Ads by Google Ads by Google

Tala otooto o Fa’amasinoga

ausage@samoanews.com

TOE A’AFIA FO’I MALUA FINAUGA I LE TULAFONO

 

O le vaiaso na te’a nei na vaaia ai le toe a’afia o le ali’i o Malua Finauga i le tulafono, ina ua toe taofia o ia i le toese ma molia e le malo i moliaga mama o le fa’ao’olima i le tulaga tolu atoa ai ma le fa’atupu vevesi i nofoaga faitele.

 

O le fa’aiuga o le tausaga na te’a nei na fa’anofovaavaaia ai e le fa’amasinoga fa’aitumalo ia Finauga mo le 18 masina, ina ua fa’amaonia e le fa’amasinoga moliaga mama e lua o le fa’aoolima i le tulaga tolu atoa ai ma le fa’aleaga meatotino i le tulaga tolu na ta’usala ai o ia, e mafua mai i se vevesi na tula’i mai i le va o ia ma le aiga tuaoi, lea na ia sasa ai le papatua o le ali’i na a’afia i se laupapa toe fa’aleaga le fa’amalama o le latou fale.

 

O le moliaga fou e pei ona toe tu’uaia ai Finauga ae o lo o fa’anofovaavaaia pea o ia, na mafua mai ina ua ‘ona o ia ma ia fa’ao’olima ai i se ali’i o le latou nu’u i Petesa, e ala i lona tu’i o lea ali’i ma manu’a ai ona foliga, toe laulauvavale i luga o le alatele a o fegasoloa’i tagata.

 

O lo o i ai isi tuuaiga fa’apea na togi e le ua molia se ma’a ma faaleagaina ai le fale o le aiga sa tula’i mai ai le fa’alavelave, peita’i e le o mafai ona fa’amaonia mai e Leoleo lea tulaga i le taimi nei, ona o lo o fa’aauau pea a latou su’esu’ega.

 

O ni isi o tuutuuga o le nofovaavaaia a Finauga sa tu’uina atu i ai e le fa’amasinoga, o le fa’asa lea ona ia toe tagofia le ‘ava malosi, fa’asa fo’i ona ia toe solia se tulafono a le malo i totonu o le 18 masina o lana nofovaavaaia.

 

E $200 le vaega tupe lea ua fa’atulaga e le fa’amasinoga e totogi ona fa’atoa mafai lea ona tatala Finauga i tua mai le toese i Tafuna, e fa’atalitali ai taualumaga o lana mataupu lea ua fa’agasolo i le taimi nei.

 

Afai ae mafai ona tatala o ia i tua, ua poloaina malosi o ia e le fa’amaisnoga ina ia aua ne’i toe alu i le fale o le aiga na tula’i mai ai le fa’alavelave, pe toe taumafai fo’i e fa’afes’ota’i ni isi o le aiga e aofia ai ma le ali’i na a’afia i soo se auala.

 

FALEPUIPUI LE ALI’I NA FA’AO’OLIMA I LANA UO TEINE

 

O le ali’i lea na ta’usala i lona fa’ao’olima lea i lana uo tiene ao taumafai le Tina o le tama’ita’i e taofiofi lana gaioiga sa faia, ua poloaina e le fa’amasinoga e taofia o ia i le toese i Tafuna mo le umi e 4 masina, o se tasi lea o tuutuuga o lana nofovaavaaia e 12 masina i luma o le Fa’amasinoga Fa’aitumalo.

 

Na ulua’i molia lenei ali’i e le malo i moliaga mama e lua o le fa’atupu vevesi i nofoaga faitele atoa ai ma le fa’ao’olima i le tulaga tolu, ae i lalo o se maliliega sa latou sainia ma le malo, lea fo’i na talia e le fa’amasinoga, na tali ioe ai le ua molia i le moliaga o le fa’ao’olima i le tulaga tolu ae solofua e le fa’amasinoga le isi moliaga mama o le fa’atupu vevesi i nofoaga faitele.

 

Na fa’amanino i fa’amaumauga a le fa’amasinoga e pei ona taua i ripoti a Leoleo le matuia o le gaioiga sa faia e le ua molia, e ala i lona po o lona to’alua, tu’i ona foliga toe ato o ia i lalo. E ui e le mafai e le ua molia ona ia fa’amatala uma i luma o le fa’amasinoga mea uma sa tutupu i le aso na tula’i mai ai le fa’alavelave, peita’i sa mafai e mau fa’amaonia a le malo ona lagolagoina lana gaioiga sa faia.

 

Na finau le loia fautua sa tula’i mo lenei ali’i ina ia toe tu’u atu se isi avanoa mo ia, e toe a’oa’oina ai lona olaga ma fa’asa’o ai fa’aiuga sese ua ia faia, peita’i sa finau le itu a le malo ina ia tu’uina atu se fa’asalaga fa’a falepuipui, ina ia fai lea ma a’oa’oga mo lenei ali’i aemaise ai isi ali’i o lo o latou manatu e fa’atino le tulaga lea lava e tasi, e le manatu mama le fa’amasinoga i le tu’uina atu o fa’aiuga i soo se tasi e ta’usala i le faia o ituaiga solitulafono nei.

 

E ese mai i le tuliina o masina e 4 i le toese, o isi poloaiga mo le ali’i ua ta’usalaina nei e aofia ai le fa’asa lea ona ia toe soli se tulafono, fa’asa ona ia toe faia ni gaioiga tau fa’amata’u i lana uo tama’ita’i, a ia avea o ia ma tagatanu’ e tausisi i tulafono a le malo i soo se taimi.

 

Ua poloaina fo’i o ia na te totogiina le salatupe e $200 i le Fa’amasinoga, pe afai ae magalo mai i tua mai le toese i Tafuna.

 

MAUA LE ALI’I AMIO VALEA

 

O le ali’i lea sa ia masani ona ia telefoni i le tama’ita’i e aiga ma lona to’alua ma fai i ai tala mataga e fa’ailoa atu ai lagona tu’inanau o loo ia te ia, atoa ai ma lona fa’aaogaina fo’i o le telefoni e lafo i ai feau tusitusia, ua maua taitaia nei o ia i le tulimanu, ina ua molia o ia e le malo i le moliaga o lona taumafai lea e faia ni gaioiga e fa’ailoa atu ai uiga mataga i se tama’ita’i.

 

O le tama’ita’i o lo o a’afia i lenei mataupu, o le tei o le to’alua a le ali’i o lo o a’afia, le ali’i o Tavita Pulalalsi, lea na fa’ailoa e le tama’ita’i i Leoleo e fa’apea, e 4 masina o faia le amio a le ali’i lenei, e ala i lona fa’aaoga o le telefoni a lona to’alua e vili atu ai, ma lafo atu ai fo’i feau tusitusia o lo o fa’ailoa atu ai ona lagona tu’inanau.

 

E pei ona taua i fa’amaumauga a le fa’amasinoga, o le tama’ita’i na a’afia, na amata a’afia mai o ia i le taimi ao avea o ia ma tama’ita’i e talavou i lalo o le tulafono, peita’i o le taimi nei, ua avea o ia ma tama’ita’i matua.

 

O le masina fou lea ua toe tolopo i ai le mataupu a le ali’i o Pulalasi, ae ua poloaina o ia e le fa’amasinoga ina ia aua ne’i ona toe taumafai e fa’afeso’ota’i le tama’ita’i o lo o a’afia i soo se auala, aua fo’i ne’i ona toe solia se tulafono, a ia avea o ia ma tagatanu’u lelei e tausisi i tulafono a le malo.