Ads by Google Ads by Google

Tali Komesina i lagona eseese o le atunu’u e tusa ai o lana tautua


Le afioga i le Komesina o Leoleo, tofa Le’i Sonny Thompson [ata AF]
ausage@samoanews.com

E ui i lagona su’ifefiloi mai ni isi o le atunu’u e pei ona latou fesiligia ai le mafua’aga o le vaaia o le Komesina o Leoleo o loo ia fa’atonutonuina ta’avale i luga o le alatele i le tele o aso, atoa ai ma lona taofia o ni isi o ta’avale e le usita’i i tulafono o luga o le alatele ae tu’uina atu i ai ‘ticket’, peita’i na taua e le tofa a Le’i Sonny Thompson lona fiafia pea e tautua le atunu’u e ala i le tofiga na tofia i ai o ia e le Kovana ma fa’amaonia e le Fono Faitulafono.

 

“O lo’u tiute na tofia i ai a’u e le afioga i le ali’i Kovana ia Lolo Matalasi Moliga ma fa’amaonia e le Fono Faitulafono, o lo’u fesoasoani lea i ali’i ma tama’ita’i Leoleo e puipui le saogalemu o le atunu’u ma fa’amalosia tulafono a le malo i soo se aso, ma o lo’u tiute lava lea ou te fiafia lava ou te tautua ai mo Amerika Samoa i aso uma ou te tautua ai i lenei tofi”, o le saunoaga lea a le afioga i le ali’i Komesina o Leoleo i se fa’atalatalanoaga ma le Samoa News i luga o lona Ofisa i le aso ananafi.

 

Talu ai e fou i le silasila a ni isi o le atunu’u le vaaia o se Komesina o Leoleo o loo ia fa’atinoina galuega o loo faia e ali’i ma tama’ita’i Leoleo, e pei o lona fa’atonutonuina o ta’avale i luga o le alatele, atoa ai fo’i ma lona taofia o ta’avale e le usitaia tulafono o le alatele ae tu’u atu i ai pepa sala (ticket), na mafua ai ona feso’ota’i mai ni isi o le atunu’u i le Samoa News ma fa’aalia o latou lagona e tusa ai o lea vaaiga.

 

O le to’atele o le atunu’u sa latou taua lo latou fa’afetaia o le Komesina fou o Leoleo e tusa ai o lona naunau e fesoasoani i Leoleo i le fa’amalosia o tulafono ma puipuia le saogalemu o le atunu’u, ae o ni isi fo’i sa fa’aalia o latou lagona fa’asea i le alu fua o le Komesina e fa’atino galuega e le tatau ona ia faia.

 

Ina ua fesiligia e le Samoa News le ali’i Komesina e tusa ai o lenei mataupu, sa ia fa’aalia lona tali sapaia o lagona su’ifefiloi o le atunu’u e tusa ai o lana tautua i totonu o le Matagaluega o Leoleo.

 

“Ou te fa’afetai atu i le atunu’u e tusa ai o latou lagona e fa’atatau i la’u tautua aemaise ai o le auaunaga a ali’i ma tama’ita’i Leoleo. Fa’afetai mo a outou talosaga, fa’afetai fo’i mo lo outou lagolagoina o le tautua a le Ofisa o Leoleo i le taumafai lea e puipuia le saogalemu ma fa’amalosia tulafono a le malo i soo se taimi, e ui i le tele o lu’itau o loo fetaia’i ma le Ofisa o Leoleo ae o lo o matou galulue pea ma faia le mea sili ina ia mautinoa e soifua sa’oloto ma ola saogalemu o tagata uma i totonu o latou aiga fa’apea ai totonu o le atunu’u”, o le saunoaga lea a Le’i.

 

Sa ia fa’afetaia fo’i ni isi o Komesina sa muamua atu ia te ia, i le tele o suiga lelei ma taumafaiga sa latou fa’atinoina ina ia mafai ai ona aga’i i luma le auaunaga a le Ofisa o Leoleo, ae i lona talitonuga, ua oo i le taimi e tatau ai ona la’a i luma le fa’atinoina o galuega a le Ofisa o Leoleo mai tausaga ua mavae.

 

E pei ona saunoa Le’i, o lo o tumau pea le fa’afitauli tuga ua tele tausaga o fetaia’i ma le Ofisa o Leoleo, o le le lava lea o ali’i ma tama’ita’i Leoleo e fa’atinoina le galuega i le aso ma le po, ma o le tele o taimi e silia ai i le ta’i 12 itula o galulue ali’i ma tama’ita’i Leoleo i Sifi o loo tiute ai e fa’atino a latou galuega i le ao ma le po, i le timuga, mugala atoa ai ma le malulu o le po.

