafua’aga e ala ai ona sii tou totogi”, o le isi lea saunoaga a Pulu.

“Aua tou te faia na tala fai mai o le muimui soo o le atunuu, e le o muimui le atunuu, o lo o talanoa mai le atunuu i le mea sa’o, o lo o oi ma pologa tagata i le maualuluga ma le taugata o le tau ua i ai le soifuaga i le taimi nei, aua la le vave le tali i le fa’asea a le atunuu, ae nonofo lelei i lalo ma mafaufau i le mafua’aga ua ala ai ona fa’asea tagata”, o le tali atu lea a Pulu i le saunoaga a le peresetene o le Senate i le vaiaso nei, lea na ia fautuaina ai senatoa ma faipule e aua le amanaia fua finagalo ma muimuiga a le atunuu e faatatau i siitaga i alauni a le fono.

Saunoa le afioga i le Tamaitai o le Ao ia Gaoteote Palaie Tofau e fa’apea, e le aumaia muimuiga a tagata e taofi ai galuega fa’atino a le Fono mo le manuia o le atunu’u.

O ni isi o fo’i o taimi e fa’aaoga ai e ni isi o senatoa le faaupuga lenei, “aua le amanaia le pola e motu i tua”, e fa’atatau lea i finagalo eseese o le atunu’u e fa’atatau i le tulafono lea ua pasia e le Senate e faaopoopo ai le ta’i $10,000 i alauni a senatoa ma faipule.

Na faamanino e le afioga i le matua ia Pulu lona matua lagolagoina o tulafono taufaaofi lea ua i luma o le Fono, e sii ai totogi o le kovana ma le lutena kovana, atoa ai ma le faaopoopo o alauni a senatoa ma faipule, i lalo o lona talitonuga, e le tatau fo’i i le faigamalo ona latou taofi siitaga faaopoopo mo tagata faigaluega i tausaga taitasi.

E talitonu Pulu, afai ua finagalo le Fono e fa’aopoopo a latou alauni, e le gata o se “fuafuaga ua talafeagai ma lelei”, ae ua tatau fo’i la i le Fono ona toe fai ni isi teuteuga i a latou tiute ma galuega tauave, ina ia mautinoa lelei ai o lo o talafeagai a latou totogi ma galuega fa’atino.

Mo se fa’ata’ita’iga e pei ona saunoa Pulu, afai o le a sii totogi, e le tatau fo’i la ona toe nofoia e se tasi ua ma’i le nofoa a le itumalo, aua o le tele o taimi e le auai o ia i fonotaga ma iloiloga a komiti, ae o lo o fa’aauau pea ona totogi.

“O le isi fautuaga pe afai e pasia e le Fono siitaga o alauni a senatoa ma faipule, afai e le fono le senatoa po o le faipule i se aso, e le tatau ona maua lona aso lea, aua o le tulaga o lo o maitauina i le taimi nei, e tiga lava ona le auai le senatoa po o le faipule i le fono ae faaauau pea lava ona maua lona totogi, ma o se tulaga ua le tusa ai ma le silasila a le atunuu, aemaise i latou o lo o sisina o latou afu e saili tupe i le la pe timuga fo’i”, o le isi lea saunoaga a Pulu.

E le na o Pulu na faaali lona finagalo i le mataupu lenei, ae na fa’aluaina fo’i e le susuga a Filisi Amituana’i o Aua, o se tasi o alii faipisinisi i le atunuu.

Saunoa le susuga a Amituana’i e fa’apea, afai ua finagalo le Fono e faaopoopo a latou alauni, ua tatau fo’i la ona fai se suiga i le Fa’avae, ina ia suia ai le aofa’i o aso Fono i le tausaga.

“O le mea lea e i ai, e na o le 90 aso fono mo senatoa ma faipule i le tausaga, sei vagana lava ua valaau e le kovana se fono faapitoa ona faatoa mafai lea ona faaopoopo atu i luga isi aso fono, ae afai ua finagalo le fono e faaopoopo a latou alauni, ua tatau loa ona usuia le fono faitulafono mo le 150 aso fono i le tausaga, tusa lea o le ta’i 75 aso fono i le tauaofiaga, ina ia talafeagai ma le maualuluga o totogi o le a latou maua.

Saunoa Amituana’i e fa’apea, so o se tagata faigaluega lava i lalo o le la i le malo ma pisinisi tua, e faigaluega mo le 5 pe 6 aso o le vaiaso, 4 vaiaso o le masina, 12 masina o le tausaga.

“So o se kamupani ma soo se faigamalo, a le faigaluega se tagata i le aso, e le maua lona aso faigaluega lena, sei vagana ua galue ona faatoa totogi lea o ia, e le pei lava o le fono faitulafono i senatoa ma faipule i le taimi nei, e tiga lava ona le fono le senatoa po o le faipule ae maua lava lona totogi mo le tausaga atoa”, o le saunoaga lea a Amituana’i na fa’alua e le afioga i le matua ia Pulu.

“E tatau ona fai se suiga i le tulafono e le tatau ai ona toe maua le totogi o se senatoa po o se faipule i le aso e le fono ai, e le tatau fo’i ona toe i ai se tagata ma’i na te nofoia le nofoa o le itumalo, ma le tele o aso fono e ma’imau ona ua malaga le senatoa po o le faipule e sii ma’i, ae lelei ona filifili se tagata e lava lona malosi na te tauaveina le nofoa o le itumalo”, o le saunoaga lea a Pulu.

Na taua fo’i e Pulu lona lagolagoina o le tatau lea ona toe faaauau faaopoopoga mo totogi o tagata faigaluega a le malo, lea ua tele tausaga o taofia e le o toe faia.

“Afai e lagona e le fono ua tatau ona sii latou totogi, e faapena foi lagona o tagata faigaluega a le malo aemaise i latou ua ova i le tai 20 tausaga o le tautua ae lei faia lava ni siitaga o totogi, ua tatau foi ona faaopoopo o latou totogi ina ia talafeagai ma le tulaga ua i ai le tau o le soifuaga i le taimi nei”, o le saunoaga lea a Pulu.

Na fa’ai’u saunoaga a le afioga i le matua ia Pulu i lona fautuaina lea o ni isi o afioga i senatoa o lo o fa’asea i le muimui o tagata o le atunuu, e le tatau ona latou toe faia lea tulaga o le tete’e pe a fa’aleo e le atunuu o latou lagona.

“Afai e fa’asea tagata totogi lafoga i sii o totogi o senatoa ma faipule, ua tatau ai, o latou tupe ia o lo o alu e faatupe ai siitaga nei, o le latou aia tatau e mafai ai ona faaleo o latou manatu i mataupu e finagalo latou e talafeagai”, o le isi lea saunoaga a Pulu.

E lelei Samoa e le o tutupu ai faafitauli e pei ona tutupu i fafo, o le susunu e tagata lautele o faleoloa ma pisinisi i le taulaga, po o le fai foi o solo tete’e pe afai e tula’i mai ni mataupu faapenei e fete’ena’i ai ma le malo.

Saunoa Pulu e fa’apea, “o Samoa, e filemu mea uma i ana tu ma aganuu, e mafua mai i le iloa lelei lea e le ta’ita’i o lona va feagai ma le atunu’u, ae le o le faalogo atu loa ua faasea le atunuu oso loa i luga le ita o le ta’ita’i, aua o iina e atagia mai ai e le o ia o se ta’ita’i lelei”.