Tony Tumua Bishop:

O lo ua maua mai fo’i nisi o fa’amaumauga ua si’itia ai taumafaiga a fanau o Amerika Samoa o lo’o tautua i vaega ‘au a le malo tele i nofoaga eseese i fafo, e pei o le susuga a Tony Tumua Bishop, lea na fa’auu mai i le Aoga Maualuga a Fagaitua i le 2012, ma ulufale ai lava i le tausaga lava lea i le Militeli a le malo tele.

“O la’u BCT sa fa’atino uma lea i Fort Sill i Okalahoma ma faauu mai ai a’u. Na pasia a’u koleniga fa’apitoa ia Aperila 2015, ma faauu ai a’u ia Iuni 04 i Fort Lee i Virgina,” o le saunoaga lea a Bishop.

Na soso’o lea ma le ulufale i le Kolisi Tu’ufa’atasi i Malaeimi mo le isi lua tausaga atoatoa, ae fa’au’u mai ai i le tausaga e 2014. Na mae’a loa lana a’oga lea soso’o loa ma le ulufale sa’o i le US Army, ma tu’uva’a ese atu ai ia Ianuari 19, 2015.

E le gata sa ia taua lona misia o si ona tina matua ua tu’ua le la mafutaga mafana, ae o le latou aufaipese ma le autalavou fo’i i le EFKAS i Aunu’u. “O le tele o taimi ta te fia toe fo’i atu lava i le mafutaga e pei ona sa i ai le olaga i le Ekalesia ma le Aiga. Ua masani lava i le fa’atamaiti o fa’ai’uga fai mo le olaga, o le tafao lava ma le talie i tala malie ae o lo’o i ai le fiafiaga e le mafai e nei ituaiga o mafutaga fou ona toe fa’afo’i mai i lo ta olaga tautua ua i ai nei.”

“Misia lava le mafutaga ma nai matua fa’aleagaga, le autalavou i uo ma e masani fa’apea ma aiga, e leai se mea o le olaga nei, e taofia ai le toe fia o’o atu e feiloa’i ma toe talatalanoa ma talie i tala malie fa’a-tama Samoa moni! Le faiga fo’i o fa’apusa mo le to’ona’i ma le ta’ele i le tatou matafaga ae maise le fa’alue atu i malaga a nai a tatou va’a laiti i le motu o lo’o i ai uma ota mo’omo’oga e fia ola ai pea!” O se toe momo’o lea o le atali’i e toe fia fo’i mai.

Ona o lana galuega o lo’o nafa ma le Sapalai a le Army, o lea e galue ai nei o ia i le Nofoaga a le Army i Fort Riley, Kansas, peita’i, ua le mautinoa se vaitaimi o le a maua ai sona taimi paganoa e toe malolo mai ai le auaunaga e asia si ona aiga, ae ua avea lenei ala, e molita’i mai ai ona alofa’aga mo nai ona matua,  le Tofa Aufotu Fulu Bishop ma Vi’iga Lemafa F. Bishop mai Aunu’u ma Fasito’outa, Samoa.

“E le mafai e se mea e tasi o lenei tautua ona momotu ese mai le agaga fia mafuta pea ma oulua, ae maise fo’i o uso ma tuafafine, si a tatou ekalesia i nai matua fa’aleagaga, ae maise o le tupulaga sa matua mafuta vavalalata i le Aufaipese ma le Autalavou. E ui lava ina tatou tu ese i si o tatou motu itiiti o Aunu’u, ae o le ‘auro lava lea i lo’u tagata fa’atauva’a. Alofa tele atu mo outou, tatou feiloa’i fo’i i talosaga si’itia i le Atua na te puipuimalu a’u ma outou fo’i a’o tatou valavala ai i nofoaga. Alofa’aga o Tony Tumua Bishop.”

SPC Natthew Tuinei:

O se tala fiafia i nisi o le vasega fa’au’u o le masina o Iulai, 2015 mai le US Army, ua fa’apaleina ai nisi o alo o le atunu’u i “Taumafaiga Maoa’e” i a la’ua palatuni sa kolenia ma a’otauina ai. O i la’ua nei sa maua fa’aeaga e ala i pine o le maoa’e o taumafaiga nei e aofia ai le to’alua o alo o Amerika Samoa:

SPC Nathew Tuinei ma le tama’ita’i o Malaia McFall. Ua mae’a fa’apineina i la’ua nei fa’atasi ai ma le isi to’a fa o isi sui mai isi setete eseese o le Iunaite Setete i le la’ua palatuni. Fa’amalo atu fo’i le taumafai i nei alo o le atunu’u.