Ua talosagaina e le ali’i loia fautua ia Michael White le mana’omia lea o le faia o ni isi su’esu’ega fa’aopoopo, i le tulaga o lo o i ai le malosi ma le lelei o le mafaufauga o se ali’i o lo o tuuaia i le fasioti tagata, ina ia mautinoa e gafatia e lona mafaufau ona tu’uina mai ni tali i le taimi e fa’ataunu’uina ai i lana iloiloga.

O lea talosaga sa tu’uina atu e White i luma o le fa’amasinoga maualuga i le aso ananafi, ina ua toe valaau le mataupu a le ali’i o Arthur “Afa” Blake i luma o le ali’i fa’amasino sili ia Michael Kruse.

I ni isi o fa’amatalaga sa mafai ona tu’uina atu i le fa’amasinoga i ni isi o ulua’i mataupu sa tu’uaia ai Blake, o lea ali’i e a’afia o ia i le gasegase o le mafaufau.

O se ali’i foma’i mai le falema’i o le LBJ na valaau e le malo e molimau, mo le tu’uina atu o ni isi o faamatalaga e fa’atatau i ni isi o su’esu’ega sa ia faia le susuga a Blake.

O ni isi o fa’amatalaga sa mafai e le ali’i foma’i ona ia fa’ailoa i luma o le fa’amasinoga, sa taua ai le fa’aeteete gata o le saogalemu o Blake i so o se taimi e tuua ai na o ia i le toese i Tafuna, aemaise lava i taimi e fai ma oso fa’amalosi ai le gasegase o le mafaufau o lo o a’afia ai o ia.

E ui e le i mafai ona auiliili a’afiaga o le gasegase o le mafaufa o lo o pagatia ai Blake, peita’i na taua e le ali’i foma’i i lana molimau e fa’apea, e tele isi ituaiga su’esu’ega e tatau ona faia ia Blake, ina ia mautinoa lelei ai po o a tonu a’afiaga o le mafaufau o lo o mafatia ai o ia.

Na taua e White e fa’apea, e o o lava fo’i i le taimi o lo o taofia ai Blake i le toese i Tafuna i le taimi nei, e fa’aeteete gata lava le tulaga i lona soifua maloloina, ona o le fa’afitauli i le gasegase o le mafaufau o lo o a’afia ai o ia.

Na finau White e fa’apea, e tatau ona fa’ataunu’uina uma suesuega e manaomia mo Blake, e aofia ai ripoti e fa’atatau i lona soifua maloloina ina ia tu’uina atu i le fa’amasinoga, ina ia fa’avae ai se fa’aiuga maumaututu e fa’atatau i lenei mataupu.

“E matuia tu’uaiga o lo o molia ai Blake”, o le saunoaga lea a White ina ua ia finau mo ni isi su’esu’ega e fa’atatau i le malosi o le mafaufau o le ua molia. Sa ia taua fo’i e fa’apea, o gaioiga uma sa fa’atino e le ua molia e pei ona tu’uaia ai o ia e le malo, e atagia mai ai le fa’anaunauga e tatau ona mae’a su’esu’ega uma e talafeagai mo ia.

Na fa’ai’u le talosagaina a White i lona fa’ailoa lea i le fa’amasinoga, “o le agaga atoa o suesuega o lo o talosagaina le tatau ona fai, ina ia fesoasoani ai i le olaga o lenei ali’i talavou”, lea fo’i na saunoa Kruse e fa’apea, e le gata e fesoasoani ia Blake ma lona saogalemu, ae fa’apena fo’i ona fesoasoani mo le saogalemu o le atunu’u lautele.

O Blake o lo o tu’uaia e le malo i le moliaga o le fasioti tagata i le tulaga muamua, e mafua mai i le faalavelave lea na maliu ai le ali’i o Lopeti Lihua i le masina o Iuni 2013 i Iliili, ina ua sasa e le ua molia lona ulu i le tolopo ma manu’a tigaina ai, mulimuli ane maliu ai lava o ia i le tuga o ia manu’a.

E tusa ai ma fa’amaumauga a le fa’amasinoga o lo o taua ai, sa nofo Blake i le fale o le ulugali’i ma le la fanau i le taimi na tula’i mai ai le fa’alavelave.

E tula’i mai le mataupu e pei ona tu’uaia ai Blake i le fasioti tagata, ae o le taimi lea o lo o nofo vaavaaia ai o ia i luma o le fa’amasinoga maualuga mo le 5 tausaga, e mafua mai i le fa’alavelave lea na ia sasa ai se alii i se sapelu i le masina o Iulai 2010, i le taimi ao faia se ta’aloga volipolo a le tupulaga i le afiafi.