Ads by Google Ads by Google

Toe taliu manuia mai aufusu atunu’u sa tausinio Ta’aloga Pasefika i Ausetalia


Le ali’i faiaoga ia Sala Sanele Etuale ma le ali’i fusu ia Falaniko Tasi Tauta. [ata AF]

Le ali’i faiaoga ia Okesene Malala lea ua ia maua le Tusi Pasi o le 1-Star Coach Certificate mai le AIBA. [ata AF]
ausage@samoanews.com

Ua fa’amanuiaina nei taumafaiga a le alo fusu a Amerika Samoa ia Falaniko Tasi Tauta mo sona avanoa e tausinio ai i le ta’amilosaga a le Youth Olympics i Argentina i le tausaga fou, ina ua maualuga le tulaga sa i ai lana taumafaiga i le ta’amilosaga a le Pasefika i Ausetalia i le vaiaso fou, lea na tausinio ai ma le to’atele o isi ali’i fusu mai atunu’u eseese o le Pasefika mo le sailiina o ni a latou avanoa i le Olimipeka.

 

E to’alua ali’i fusu mai Amerika Samoa sa malaga e tausinio i le tausinioga fa’avaomalo sa faia i Ausetalia, e saili ai ni ali’i fusu e maua avanoa e tausinio ai i le Olimipeka, o le susuga ia Tauta fa’apea ai ma le ali’i o Jeffrey Tago, o ni isi ua maualuga le la taumafaiga i totonu o le Asosi o Fusuaga a Amerika Samoa (American Samoa Amateur Boxing Association - ASABA)

 

“Sa mataina uma lava le tulaga sa i ai taumafaiga a Tauta ma Tago i Ausetalia i le vaiaso na te’a nei, e le gata sa molimauina le lelei o le gaioi ae sa lava fo’i le manava e fa’atino ai le ta’aloga, peita’i i le fa’aiuga a ali’i faiaoga ma laufali sa latou fa’afoeina le ta’amilosaga, ua mafai ai loa ona maua le avanoa o Tauta e tausinio ai i le Olimipeka, ae leai se avanoa o Tago”, o le saunoaga lea a le afioga a Paepaetele Mapu Jamais, le peresetene o le ASABA i se talanoaga ma le Samoa News i le taeao ananafi.

 

O le taeao ananafi na toe taunu’u manuia mai ai i le atunu’u le aufusu a le atunu’u, lea sa ta’ita’ia a le alii faiaoga ia Okesene Malala, o ia fo’i lea o le sui peresetene o le ASABA.

 

E le gata i le tala fiafia e fa’atatau ia Tauta ma le avanoa ua ia maua e tausinio ai i le olimipeka i le tausaga fou, ae ua fa’amanuiaina foi le susuga ia Malala ina ua ia maua le Tusi Pasi Faiaoga o le “1-Star Coach Certificate”, i le mae’a ai o se suega sa fa’atautaia e sui o le Pulega o Fusuaga a le Lalolagi (Amateur International Boxing Association - AIBA), ma fa’amanuiaina ai loa o ia i lenei Tusi Pasi.

 

“E le gata i le tala fiafia e fa’atatau ia Tauta ma le avanoa e tausinio ai i le olimipeka i le tausaga fou, ae ua fa’amanuiaina fo’i Amerika Samoa ina ua avea le susuga ia Malala ma ulua’i faiaoga o fusuaga i le atunu’u ua ia umia le Tusi Pasi Faiaoga o le 1-Star Coach Certificate mai le AIBA, o se tulaga e lei ausia muamua e se tasi i lo tatou atunu’u, peita’i o lea ua fa’amanuiaina ai le susuga ia Malala”, o le saunoaga lea a Paepaetele.

 

Ina ua fesiligia e le Samoa News le afioga a Paepaetele i sona lagona e tusa ai o le tulaga ua fa’amanuiaina ai Tauta atoa ai ma Malala, na saunoa ai le ali’i peresetene o le Asosi o Fusuaga a Amerika Samoa ma ia fa’aleo lona agaga fa’afetai, ina ua mafai ona fa’amanuiaina le fa’amoemoe a fanau a le atunu’u e tausinio ai i ta’aloga o fusuaga fa’avaomalo, o ni matati’a e seasea ausia e atumotu laiti o le pasefika e pei o Amerika Samoa.

 

“E le faigofie ona ausia e o tatou tama fanau ituaiga matati’a maualuluga nei, e seasea i ai ni isi e mafai ona latou ausia, ae ua mafai ona ausia ona o le fa’amaoni ma le tu’u atoa i ai o le loto i taimi o koleniga”, o le saunoaga lea a Paepae.

 

“E le faigofie le tulaga o le taumafaiga a Tauta sa alo atu i ai, e fai lava si to’atele o isi ali’i fusu lelei mai atunu’u tetele e pei o Ausetalia, Niu Sila, Fiti, Tonga ma Samoa sa latou tausinio fa’atasi, peita’i o lea ua molimauina le maualuga o le tulaga sa i ai lana taumafaiga, lea ua maua ai le avanoa na te suia ai Amerika Samoa i ta’aloga tetele a le lalolagi, le ta’amilosaga o le Olimipeka”.

 

O le ta’amilosaga o le Youth Olympic e faia lea i Argentina i le aso 12-18 Oketopa 2018, ma ua fa’amoemoe e tausinio ai le tele o atunu’u eseese o le lalolagi.

 

I le tulaga o le Tusi Pasi o le Faiaoga o Fusuaga e pei ona fa’amanuiaina ai Malala, na taua ai e Paepaetele le fiafia o lona loto ina ua mafai ona ausia e lenei alo o le atunu’u lea fo’i matati’a e le’i ausia muamua e ni faiaoga fusu i Amerika Samoa.

 

“E le faigofie le sailiina o le Tusi Pasi lenei mai le AIBA, e i ai suega ma koleniga e tatau ona auai ma su’e ai le tagata ina ia pasi, atoa ai ma le fa’atinoina o gaioiga eseese e fesoota’i ma le fa’atinoina o le galuega o le faiaoga i se tagata fusu, peita’i o ia tulaga uma sa mafai ona fa’atinoina e Malala ma fa’ai’uina ai ma le manuia lana suega i Ausetalia i le vaiaso na te’a nei, ma avea ai loa o ia ma ulua’i faiaoga fusu i Amerika Samoa ua ia ausia lenei Tusi Pasi maualuga mai le AIBA”, o le saunoaga lea a Paepaetele.

 

“E i ai isi Tusi Pasi e sili atu i luga, ae o le la’asaga muamua lava lea e tatau ona ausia e faiaoga o aufusu eseese mai atunu’u uma o loo i lalo o le fa’amalumaluga a le AIBA, ia i ai ni faiaoga latou te umia Tusi Pasi nei ina ia mafai ai ona fa’ataga i latou e fai ma faiaoga i tama fusu i soo se taimi e faia ai fusuaga fa’avaomalo e faafoe e le AIBA”, o le saunoaga lea a Paepaetele.

 

Na taua e le isi faiaoga o le aufusu a le ASABA, afioga Sala Sanele Etuale lona agaga fiafia ina ua fa’amanuiaina Tauta ma Malala i le ta’amilosaga sa laua malaga atu i ai. O le malaga i Ausetalia a le aufusu sa fa’atupeina lava e le ASABA fa’atasi ai ma le fesoasoani mai a le ASNOC.