Ads by Google Ads by Google

Tapunia aloaia nofoaiga lona 34 a le Fono Faitulafono


Afioga i Faipule o le nofoaiga lona 34 a le Fono Faitulafono, i le mae’a aloaia ai galuega fa’atino i le vaiaso na te’a nei. E to’alua faipule e le o i ai i le ata, o le afioga ia Toeaina F. Autele mai le Itumalo o Manu’a #2, ma le afioga a Faimealelei A. F. Allen mai le afioaga i Aua. [ata AF]
ausage@samoanews.com

O le aso Faraile na te’a nei na tapunia aloaia ai galuega fa’atino a le Fono Faitulafono i ona maota fono e lua, i le mae’a ai lea o galuega fa’atino sa alo atu i ai afioga i Senatoa ma Faipule i le nofoaiga lona 34 e pei ona fa’amae’aina i le vaiaso na te’a nei.

 

E le gata o upu o le fa’afetai ma le fa’amalo e tusa ai o galuega sa mafai ona fa’atinoina e maota e lua i totonu o le 4 tausaga ua mae’a, fa’apea ai ma lagona o le fa’amaualalo pe afai sa i ai ni aleu i le fa’atinoina o faiva ma tiute, ae sa laualuga ai le lagona o le fa’amanuia, mo soo se tasi e maua le avanoa e toe filifilia ai e nofoia nofoa a itumalo ta’itasi.

 

A o le i tapunia galuega a le maota o sui i le vaiaso na te’a nei, sa latou pasiaina ai i le faitauga fa’atolu le pili a le senate sa talosagaina e le faigamalo a Lolo ma Lemanu, mo le tulafono e toe fa’amalosia ai ta’iala ma aiaiga o le fa’asa lea ona fa’alapisi i soo se vaega o le atunu’u.

 

E to’a 17 afioga i Senatoa na auai i le aso fa’ai’u o a latou galuega fa’atino, se’i vagana ai le afioga i le ali’i Senatoa ia Faletagoa’i Tuiolemotu e le i auai, ae mo le maota o sui, e to’a 19 afioga i Faipule sa auai, se’i vagana ai afioga i ali’i Faipule e to’alua ia Toeaina F. Autele ma Faimealelei A. F. Allen e le i auai.

 

E pei ona masani ai maota fono e lua a le atunu’u i soo se taimi e mae’a ai ana galuega fa’atino i le fa’aiuga o soo se nofoaiga, e tulei saunoa afioga i Ta’ita’ifono e fa’afetaia afioga i Senatoa ma Faipule e tusa ai o galuega sa mafai ona fa’atinoina i totonu o le 4 tausaga, ona maua fo’i lea o le avanoa o sui o maota e lua e tali fuaitau atu ai e tusa ma saunoaga a afioga i ali’i ta’ita’i o maota fono a le atunu’u.

 

SENATE

 

Na mua’i saunoa fa’afetai le afioga i le ali’i Peresetene o le Senate, le afioga i le Tama’ita’i o le Ao ia Gaoteote P. Tofau e fa’afetaia ai galuega sa fa’atinoina e afioga i Senatoa i totonu o le 4 tausaga.

 

Na tutulu le ali’i peresetene a o saunoa e fa’aleo le agaga fa’afetai o le la laulau se’elua ma le afioga i le ali’i sui peresetene ia Nuanuaolefeagaiga Nua, ona o le tulaga mataina ma le taoto lelei sa i ai le fa’atinoina o galuega a le maota, amata mai lava i le aso 3 Ianuari 2013 i le ulua’i taeao na fa’ataotoina ai i latou e avea ma Senatoa o itumalo ta’itasi seia oo mai i le aso mulimuli o le latou galuega.

 

“O le 4 tausaga e le o se taimi puupuu, o se taimi e umi naua, o ni isi o afioga i Senatoa sa tatou amataina mai lenei fa’amoemoe, ua fai i lagi le tuligasi’a, peita’i o upu a le atunu’u, e pauu toa ae toe tutu toa, lea ua i ai isi toa ua filifilia latou te fa’aauauina le galuega, fa’amalo atu. Fa’afetai i la outou lafo, fa’afetai i la outou tofa paia, lea ua fa’aalia e ala i fa’aiuga fai, lea ua manuia ai Tutuila ma Manu’a, afai fo’i sa i ai se leo o le laulau e le i logo malie i la outou fa’afofoga, ou te fa’amaualalo atu, ia fa’amagalo la outou auauna”, o le saunoaga lea a Gaoteote.

 

E to’a 5 afioga i Senatoa na maliliu i le nofoaiga lenei 34 a o latou nofoia nofoa o a latou itumalo.

 

O i latou nei e aofia ai Fa’agata Mano, Mata’utia Sua ma Letuligasenoa Soli, lea na maliliu uma i le tausaga e 2013. O isi Senatoa e to’alua na maliliu mulimuli ane ai e aofia ai le afioga ia Faumuina Tagisiaali’i fa’apea ai ma le afioga i le ali’i senatoa ia Saole Mila.

 

E le gata sa ia fa’afetai i afioga i Senatoa uma lava o lo o fai ma sui o itumalo ta’itasi, ae sa fa’apitoa fo’i lana fa’afetai i le afioga i le ali’i senatoa matua ia Galea’i M. Tu’ufuli, i le tele o fautuaga ma le tofa matua sa ia fesoasoani ai i le maota.

 

MAOTA O SUI

 

I luma o le maota o sui, na fa’afetaia ai fo’i e le Fofoga Fetalai ia Savali Talavou Ale afioga i faipule e tusa ai o le galuega sa latou fa’atinoina i lenei nofoaiga ua maea.

 

“Mai tausaga e 36 talu ona ou galue i le Fono Faitulafono, e tele mataupu taua ma le aoga sa mafai ona auiliiliina ma pasia e le Fono Faitulafono, ae o se nofoaiga pito sili lenei ona faigata fa’aiuga sa fa’atinoina ai, ona o fa’aiuga lava e ono oo mai ai le popole ma le atuatuvale, ae sa vaaia la lo outou naunau e fai le mea sili mo le atunu’u”, o le saunoaga lea a Savali.

 

Na maua fo’i le avanoa o le afioga i le ali’i faipule ia Larry Sanitoa na te fa’afetaia ai le maota o sui e aofia ai ma le aufaigaluega, i le fa’atinoina o faiva ma tiute tautua ai le atunu’u.

 

I le avea ai o Sanitoa na sui tauva mo le tofi Lutena Kovana i le la paga ma Faoa A. Sunia i le palota o lo o loma nei, na ia taua ai e fa’apea, afai e le manuia ona faiva, o le a tapuaia faiva a le maota i le lumana’i.

 

O le afioga i le ali’i faipule ia Vaetasi Tuumolimoli Saena Moliga na fai ma sui o le maota e fa’afetaia ai le fofoga fetalai e tusa ai o le ta’ita’iina o le maota i lenei nofoaiga.