[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea faailoa atu ai e Kati i le fafine ave taxi, e sili pe a saili se mea la te lalafi ai ma lana tama, ona o lea ua ia vaaia o tagata faatupu faalavelave lea o lo o paka mai le latou sipi uliuli i fafo o le fale.]

O le tomai ma le agavaa o Kati faa Leoleonana na mafua ai ona vave lana faaiuga sa faia, ma faasaoina ai le ola o le fafine ave taxi na agalelei ia te ia. Na ona savali atu lava o Kati i totonu o le isi potu o le fale, ta tope ai loa iina ma isi ana teuga ma faigata ai loa ona iloa ona foliga mo’i. Ina ua mae’a, sa savali aga’i i fafo le tama ma le faamoemoe o le a faataga savali i le vaega o lo o paka ai le loli tuai a le fafine ave taxi, ma ona teuga pei o se tagata fai faatoaga, ae lilo ai ana fana otomeki e lua lea ua maea ona nana i tua o lona ofu talaloa o lo o faia, toe lava o le amoki pa pa loa ma kama. Na ona iloa lava e Kati ua seki mea uma i lana fika lea o le a fai, tago loa ua faataga tatala le faitoto’a pito i tua o le fale, ae faataga savali i le isi itu o le lotoa o lo o paka mai ai le loli la’u uta a le fafine ave taxi, foliga mai o le a alu e fai sana galuega.

“Sole, faakali, o ai oe,?” o le fesili ane lea a le isi tagata faatupu faalavelave sa nofonofo i totonu o le taavale. “O a’u e ana le fale lenei ma le lotoa, ou te le iloa pe i ai se mea o tupu ua mafua ai ona outou paka i luma o lo’u muafale, poo outou o ni leoleo poo ni fitafita ea a le malo,?” o le tali atu lea a Kati, ae na pepelo ane i ai le alii lea, “O matou o sui o le Army, o lea matou te tiute iinei se’i tau saili le tagata faatupu faalavelave lea sa matou tuliloaina maia i le Faletalimalo o lo o i luma atu o le aai,” o le tala lea a le tagata faatupu faalavelave ia Kati, ona luelue lea o le ulu o le tama ma tali i ai, “ua lelei, faaauau la outou galuega ae se’i o’u alu e la’u mai la’u uta,” e fai lava tala a le tama ma savali aga’i i tua o le fale, ona toe taamilo ane loa lea i le isi tulimanu i luma ma seki mai ai lana fana, e le’i misi lava ma muaulu o le au alii ia sa nofonofo i totonu o le taavale ma maliliu ai.

E le’i iloa e le fafine ave taxi o lo o lalafi ma lana tama i totonu o le fale gaioiga a Kati ia o lo o fai i fafo o le fale, ae na faatoa iloa lava e le fafine ina ua toe tatala atu e le tama le fale ma alu atu i le vaega pito i lalo lea o lo o lalafi ai, ma valaau atu e o mai i fafo. “Aisea ua teu ai i na teuga,?” o le fesili lea a le fafine, ae na ata Kati ma faapea atu, “Fai mai fo’i sa e leoleo nana, o le nei ana o mai lava le au faatuu faalavelave susunu le fale ma lua feoti atu ai ete lua le iloaina se mea leaga sa mua ona lua lalafi,” o tala ula ia a Kati ao taumafai e tatala ese ana teuga o lo o fai, a’o le fafine ave taxi i le taimi lea, ua faanatinati atu i le pito i luma o le fale ma ia iloa ai, ua leai se ta’avale ma ni tagata sa i luma, e fetaui lava le toe savali mai o le fafine i totonu o le fale ae ona vaaia loa Kati ua uma ona sui ana teuga sa fai.