 

“O la’u matafaioi e pei ona tofia ai a’u e le Kovana i le nofoa lenei, e le gata ou te pulea ma fa’atautaia le Ofisa i tulaga uma lava, ae tatau fo’i ona ou fesoasoani i ali’i ma tama’ita’i Leoleo i le puipuia o le saogalemu fa’apea ai ma le fa’amalosia o le tulafono, e pei ona fa’atautoina ai a’u ou te fa’amalosia ma puipui le tulafono a le malo o Amerika Samoa”, o le saunoaga lea a Le’i.

 

O le masina o ua te’a na fa’atautoina ai e le loia sili a le malo ia Talauega Eleasalo Ale le Komesina o Leoleo e tusa ai ma le tulafono, ina ia mafai ai ona ia fa’atino ona tiute fa’a Komesina mo le puipuia o le tulafono a le malo.

 

“E le mafai ia te a’u ona ou sau i lo’u Ofisa ma ou nofonofo ai, ae o lea ou te iloa o loo tigaina ali’i ma tama’ita’i Leoleo i le fa’amalosia o latou tiute na fa’atauto i latou e fa’atino i luga o le auala, e le o se tulaga amiotonu lena i lo’u mafaufau, o le mafua’aga lena e vaaia ai e le atunu’u a’u i luga o le alatele i aso uma o le vaiaso, po ma le ao, i le timuga poo le mugala, ina ia mautinoa matou te tautua fa’atasi ma ali’i ma tama’ita’i Leoleo i le fa’atinoina o a matou tiute na fa’atauto i matou te fa’atino, o le puipuia lea o ta’ita’i o le atunu’u e aofia ai le Fa’amasino Sili, Peresetene ma le Fofoga Fetalai o le Fono Faitulafono, Kovana ma le Lutena Kovana, o Ta’ita’i tofia uma o le malo, fa’apea ai Tama ma Tina, tupulaga talavou, o fanau iti e oo lava i pepe fou, o i latou uma na na fa’atauto i matou e puipui lo latou saogalemu mai tagata e le o manatu mamafa i le soifua saogalemu o le atunu’u”.

 

“E i ai tagata e le manatu mamafa i latou i le saogalemu o isi tagata, e i ai ave ta’avale o loo feoa’i onana i luga o le alatele, poo isi fo’i tagata o lo o latou fa’atinoina isi ituaiga solitulafono e aofia ai fualaau fa’asaina, o le aoga lena o la matou tautua i luga o le alatele, ina ia mautinoa matou te taofia i latou na ma molia i le tulafono ae puipuia ai le saogalemu o tagata uma”.

 

E pei ona taua so o e le afioga i le ali’i Komesina i ana saunoaga i soo se taimi e fesiligia ai o ia e le Samoa News, o lona fa’anaunauga o lo o i ai, ia toe fa’afo’i le tulaga mamalu sa i ai le Ofisa o Leoleo i tausaga ua mavae, e ala lea i le galulue fa’atasi o le Komesina ma lana aufaigaluega.

 

O le tulaga to’atele o lo o i ai le atunu’u i le taimi nei, ua atagia mai ai su’esu’ega le tulaga lea, e tusa ma le to’a 525 tagatanu’u e vaaia e le Leoleo e to’atasi (525:1), ma o se tulaga e mata’utia pe a vaavaai atu ai ma ua atagia mai ai fo’i le tatau lea ona toe fa’a faigaluega ni isi Leoleo se to’atele pe afai ae mae’a le fa’auuina o le Vasega lona 25 a Leoleo o loo fa’agasolo i le taimi nei.

 

“Ou te ta’utino atu i le atunu’u, o le a fa’aauau pea ona ou i ai i luga o le alatele i aso uma ma soo se taimi, ou te fesoasoani i ali’i ma tama’ita’i Leoleo i le fa’atinoina o a matou tiute, ina ia mautinoa e soifua sa’oloto le atunu’u i soo se taimi”, o le saunoaga fa’ai’u lea a le ali’i Komesina.

 

I le fa’aiuga o lana saunoaga, sa ia fa’afetaia ai le atunu’u atoa e tusa ai o latou finagalo fa’aalia aemaise ai o le lagolagoina o le tautua a le Ofisa o Leoleo. Sa ia fa’afetaia fa’apitoa fo’i le tautua a ali’i ma tama’ita’i Leoleo o lo o fa’atinoina mo le atunu’u i aso uma, lea ua mafai ai ona soifua sa’oloto le atunu’u i aso uma.