Ads by Google Ads by Google

Tala otooto o Fa’amasinoga

ausage@samoanews.com

SOLOMONA TEOFILO

 

Ua toe taofia nei i le toese i Tafuna le ali’i o Solomona Teofilo e fa’atali ai taualumaga o lana mataupu lea o lo o fa’agasolo i luma o le fa’amasinoga maualuga i le taimi nei, ina ua talia e le fa’amasinoga maualuga se talosaga na fa’aulu e le malo e avese ai le tupe sa totogi e tatala ai o ia i tua mai le toese.

 

E $5,000 le tinoitupe na totogi e tatala ai Teofilo i tua, e fa’atalitali ai taualumaga o lana mataupu, i le mae’a ai lea ona faila e le malo o le moliaga mamafa o le fa’ao’olima i le tulaga lua fa’asaga ia te ia i le tausaga na te’a nei, e mafua mai i le fa’alavelave lea na ia fa’ao’olima ai le to’alua o lona uso.

 

Ae i le iloiloga i le taeao ananafi, na taua ai e le niece a Teofilo i luga o le nofoa molimau lona mana’o e toe aveese mai lana tupe sa totogi e fesoasoani ai i le tatalaina i tua o lona uncle. Na taua atili e le tama’ita’i lea e fa’apea, o ia na totogia le isi $2,500, ae o le isi $2,500 na totogi e le uo teine a le ua molia, peita’i o lea ua ia mana’o e toe fa’afo’i atu lana tupe sa totogi e tatala ai lona uncle i tua.

 

Na fa’auilavea le afioga i le ali’i fa’amasino sili ia Michael Kruse ina ua fesili le loia a le malo ia Gerald Murphy i le molimau, pe aisea ua ia mana’o ai e toe ave i tua lana tupe sa totogi e tatala ai le ua molia i tua.

 

Saunoa Kruse e fa’apea, e le tatau ona fesiligia tulaga fa’apea e ono aumai ai isi fa’amatalaga fa’asaga i le mataupu o lo o tu’uaia ai le ua molia, ona e i ai ona aia tatau fa’aletulafono e agava’a ai o ia mo se fa’amasinoga amiotonu ma talafeagai, ma, e le tatau ona soona fa’ailoaina nei fa’amatalaga ma salalau atu i le atunu’u.

 

O tu’uaiga fa’asaga ia Teofilo na afua mai i le fa’alavelave lea o lo o tu’uaia ai o ia e le malo i lona tu’iina lea o foliga o lona sister-in-law, tu’u i ai le tama’i nifi i lona ua, toe fa’afefe o ia i le samala, e mafua mai ina ua alu atu le ua molia e fa’anoi mai le ta’avale a lona uso na te fa’aaogaina, ae fai i ai le to’alua o lona uso e vili lona uso o lo o malaga i fafo e fa’anoi ai le ta’avale.

 

JOHN LUAO IOSEFO

 

O le aso 18 Aokuso lea ua fa’atulaga e le fa’amasinoga maualuga e tu’uina atu ai lana fa’asalaga fa’asaga i le ali’i o John Luao Iosefo, i le mae’a ai lea ona talia e le fa’amasinoga o le tali ioe a lenei ali’i talavou i le moliaga mamafa o le tagofia o itutinosa o se teineititi, i lalo o se maliliega sa latou sainia ma le malo ma talia e le fa’amasinoga.

 

I le tali ioe ai o Iosefo, 23 tausaga le matua i le moliaga mamafa e pei ona ta’usala ai o ia e le fa’amasinoga maualuga, sa ia ta’utino ai e fa’apea, i se taimi o le aso 20 Tesema 2014 i Amerika Samoa, sa ia tagofia ai itutinosa o se teineititi e 14 tausaga le matua ma le fa’amoemoe e fa’amalie ai lagona tu’inanau sa ia te ia.

 

E 5 moliaga na ulua’i tu’uaia ai e le malo le ua molia. O ia moliaga e aofia ai moliaga mamafa e 2 o le faiaiga ma se teineititi e laititi i lalo o le tulafono (rape), atoa ai ma moliaga mamafa e 2 o lona tagofia lea o itutinosa o se teineititi e laititi i lalo o le tulafono i le tulaga muamua (sexual abuse 1st degree), atoa ai ma le moliaga mama e tasi o lona faia o ni gaioiga e ono lepeti ai le saogalemu o fanau laititi.

 

I lalo o le maliliega na sainia e Iosefo ma le malo ma ua talia fo’i e le fa’amasinoga, na ia tali ioe ai i le moliaga lona tolu o lona tagofia lea o itutinosa o se teineititi e 14 tausaga le matua. I le talia ai e le fa’amasinoga o le maliliega a itu e lua, na talosaga ai loa le malo ina ia solofua moliaga o lo o totoe ai i le tagi sa latou fa’aulu fa’asaga i lenei ali’i talavou, lea fo’i na talia e le fa’amasinoga.

 

O lo o tumau pea tuutuuga o lo o tatala ai Iosefo i tua e fa’atali ai le aso lea ua fa’atulaga e lau ai lana fa’asalaga.

 

O le moliaga o le tagofia o itutinosa o se teineititi e talavou i lalo o le tulafono, o le vaega D lea o solitulafono mamafa, lea e mafai ona fa’asala ai se tasi i le toese mo le umi e le silia i le 5 tausaga, pe fa’asala foi i le salatupe e le silia i le $5,000, po o le fa’asala fo’i i fa’asalaga uma ia e lua.

 

O le afioga i le ali’i fa’amasino sili ia Kruse o loo iloiloina lenei mataupu, ae lagolagosua i ai afioga i ali’i Fa’amasino Lagolago ia Mamea Sala Jr ma Tunupopo Faleafaga.

 

O le ali’i loia ia Gerald Murphy o lo o tula’i mo le malo, ae o le ali’i loia ia Douglas Fiaui o lo o tula’i mo Iosefo.