O le tama’ita’i e 27 tausaga le matua lea e to’atolu i ai molimau autu a le malo i le mataupu fa’asaga ia Hanipale Malae, ua taofia nei i le toese i Tafuna ona o tu’uaiga i lona taumafai lea e fa’amalosi isi tama’ita’i e to’alua o lo o taofia i lalo o le vaavaaiga a le malo, e sui a laua fa’amatalaga sa tuuina atu i leoleo faasaga i le mataupu o lo o tuuaia ai Hanipale.

O le tama’ita’i ua molia o Faasoosoo Sosaiete, lea ua tuuaia i moliaga mamafa e lua o lona taumafai e faalavelave i molimau a le malo, atoa ai ma lona faaleagaina o mea molimau a le malo.

O lo o tuuaia faatasi e le malo ia Sosaiete, Hanipale ma lona to’alua o Asenati Malae, i lo latou taumafai lea e faalavelave i molimau a le malo.

O moliaga o lo o tuuaia ai Hanipale ma lona to’alua o Asenati e aofia ai le taumafai e faalavelave i molimau a le malo, faapea ai ma le taumafai e ufiufi se solitulafono sa faia.

O ananafi na tutula’i ai Sosaisete ma Asenati i luma o le fa’amasinoga maualuga mo le faaauauina o a la mataupu, ae o Hanipale lea ua faatulaga lana ulua’i iloiloga e faia i le aso Tofi o le vaiaso fou i luma o le fa’amasinoga faaitumalo, lea o le a iloilo ai e le faamasinoga mau a le malo, pe lava ma totoe ia mau e lagolago ai tuuaiga fou faasaga ia te ia.

O le mataupu lenei na tofu atu i le Ofisa o Leoleo, ina ua logo e se tamaitai faigaluega mai le Ofisa o le Social Services leoleo mo se fesoasoani, ona o se tasi o molimau a le malo ua mana’o e toe sui lana fa’amatalaga sa tuuina atu i leoleo e faatatau i le mataupu o lo o molia ai Hanipale, ma tofia ai loa le tamaitai leoleo suesue ia Det. Alisha Godinet na te suesueina lenei mataupu.

Ina ua fesiligia e leoleo ia Sosaiete e uiga i lenei mataupu, sa ia faamaonia ai lona mana’o e toe sui lana faamatalaga tusitusia sa tuuina atu i leoleo, e tusa ai o le mataupu o lo o tuuaia ai Hanipale i lona faiga o uiga mataga ia te ia.

E 12 moliaga e aofia ai le faiga o uiga mataga faafeusuaiga, faamalosi teine, aemaise ai o le tagofia o itutinosa o ni tamaitai se to’atolu o lo o tuuaia ai Hanipale e le malo i le mataupu muamua, ma o lo o faaauau pea lea mataupu i luma o le faamasinoga maualuga i le taimi nei.

I le mataupu muamua faasaga ia Hanipale, e le o taua ai lava igoa o tamaitai e to’atolu o lo o aafia i lea mataupu, se’i vagana ai igoa e pei o F.P e 15 tausaga le matua; S.S e 20 tausaga le matua, ma F.S e 27 tausaga le matua, lea faatoa faailoa mai e le malo lona igoa i le mataupu fou lea, o ia o Faasoosoo Saisaiete.

O lo o taua i faamaumauga a le faamasinoga e faapea, na totogi e le to’alua o Hanipale ia Asenati le pasese e sau ai le tina a Sosaiete mai Apia i Amerika Samoa nei, ma nofo ai i se tasi o aiga i Mesepa.

O le aso 17 Iuni, 2013 na taunuu mai ai le tina a Sosaiete mai Samoa, ona alu lea o Asenati ua piki mai o ia mai le malae vaalele i Tafuna ae momoli i Mesepa i le nofoaga o le a faamautu ai.

I se tasi o aso, na alu ai Asenati ma momoli se pusa moa, pusa pipi ma se pusa sosisi i le aiga lea o lo o nofo ai le tina a Sosaiete, ae o le isi aso na toe alu atu ai Asenati ma tuu le $40 i le tina a Sosaiete, i lalo o se faatonuga na tuu sa’o mai ia Hanipale mai le falepuipui.

Ina ua fesiligia e leoleo le tina a Sosaiete e uiga i lenei mataupu, sa ia faamaonia ai le totogi atu e Asenati o lona pasese e malaga mai ai i Tutuila nei, atoa ai ma le alu atu o Asenati ma avatu meaai ma se tupe ia te ia i Mesepa.

