I le taimi nei, ua fa’auluina le polokalama fou mo fanauiti i le Matagaluega o Talavou ma Tama’ita’i, ina ia atina’e ai i latou i le ta’aloga o le “Gymnastics” po’o le “Tatafiti.”

Ua fa’ailoa mai e se tasi o le matagaluega o tama’ita’i ma talavou, “O lenei ua amatalia le taumafaiga e a’oa’o fanauiti nei e amata mai i le 4 tausaga, aua e tatau lava ona vave amatalia ona a’otauina fanau a’o itiiti tino ma vavai fo’i.”

Ona o lo’o i ai i atunu’u le tama’ita’i mai Ausetalia o lo’o matua tele lona iloa i lea fa’agatama, Brooke Kneebush, o lea ua amatalia ai lenei polokalama e fa’ata’ita’ia ai fo’i ona faia ma a’oa’oga fa’apitoa mo sui e taumafai ona latou a’oa’oina lea fo’i fa’agatama i le fanauiti, pe a tuua e Kneebush i tatou mo sina taimi toe taliu mai ai.

Na mua’i fetaui ma masani Ethan Lake, le komesina mo ta’aloga eseese i le teritori, i lenei tama’ita’i i ni ta’aloga sa faia i Fiti, ma sa fa’ato’ai loa i ai sana talosaga e o’o mai i Amerika Samoa e fa’aa’e ai fo’i lea fa’agatama mo tupulaga.

O le aso ananafi o le toe aso lea mo koleniga a le fanauiti, fa’apea fo’i ma le koleniga o i latou e avea ma faia’oga o lea fo’i ta’aloga.

Ua faailoa mai e Lake “O se la’asaga muamua lenei o le taumafaiga ina ia fa’atula’ia le asosi fa’alotoifale o le ta’aloga Tatafiti. E tolu fo’i la’asaga iloga mo lea taumafaiga.”

“O le ulua’i sitepu lea ua faia nei, amata tima’i le fanau e tusa o aga ma uiga fa’apea agava’a e mo’omia mo le ta’aloga Tatafiti. E tatau fo’i ona amata gausia o latou tino ia agava’a mo lea ta’aloga a’o iti i latou ma vavai gofie o latou tino.”

“O le sitepu lona lua o le fa’alautele lea o le naunau i tagata o le atunu’u ina ia amana’ia lea fo’i ituaiga o ta’aloga e tauva ai latou fanau. E o lua lea ma le matua fa’aosofia o le naunau i matua fa’atasi ma fanau ia auai i a’oa’oga ma ia tausia lelei tino o fanau ia saunia lelei mo koleniga mo’omia e agava’a ai mo tauvaga i lea fa’agatama.”

Ma le la’asaga lona tolu, “Ia fa’atumauina se ta’ita’iga lelei o le ta’aloga i le tatou malo, ma ia fa’atula’ia loa le Asosi mo Amerika Samoa a’o aluga lelei mea uma ua fa’atulaga mo a’oa’oga o le fanau ma ia mautinoa ua gafatia e fanau ona tauva ai fa’avaomalo i le lumana’i.”

Ua fa’ailoa mai e le tu’ua fa’amamasagia lenei taumafaiga e Kneebush lenei taumafaiga, aua e toe asiasi mai. “E toe siakia mai le fa’agasologa ua i ai le taumafaiga ma apoapoa’ia lava le fa’atautaiga o le ta’aloga, atoa ai ma le toe si’itia fo’i o kosi e a’otauina ai e o faia’oga i lenei fa’agatama.

Ua fa’ailoa mai fo’i e Kneebush, “E tolu isi ituaiga o ta’aloga e feso’ota’i lelei tomai ma le Tatafiti, ua tele fo’i ina fa’aaogaina e le au Faafiafia a Tama’ita’i o ta’aloga Football, po’o lape i le fa’asamoa moni, taga ma fegi e maua mai koleniga fa’apitoa o le Tatafiti.”

“Ona o le tulaga e le fiafia uma tagata pe mafai fo’i ona tauva tagata uma i le Football, Soka, Volleyball, Basketball ma isi ta’aloga fa’apena, lea ua ala ai ona taumafai atili e auina mai i totonu uma isi ta’aloga i le tatou atunu’u. Ia tofusia fanau talavou uma ma latou avanoa e tauva ai i ta’aloga ua fiafia i ai, ma agava’a ai fo’i,” o se tala lea a Lake.

O le tausaga lenei ua mae’a ai le auaunaga a le Paka ma Malae Ta’alo latou te fa’afoea ai Ta’aloga  Eseese mo le atunu’u, ae ua se’e mai nei lea matafaioi e fa’atautaia e le Matagaluega o Tupulaga Talavou ma Tama’ita’i.