O le aoauli o le aso Faraile o le vaiaso na te’a nei na faila ai i luma o le Vaega Iloilo o le Fa’amasinoga Maualuga se talosaga a le susuga a Rev. Amaama Tofaeono, tauala atu i lana loia fautua ia Charles V. Ala’ilima, e talosagaina ai le mamalu o le Fa’amasinoga ina ia toe silasila toto’a i lana fa’aiuga ua mae’a ona tu’uina mai i le mataupu i le tagi a le Ekalesia Faapotopotoga Kerisiano i Amerika Samoa (EFKAS) fa’asaga ia te ia, ina ia mafai ai ona fa’atulaga iloiloga talafeagai atoa ai ma se fa’amasinoga fou mo lenei mataupu.

O le fa’aiuga a le Vaega Iloilo o le Fa’amasinoga Maualuga sa tu’uina mai i le vaiaso i ona tua atu, na fa’aalia ai e ali’i Fa’amasino sa latou iloiloina mau fa’amaonia o lenei mataupu, lo latou lagolagoina o le tagi a le Ekalesia fa’asaga ia Rev. Amaama, e fa’apea ua le toe agava’a ona avea o ia ma Failautusi Aoao o le Ekalesia, ona o lea ua aveese lona tofi Faifeau Fa’au’u, ma ua le toe agava’a fo’i ona ia toe nofoia le maota o le Ekalesia ua fa’apitoa mo le Failautusi Aoao.

O se tasi o itu o loo manino i le talosaga e pei ona faila e le loia a Rev. Amaama, poo i ai i le Komiti a le Au Toeaiina le malosi latou te aveese ai le tofi o le Faifeau Fa’au’u a Rev. Amaama, ma afai e le o ia te i latou lea malosi o loo i ai i le Fonotele a le Ekalesia Aoao, e tatau pea la ona avea Rev. Amaama ma Faifeau Fa’au’u, atoa ai ma le fa’aauau pea lea ona avea o ia ma Failautusi Aoao o le Ekalesia, atoa ai ma lona nofo pea i le maota o le Ekalesia ua fa’apitoa mo le Failautusi Aoao.

Na toe fa’amanino e le itu tete’e i le talosaga e fa’apea, o Rev. Amaama na tofia aloaia e avea ma Failautusi Aoao o le Ekalesia i lana Fonotele i le 2016 mo le umi e 4 tausaga, ma ia nofo fo’i o ia i le maota o le Ekalesia ona o le tofiga ua ia tauaveina. E le o autu le mataupu poo ai e pulea le maota o le Ekalesia, ae o le vaega o loo fia fa’amanino, pe mafai e le Au Toeaiina ona fa’agaioi le malosi o loo umia e le Ekalesia Aoao e aveese mai ai le tofi Faifeau Fa’au’u mai ia Rev. Amaama, lea ua mafua ai ona fa’afuase’i ma le aveeseina o lona tofi Failautusi Aoao, sosoo ai loa ma le fa’atonuga na te tuua ai le maota o le Ekalesia.

Ua manino i le fa’afinauga a le itu tagi e pei ona taua i le talosaga a le itu tete’e, lo latou finau i le fa’amasinoga, fai mai o loo ia te i latou le malosi e aveese ai le tofi Faifeau Fa’au’u, atoa ai ma le fa’aleaogaina o le tofi Failautusi Aoao mai ia Rev. Amaama.

O se tasi o itu na fa’amanino e le itu tete’e i le latou talosaga, o le tulaga i le maota o le Ekalesia e pei ona autu i ai le iloiloga o lenei mataupu, atoa ai ma a’afiaga o aia tatau o itu e lua o lo o a’afia i lenei mataupu. Na fa’amanino e le itu tete’e le i ai o le aia tatau o Rev. Amaama na te nofoia ai le maota o le Ekalesia o lo o fesiligia, ona o ia o le Failautusi Aoao na filifilia e le Ekalesia EFKAS.

