Ads by Google Ads by Google

Tofia Komiti Fa’afoe tapenaina tulaga manuia Ofisa o Aoga

ausage@samoanews.com

O le vaiaso nei na sainia ai e le afioga i le ali’i kovana ia Lolo Matalasi Moliga sana poloaiga, e fa’avae ai le tofiaina o se Komiti Fa’afoe e to’a 7 ona sui, e fa’atulagaina polokalame ma auala mo le lumana’i manuia o le Matagaluega o Aoga a le malo.

 

Na taua i se vaega o le poloaiga fa’alaua’itele a le ali’i kovana e fa’apea, o le tulaga o loo i ai polokalame tau i aoaoga i le teritori nei, e le o mafai ona atoatoa ma mautu e tapena ai fanau ua faauu mai i Aoga Maualuluga e ausia matata eseese e pei o mataupu Fa’amatematika, Fa’a Saienisi, Gagana Fa’aperetania, atoa ai ma isi matata i mataupu tau fefa’atauaiga, e le o malosi fo’i matataupu e ausia ai togi maualuluga mo aoaoga i luga atu.

 

Na taua fo’i e le ali’i kovana e fa’apea, o le fa’afitauli o loo fetaia’i ma le Ofisa o Aoga i le taimi nei, o se fa’afitauli ua tele tausaga o fa’aauau mai, aemaise ai o le tulafono o lo o fa’atautaia ai galuega tau a’oa’oga na amata mai i le 1960 ma le 1970, ma ua faigata ai ona sailia ni auala e foia ai nei fa’afitauli.

 

E talitonu le afioga i le ali’i kovana, ua o o i le taimi ua tatau ai ona toe iloilo polokalame ma tulafono o lo o fa’atautaia ai tulaga tau aoaoga i le teritori, ina ia mafai ai ona aumai mafaufauga lelei mo le si’itia o le tulaga tau aoaoga i le atnu’u, ma fa’alauiloa ai suiga e tatau ona faia e foia ai fa’afitauli o lo o tula’i mai.

 

O tiute tauave a le Komiti Fa’afoe e aofia ai le toe iloiloina lea o le ripoti sa saunia e le Komesina o Aoga i le 2013, iloiloina o le ta’iala e 5 tausaga lea na fa’ataoto mai e le Matagaluega o Aoga i le 2014-2019, atoa ai ma le fa’ataotoina o isi fuafuaga fou e mafai ona si’itia ai le auaunaga a le Ofisa o Aoga atoa ai ma le Kolisi Tu’ufa’atasi a Amerika Samoa.

 

O isi tiute tauave a le Komiti Fa’afoe ua tofia, e aofia ai le tu’uina mai o fautuaga mo ni suiga e tatau ona faia ina ia si’itia ai polokalame mo le manuia o aoaoga, fa’atulaga suiga e mafai ai ona si’itia le maualuga o aoaoga, ma fa’amalosia suiga lelei e mafai ai ona si’itia auala e fa’atinoina ai aoaoga.

 

Ua talosagaina e le afioga i le ali’i kovana Matagaluega ma Ofisa eseese uma a le malo ina ia tu’uina atu la latou lagolago i le fa’atinoina o galuega fa’atino a le Komiti Fa’afoe, ma aloaia ai loa galuega fa’atino a lenei Komiti Fa’afoe i le aso lava na sainia ai e le kovana le poloaiga e tofia ai sui o le Komiti.

 

O totino o lenei Komiti Fa’afoe e aofia ai Utu Abe Malae, o ia fo’i lea o le Ta’ita’ifono o le Komiti, Taimalelagi Dr. Claire Tuia-Poumele, Dr. Ruth Matagi-Tofiga, Dr. Mikaele Etuale, Vaitinasa Dr. Salu Hunkin-Finau, Talauega Eleasalo Ale ma le ali’i Loia ia Steve Watson.

 

Ua tofia fo’i e le ali’i kovana le afioga ia Vaitinasa e avea ma Failautusi o lenei Komiti Fa’afoe.