Ads by Google Ads by Google

Tala otooto o Fa’amasinoga


[ata: foa'i]
ausage@samoanews.com

FILISOUAINA TA’AFUA

 

O le aso 6 Novema 2017 lea ua fa’atulaga e le Vaega Iloilo o le Fa’amasinoga Maualuga a Amerika Samoa, e amata aloaia ai le fa’amasinoga autu o le sa avea ma Pulesili o le Ofisa o le Litaea a le malo, i le mae’a ai lea ona fa’ailoa e loia a itu e lua i luma o le fa’amasinoga maualuga i le taeao nei, le sauni e itu e lua e finauina lenei mataupu i luma o tagatanu’u o Amerika Samoa.

 

O le iloiloga fa’aauau a Filisouaina sa valaauina i luma o le afioga i le ali’i Fa’amasino Sili le tumau ia Elvis P. Patea, fa’atasi ai ma ana Fa’amasino Lagolago ia Mamea Sala Jr ma Tunupopo Faleafaga, na fa’ailoa ai fo’i e le itu tete’e lo latou tauaaoina lea o le pepa o fa’amatalaga lea ua toe teuteu e le malo fa’asaga i lenei mataupu.

 

Na taua e le loia a le malo ia Robert Morris i le Samoa News e fa’apea, o suiga e pei ona faila e le malo fa’asaga ia Filisouaina, e le o fa’avae mai lea i ni isi fa’amatalaga fou ua maua e le malo, ae o suiga e fa’avae lava i luga o le ulua’i fa’amatalaga o le tagi sa latou fa’aulu fa’asaga i le ua molia i le tausaga na te’a nei.

 

Ina ua toe fesiligia e le Samoa News ia Morris poo aofia i suiga fou ua faila e le malo ni moliaga faaopoopo fa’asaga i le ua molia, ae na taumate mai e le ali’i loia lana tali ma fai mai, “pei uma lava o lea ua fa’aitiitia mai i le 9 moliaga i le taimi nei mai le lata i le 20 moliaga sa i ai muamua”

 

E le i toe fia tu’uina mai e le ali’i loia ia Morris se isi fa’amatalaga ina ua toe fesiligia o ia e le Samoa News e fa’atatau i lenei mataupu, ona sa ia taua le i ai o se aiaiga malosi mai le latou pule, le afioga i le Loia Sili, e fa’asa ai loia a le malo ona talanoa i le au fa’asalalau e uiga i soo se mataupu.

 

O le ali’i loia sili lagolago ia Morris lea ua tula’i nei mo le malo i le mataupu a Filisouaina, e sui tulaga i le tama’ita’i loia ia Mitzie Jessop-Ta’ase ua fa’amavae, ona o lea ua galue nei o ia i le Fono Faitulafono a Amerika Samoa.

 

O le finagalo ai o Filisouaina e tu’uina atu lana mataupu e fa’ataunu’u sona fa’amasinoga autu i luma o tagatanu’u o Amerika Samoa, ua atagia mai ai lona teena o tu’uaiga fa’asaga ia te ia, i lona fa’aaoga le tatau lea o se vaega tupe tele mai le Ofisa o le Litaea a le malo mai le taimi a o avea ai o ia ma Pulesili, i le aofaiga e silia i le $100,000.

 

O le amataga o le tausaga na te’a nei na amata su’esu’e ai e le Ofisa o Leoleo a le malo le mataupu e pei ona tu’uaia ai Filisouaina, i lona fa’aaoga le tatau lea ona tupe mai teugatupe a le Ofisa o le Litaea, i le mae’a ai lea ona alia’e i se vaega o le ripoti a se vaega Su’etusi mai Utah tu’uaiga o le fa’aaoga le tatau o le tusa ma le $112,000 mai teugatupe a le Litaea, ma mafua ai loa ona fa’amalolo le tumau le ua molia mai lona Ofisa a o fa’agasolo ai su’esu’ega a Leoleo e uiga i lenei mataupu, seia oo ina mae’a le su’esu’ega ma faila ai loa e le malo le latou tagi fa’asaga ia te ia.

 

O le tama’ita’i loia ia Gwen Tauiliili-Langkilde o lo o tula’i mo Filisouaina, lea o lo o tumau pea tuutuuga o lo o tatala ai o ia i tua e fa’atali ai le aso lea ua fa’atulaga e amata aloaia ai lana fa’amasinoga autu.

 

CAMERON IEREMIA

 

Ua toe taofia nei le ali’i o Cameron Ieremia i le toese i Tafuna mo le tuli fa’amae’aina o lana faasalaga fa’a falepuipui sa fa’amalumalu e le Fa’amasinoga Maualuga, ina ua fa’amaonia tu’uaiga o lona le usitaia lea o tuutuuga o lana nofovaavaaia.

 

E 28 masina le umi na manatu le fa’amasinoga e taofia ai Ieremia i le falepuipui i Tafuna, o se tasi lea o tuutuuga o lana nofovaavaaia e 7 tausaga, ina ua fa’amaonia e le fa’amasinoga le moliaga o le talepe fale i le tulaga lua na tu’uaia ai o ia e le malo.

 

Ae i le talia ai e le fa’amasinoga o le talosaga a Ieremia atoa ai ma fa’afinauga a loia, mo le tu’uina atu lea o se isi avanoa mo le ua molia e fa’amaonia ai le avea o ia ma tagatanu’u lelei e tausisi i tulafono uma a le malo, na manatu ai loa le fa’amasinoga ua lava masina e 12 na te tuliina i le falepuipui, ae fa’amalumalu le isi 16 masina o lo o totoe ai o lana fa’asalaga.

 

O ni isi o tuutuuga o lana nofovaavaaia sa tu’uina atu e le fa’amasinoga e aofia ai le fa’asa lea ona ia toe soli se tulafono, asiasi i le ofisa faanofovaavaaia i soo se taimi e fa’atonu o ia e le ofisa e oo atu ai.

 

O le masina o Iuni na te’a nei na faila ai e le malo sa latou talosaga i le fa’amasinoga, mo sna poloaiga e fa’aleaoga ai le nofovaavaaia a Ieremia, e mafua mai ina ua ia le usitaia tuutuuga o lana nofovaavaaia e aofia ai lona le alu e vaai le Ofisa Faanofovaavaaia i masina ta’itasi.

 

O le iloiloga a Ieremia sa faia i le masina o Iulai na te’a nei, na ia ioeina ai lona le usitaia o tuutuuga o lana nofovaavaaia, ma fa’atulaga ai loa e le fa’amasinoga le taeao nei e tu’u atu ai lana fa’aiuga fa’asaga ia Ieremia.

 

Saunoa le afioga i le ali’i fa’amasino ia Michael Kruse e fa’apea, talu ai ua le usitaia e Ieremia tuutuuga o lana nofovaavaaia, ua manatu ai le fa’amasinoga e fa’aleaoga loa poloaiga o lana nofovaavaaia, ae poloaina loa lona tuliina o masina e 16 o lo o totoe mai lana fa’asalaga fa’a falepuipui e 28 e lei tuliina.

 

Ua poloaina fo’i e le fa’amasinoga le Ofisa Faanofovaavaaia ina ia faia se suega i le tino o Ieremia ina ia iloa ai o lo o mama o ia mai le tagofia o fualaau fa’asaina