Ads by Google Ads by Google

Tala otooto o Fa’amasinoga

ausage@samoanews.com

LAMETA FA’ATALI

 

Ua teena e le ali’i o Lameta Fa’atali le moliaga mamafa o le ave ta’avale ao se’i lona laisene, atoa ai ma le moliaga o le ave ta’avale fa’atamala fa’asaga ia te ia, ia ua tula’i i luma o le fa’amasinoga fa’aitumalo i le aso Lulu na te’a nei.

 

I le teena ai e Fa’atali o tu’uaiga fa’asaga ia te ia, ua fa’atulaga ai loa le isi ana iloiloga e faia lea i le aso 9 Novema, 2016, e iloa tino ai loa le tulaga o le a oo i ai lana mataupu.

 

O le masina o Fepuari o le tausaga nei na ta’usala ai e le fa’amasinoga ia Fa’atali i le moliaga mama o le ave ta’avale ‘ona, ma fa’anofovaavaaia ai loa o ia mo le 12 masina i lalo o tuutuuga e ao ona ia usita’i i ai, ma o ni isi o ia tuutuuga e aofia ai le se’i o lana laisene ave ta’avale mo le 2 tausage, ona o lea ua fa’alua ona ta’usala o ia i le moliaga o le ave ta’avale ‘ona.

 

I le lua vaiaso talu ai i luga o le alatele a le malo i Aua, na molimauina ai e Leoleo se ta’avale pikiapu lanu uliuli na aga’i mai i Sasa’e mo Sisifo, o lo o aga’i mai i se saoasaoa uiga ese, ma ua ova atu fo’i maila sa ia malaga ai ma maila fa’atulagaina e tatau ona alu ai le ta’avale i le vaega lea o le alatele.

 

Ae o le itu e pito sili ona matuia ai le fa’alavelave na tula’i mai, o le taimi tonu lava lea ua tuua ai fanau aoga.

 

Na taofi e Leoleo le pikiapu i Satala ma iloa ai, o Fa’atali o lo o ia fa’afoeina le ta’avale, ae ina ua fesiligia o ia i lona laisene ave ta’avale, na fa’ailoa e le ua molia i Leoleo, e leai sona laisene ave ta’avale o i ai, ona o lo o se’i e le fa’amasinoga lona laisene ave ta’avale, e mafua mai ina ua ta’usala o ia i le moliaga o le ave ta’avale ‘ona.

 

A o fa’agasolo ai taualumaga o le mataupu a le ua molia, ua toe fautuaina o ia e le fa’amasinoga ina ia aua ne’i ona toe fa’afoeina se ta’avale i luga o alatele a le malo.

 

POLU MAUGA

 

E 12 masina lea ua nofovaavaaia ai le ali’i o Polu Mauga i luma o le fa’amasinoga fa’aitumalo, ina ua ta’usala o ia i le moliaga mama o le gaoi. E 2 moliaga mama na ulua’i tu’uaia ai e le malo le ali’i o Mauga, ae i lalo o se maliliega na latou sainia ma le malo, na ia tali ioe ai i le moliaga o le gaoi ae solofua e le fa’amasinoga le moliaga o le fa’atupu vevesi i nofoaga faitele.

 

O le fa’alavelave na a’afia ai Mauga na tula’i mai i Tafuna i le masina na te’a nei, ina ua ia gaoia se ato e i ai ni mea faigaluega sa i tua o se pikiapu na paka i luma o se faleoloa Asia i Tafuna. O se ulugali’i na nofonofo i totonu o le la ta’avale, na la fa’ailoa i le ali’i e ana le ato meafaigaluega laua te iloa le tagata na alu ma ia, ma logo ai loa e le ali’i e ana le ato meafaigaluega Leoleo mo se fesoasoani, ina ua fesili atu ia Mauga ae fa’aali i ai le malo vale a le ua molia.

 

Na fiu Leoleo e saili solo le ua molia ina ua latou taunu’u i le vaega tonu na tula’i mai ai le fa’alavelave, peita’i o le po lava lea na toe aga’i atu ai Leoleo i le vaega na latou sailia muamua ai le ua molia, ma latou vaaia ai o ia o lo o inupia mai ma ni isi o ali’i talavou se to’alua i tafatafa o le faleoloa.

 

Na laulauvavale Mauga ina ua taumafai Leoleo e pu’e fa’apagota o ia, ma mafua ai loa ona tu’uaia o ia i le moliaga o le fa’atupu vevesi i nofoaga faitele, ae o mea faigaluega sa ia gaoia, na maua uma ma toe fa’afo’i ai i le ali’i e ana mea faigaluega.

 

O ni isi o tuutuuga o le nofovaavaaia a le ua molia e aofia ai le fa’asa ona ia toe tagofia le ‘ava malosi, aua ne’i ona toe alu i le faleoloa na tula’i mai ai le fa’alavelave, a ia saili sana galuega e maua ai sona totogi e fa’atau ai mea e mana’o i ai, ma ia aua ne’i ona toe solia se tulafono a le malo.

 

TU’UAIA SE ALI’I I LONA FA’AO’OLIMA I LONA TO’ALUA

 

O le amataga o le vaiaso nei na tula’i ai i luma o le fa’amasinoga fa’aitumalo se ali’i e 41 tausaga le matua, ona o tu’uaiga o le fa’ao’olima i le tulaga tolu atoa ai ma le fa’atupu vevesi i totonu o lona aiga, e mafua mai i le fa’alavelave lea o lo o tu’uaia ai o ia i lona fa’ao’olima lea i lona to’alua.

 

Na taua i fa’amaumauga a le fa’amasinoga le tagofia e le ua molia o le ‘ava malosi i le taimi na tula’i mai ai le fa’alavelave.

 

O le vevesi na tula’i mai ina ua manava atu le ua molia i le fale i le afiafi o le aso Gafua na te’a nei, ma ia molimauina ai ni isi o tulaga e le o manuia i lana vaai i totonu o le aiga, ma amata ai loa ona ia fa’apisapisa i lona to’alua, sosoo ai lava ma le tula’i mai o se taugaupu i le va o ia ma lona to’alua, ma fa’ai’u ai loa i lona tu’i o foliga o lona to’alua, toe toso lona ulu ma una’i aga’i i lalo o le fola o le fale.

 

O le leotele o le ee a le fafine mo se fesoasoani na mafua ai ona vili e se tasi o aiga tuaoi le Ofisa o Leoleo mo se fesoasonai, ma aga’i mai ai loa Leoleo ma taofia le ua molia i le falepuipui, e fa’atali ai le aso Lua na te’a nei e tula’i ai i luma o le fa’amasinoga.

 

I le teena ai e le ua molia o tuuaiga fa’asaga ia te ia, na faia ai loa le fa’aiuga a le fa’amasinoga e tatala ai o ia i tua e aunoa ma se tupe e totogi, i lalo o tuutuuga e ao ona usit’ai i ai. O ni isi o ia tuutuuga e aofia ai le saili o se isi nofoaga e nofo ai, ua fa’asa fo’i ona ia toe taumafai e fa’afeso’ota’i lona to’alua ma lana fanau i soo se taimi, se’i vagana o se poloaiga a le fa’amasinoga.

 

Ua fa’asa fo’i ona ia toe tagofia le ‘ava malosi poo ni fualaau fa’asaina, a ia avea o ia o se tagatanu’u e tausi ma fa’amaoni i poloaiga ma tulafono a le malo.