[E toe fa’atalofa atu i paaga masani a le tatou polokalame i lenei fo’i vaiaso, malo le soifua laulelei, malo fo’i le onosa’i, ae o le toe sosooina lenei o le tatou fagogo, lea na gata mai i le vaiaso na te’a nei i le taimi lea ua toe fo’i atu ai le tamaititi o Lami e toe amata lana galuega o le taea atigi fagu i le taulaga.]

O se amataga faigata lea ua toe o o i ai le olaga saili tupe a le tamaititi o Lami ina ua mavae le maliu o Feo. Sa faigofie mea uma i aso o le mafutaga a le tamaititi ma si ana uo toeaina leoleopo, ona o le tele lava o taimi e taofi ai e Feo le tamaititi e aua ne’i toe alu tae atigifagu, ae ua lava tupe o lo o ia tu’uina atu ia te ia e ave i lona aiga e fa’atau ai se meaai mo ia ma si ona Tina. Talu ona mavae le maliu o Lami, e lei toe vaaia lava e ulugali’i faipisinisi o Tema ma lona to’alua le tamaititi o Lami, e ui o lea ua uma ona faia le latou tuuga tala, a mae’a lona mea uma o le fa’alavelave ma ua seki fo’i le mafaufua o Lami mai le mafatia i si ana uo ua maliu, ona alu atu loa lea e faigaluega i le la faleoloa si’i oloa tele lava o lo o i le taulaga i Apia. Ua tuana’i le vaiaso ma ua fa’asolo atu i le lua vaiaso talu ona mavae le maliu o Feo, e lei toe vaai lava le ulugali’i faipisinisi lenei ia Lami, ona la manatu ai loa lea, o le a la malaga e asi Lami ma si ona Tina e fesili i ai poo ua sauni le mafaufau o le ali’i e alu atu e faigaluega, peita’i na taunu’u le ulugali’i faipisinisi i le fale i le isi aoauli, ae fa’ailoa ane i ai e le fafine o Sei, o Lami le la ua toe fo’i i lana galuega masani o le tae atigi fagu, ua fiu fo’i e fai atu i ai e tu’u ia le la galuega ma le tigaina ae le mafai lava le naunau o Lami e alu e faigaluega e saili ai se tupe mo laua.

Na ona fo’i mai lava o le ulugali’i faipisinisi o Tema ma lona to’alua mai le fale o Lami i le aoauli lea, ona la ta’amilo solo loa lea i le taulaga e saili pe la te mauaina ai le tamaititi o Lami, aemaise lava o lea ua o o i le taimi o malologa o le aoauli, o le taimi lea e masani ona vaaia solo ai le tamaititi ma lana atigi taga lanu pa’epa’e o lo o amo solo e tu’u ai i totonu ana atigi fagu. O se itu na ofo ai le ulugali’i faipisinisi lenei, e uma lelei le vai ‘aiga o le aoauli o le aso lea la te lei vaai lava ia Lami, ona manatu loa lea o le ulugali’i, e sili pe a la aga’i i Mulinu’u la te fa’asavili ai i le malu o Pulu tetele o lo o i ai ma fai ai se la tausiga o le aoauli, ona toe amata ai fo’i lea o galuega o lo o totoe o le aso. E nonofo loa Tema ma lona to’alua i luga o le isi laulau i Mulinu’u ae o la vaaia loa le tamaititi o Lami o lo o nofonofo to’atasi mai na o ia i le isi itu o le auala, ma lana taga atigi fagu o lo o fa’atu i ona luma. “Pei lava o Lami le tagata le la ua ou vaai atu i ai”, o le talanoa atu lea a Tema i lona to’alua. O le fia iloa e le fafine pe moni o Lami le tagata lea o lo o saofa’i mai i le isi itu auala na mafua ai ona ia tu i luga ma savali loa e vaai, ae o le itu na faateia ai le to’alua o le ali’i faipisinisi, ina ua ia maua atu le tamaititi o Lami o lo o punou lava ma tagi, ae o lo o ta’atia i tafatafa o lana taga atigi fatu le ata o Feo.