O le fa’afitauli numera tasi o lo o fetaia’i pea ma le Matagaluega o Leoleo a le atunu’u, o le tele lea o manaoga e ao ona fa’atino mo le fa’aleleia o le auaunaga a le matagaluega i le atunu’u, a o le fa’afitauli o lo o i ai, e le taitai lava le tupe e fa’atino ai nei mau manaoga, e pei ona fa’ailoa e le ali’i komesina ia Save Liuato Tuitele i luma o le Komiti Soofaatasi a le Fono i le taimi na fesiligia ai le paketi a lona ofisa i le taeao ananafi.

Mo se fa’ata’ita’iga e pei ona saunoa Save, ua tele le fia sii o totogi o ali’i ma tama’ita’i leoleo o lo o puipuia le saogalemu o le atunu’u, ae o le fa’afitauli e le o lava se tupe a le malo, e o o i toniga a leoleo e le o atoatoa ma lelei, e fa’apena fo’i i mea faigaluega o lo o fa’atino ai galuega a le matagaluega.

“O le vasega fou mo leoleo e to’a 11 lea na mae’a i ni nai masina e le i mamao atu, ua taofia le fa’auuga mo nai leoleo nei se’i maua muamua se tupe e fa’atau ai ni o latou toniga ona fa’atoa fai lea o le fa’auuga, o le taimi nei, o lo o fa’aaoga e leoleo fou ia le lanu uliuli ma le pa’epa’e e galulue ai, ae o o lava fo’i i leoleo tuai, o ni isi o taimi e fa’atau ai lava e latou a latou toniga, pe a leai se tupe a le matagaluega e fa’atino ai nei mau manaoga,” o le saunoaga lea a Save i luma o le Komiti Soofa’atasi.

E $8.7 miliona le paketi a le Ofisa o Leoleo mo le tausaga tupe lenei 2015 mo le fa’atupeina o tagata faigaluega e to’a 293, a o lea ua fa’aitiitia le paketi ma tagata faigaluega mo le tausaga tupe fou 2016 i le $8.2 miliona ae to’a 286 tagata faigaluega.

Saunoa Magalei Logovi’i e fa’apea, o le tele o taimi e faigata ai ona ia iloa leoleo o lo o tiute i luga o le alatele, ona e leai ni latou pulou e faia, e leai fo’i ni fa’ailoilo e iloa ai o i latou o ni leoleo.

Saunoa Galea’i M. Tuufuli e fa’apea, o se tasi o itu e mafua ai ona fa’aletonu le auaunaga a le Ofisa o Leoleo aemaise i le Vaega Fuimu, e le gata e le o lelei ta’avale ae o o lava fo’i i le Fale Fuimu ua tuai.

“O outou o le toomaga o le atunuu i taimi o fa’alavelave, a o le tulaga lea e maitauina, a tutupu ni faalavelave e atagia mai lava e le o sauni le Vaega Fuimu, na mafua fo’i ona totogi e le malo le silia i le $6 miliona i le mu o le Laufou ona o le fa’atamala o le aufaigaluega Fuimu i lena taimi,” o le saunoaga lea a Galea’i, ma ia talosaga ai ia Save ina ia fautua i le ali’i kovana, mo se fesoasoani tau tupe e fa’aleleia ai vaega e pei ona moomia.

Na fatua le sui fofoga fetalai ia Fetu Fetui Jr i le komesina, e manaia fo’i ae fa’aaoga e Leoleo ia Solofanua e feoa’i ai i le fa’atinoina o a latou galuega, e lelei lena e le tau mana’omia ai ni kesi po o se suauu e utu ai.

Ae na saunoa Soliai T. Fuimaono e fa’apea, e lelei fo’i le fa’aaoga o Solofanua e leai ni fa’alavelave tau ta’avale e tutupu mai ai.

Na fesili Tuiasina S. Esera i le komesina, pe na te silafia o talafeagai totogi o leoleo o lo o i ai, na saunoa Save, “e le o taitai talafeagai totogi a nai leoleo o lo o i ai, ae o le fa’afitauli, e le o lava tupe a le malo e fa’atupe ai siitaga o totogi.”

O se tasi o tautua o lo o galulue faatasi ai le ofisa o leoleo ma afioaga i le atunu’u, o le feutana’i lea o sui o le matagaluega ma pulega a ali’i ma faipule, i auala e fa’aitiitia ai solitulafono i le atunu’u.

O le afioga i le Maopu ia Levu Solaita ma Pagofie Fiaigoa, lea o lo o galulue i konekarate e ta’i $40,000 totogi i le tausaga, o i laua ia o lo o fai ma sui o le matagaluega o leoleo o lo o feso’ota’i ma afioaga eseese i le atunu’u mo lea auaunaga taua.