O se tasi fo’i o tulaga e tatau ona manino i le fa’amasinoga mo le iloiloina o tulaga i meatotino, pe sa i ai se gaioiga fa’amalosi i le va o le o loo nofoia le meatotino atoa ai ma le e ana le meatotino, ma ua manino mai fo’i i mau sa mafai ona tu’uina atu i le fa’amasinoga, le leai o se tulaga fa’apea sa tula’i mai i le va o Rev. Amaama ma le Ekalesia EFKAS.

E talitonu le itu tete’e e i ai le vaega e le o sa’o i le fa’aiuga e pei ona tu’uina mai e le fa’amasinoga i le mae’a ai lea ona iloiloina o mau o lenei mataupu, ma o lea itu e aofia ai le tulaga lea, e leai se malosi i le Komiti a le Au Toeaiina latou te fa’au’uina ai tofi faifeau.

I lalo o le Fa’avae o le Ekalesia EFKAS e pei ona si’itia e le itu tete’e i totonu o le latou talosaga, o lo o manino mai lea i vaega ta’itasi, e pei o le iloilo lea e le Soa Komiti o le suafa o le tagata, ona tu’uina atu ai loa lea o le ripoti i le Komiti a le Au Toeaiina mo le iloiloina, ao lei tu’uina atu i luma o le Fonotele mo le fa’au’uina o le tofi Faifeau.

I lea la’asaga, e le o tu’uina atu ai se malosi i le Komiti a le Au Toeaiina latou te fa’auuina ai tofi faifeau, se’i vagana ai lo latou iloiloina ma talia le ripoti sa tu’uina mai e le Soa Komiti. O le fa’au’uina atoa ai ma le pasiaina o tofi faifeau, o le galuega lea a le Fonotele a le Ekalesia Aoao, ae le o se tiute a le Komiti a le Au Toeaiina.

E o o fo’i i le Tusi o I’ugafono a le Au Toeaiina, e le sili atu le malosi o lea tusi i le Fa’avae o le Ekalesia atoa ai ma iugafono mai le Fonotele a le Ekalesia Aoao.

O le malosi atoa o le Ekalesia EFKAS o lo o taoto lea i lana Fonotele, ae o le Komiti a le Au Toeaiina o le latou tiute o le mata’ituina lea o le usitaia o le Fa’avae ma iugafono a le Fonotele.

E leai se Fa’avae o le Ekalesia o lo o taua ai le tu’uina atu o se malosi i le Komiti a le Au Toeaiina latou te avesea ai tofi o faifeau fa’au’u, poo le latou faia o ni fa’aiuga poo ni fa’asalaga. E tu’uina atu e le Komiti a le Au Toeaiina le fa’aiuga e aveese ai le tofi Faifeau i le Fonotele a le Ekalesia Aoao.

Na fa’amanino e le itu tete’e le leai o ni mau fa’amaonia ua tu’uina atu i luma o le fa’amasinoga, e fa’amaonia ai le fa’aleaoga e le Fonotele o le tofi Failautusi Aoao mai ia Rev. Amaama. E leai fo’i ni mau fa’amaonia e faamaonia ai sa fa’atinoina e Rev. Amaama se agasala matuia ma ua le toe aloaia lona tauaveina o lona tofiga mo le 4 tausaga.

O le tofiga o le Failautusi Aoao i le EFKAS, o ia lea e vaaia atoa le faagaioiga o le Ekalesia (CEO), ma o le taumafaiga e aveese lona tofi faifeau fa’au’u ina ia aloaia ai le aveesea o lona tofi Failautusi Aoao, e le gata o se faaiuga e fa’aletagata, ae o se faaiuga fo’i e le tusa ma Fa’avae o le Ekalesia.

Ona o ia tulaga uma e pei ona taua e le itu tete’e, ua talosagaina ai le Fa’amasinoga ina ia toe silasila i lana fa’aiuga ua mae’a ona tu’uina mai, ina ia mafai ai ona fa’atulaga se iloiloga aloaia mo le mataupu atoa ai ma le toe faia o se fa’amasinoga fou.