Na taua e se molimau i leoleo e faapea, e masani lava ona talanoa Sosaiete ma lona tina ia Hanipale i luga o le telefoni, a’o talanoa tuusa’o mai Hanipale mai le toese i Tafuna.

O le aso 10 Iulai, 2013 na logo ai e le tamaitai leoleo sa gafa ma le suesueina o lenei mataupu lona ta’ita’i, e faatatau i se telefoni o lo o ia Hanipale i totonu o le toese, ma poloaina ai loa e le Komesina o Leoleo le sailia o le sela o lo o loka ai Hanipale atoa ai ma lona tino atoa pe maua i ai se telefoni.

Ina ua maua e leoleo le telefoni ia Hanipale, sa ia faamaonia ai i leoleo e faapea, o lona to’alua ia Asenati na tuuina atu le telefoni ia te ia, ina ia mafai ai ona latou fesoota’i, ae na faamaonia e Sosaiete i leoleo e faapea, o le telefoni tonu lava lea sa masani ai ona la fesootai ma Hanipale, amata mai i le aso 27 Iuni e o o atu i le aso 9 Iulai, 2013.

Ina ua fesiligia e leoleo ia Asenati e faatatau i le telefoni sa maua ia Hanipale, sa ia faamaonia ai e faapea, o ia na avea le telefoni ia Hanipale i totonu o le toese, e ala i lona nana o le telefoni i totonu o lavalava sa alu e ave i lona to’alua i totonu o le toese.

I se tasi o talanoaga e faaaoga ai le telefoni lea na faailoa ai e Hanipale ia Sosaiete, o meaai ma le tupe na momoli atu e Asenati i lona tina, o mea ia sa ia faatonu e avatu mo laua ma lona tina ma le latou aiga.

O le aso 11 Iulai 2013 na fesiligia ai e leoleo se tasi o molimau o lo o i lalo o le vaavaaiga a le Ofisa o Tautua ma Auaunaga Lautele, o le tamaitai lea o lo o taua e le malo o F.P, 15 tausaga le matua, e tusa ai o se taumafaiga a Sosaiete e faamalosi o ia e sui lana faamatalaga ua maea ona tuuina atu i leoleo.

Na taua e le tamaitai lea i leoleo e faapea, i se tasi aso a’o la talanoa ma Sosaiete e faatatau i le suia o lana faamatalaga ua maea ona faia i leoleo, sa tuu atu ai e Sosaiete le telefoni ia te ia ma fai atu e talanoa i le tagata o lo o i luga o le telefoni, ina ua ia talanoa i le telefoni, sa ia iloa ai o le leo o Hanipale lea o lo o talanoa atu ia te ia i le telefoni.

Sa tuu fo’i e Sosaiete i le tamaitai e 15 tausaga se pepa, o lana faamatalaga lea e tatau ona fai i leoleo e tusa ai o le mataupu o lo o tuuaia ai Hanipale, ma o lea pepa ua taofia nei e leoleo.

Na faailoa e Sosaiete i leoleo le una’i malosi atu o ia e Hanipale e alu e fai ia F.P ma S.S e toe sui uma la faamatalaga ua maea ona tuu atu i leoleo.

Ina ua fesiligia e leoleo ia F.P ma S.S e faatatau i lenei mataupu, sa la taua ai le una’i malosi e Sosaiete o laua ina ia sui la faamatalaga sa fai i leoleo, sa i ai foi le taimi na tuu atu ai e Sosaiete le telefoni latou te talanoa ai ma Hanipale a’o taofia o ia i le toese i Tafuna.

O lo o taofia pea i le toese Hanipale ma Sosaiete, ae o Asenati lea ua tatala i tua i lalo o poloaiga a le fa’amasinoga, ina ua ia totogi le $5,000 na faatulaga e tatala ai o ia.

E ese mai i le mataupu fou lea ua toe tuuaia ai e le malo Hanipale, o le aso 28 Oketopa, 2014 lea ua fa’atulaga e faia ai lana faamasinoga autu mo le mataupu muamua o lo o tuuaia ai o ia e le malo.

E $100,000 le tupe ua faatulaga e tatala ai o ia i tua mo le mataupu muamua, ae $10,000 e tatala ai o ia i tua i le mataupu fou e pei ona faila i le vaiaso nei.