AVEOLELA SALAUTA

O le ali’i lea na se’i e le fa’amasinoga fa’aitumalo lana laisene ave ta’avale mo le 2 tausaga talu mai le 2015, e mafua mai ina ua ta’usala o ia i le moliaga o le ave ta’avale ‘ona, ua molia nei o ia e le malo i le moliaga mamafa o lona fa’afoeina lea o se ta’avale ae o lo o se’i lona laisene.

Na fa’ateia le ali’i o Aveolela Salauta ina ua taofi e se ta’avale a Leoleo lana ta’avale i luga o le auala a le malo i Iliili, ina ua molimauina e Leoleo le ova o maila na alu ai le ta’avale sa fa’afoe e le ua molia.

E fa’alua ona valaau Leoleo i le sipika fa’aleotele leo ia Salauta e taofi lana ta’avale, ae sa atili ai ona saoasaoa, e le’i umi ae taofi loa e le ua molia lana ta’avale, ae ina ua fesiligia o ia e Leoleo i le mafua’aga o le fiu e taofi lana ta’avale, na tali le ua molia, “ua ou iloa lava lo’u iuga”.

Na fesili Leoleo ia Salauta poo le a le uiga o lana tala ua ia iloa lava lona iuga, ae na tali le ua molia, “ua ou iloa o le a loka a’u ona o lea e se’i lo’u laisene”. I le aso na lau ai le fa’asalaga a Salauta, na fautuaina ai o ia e le faamasinoga fa’aitumalo ina ia aua ne’i ona toe aveina se ta’avale a o se’i ai lona laisene, ma afai fo’i na te toe aveina se ta’avale ae maua o ia e Leoleo, e ono mafai e le malo ona molia o ia i se moliaga mamafa, ma afai ae fa’amaonia lea moliaga, e ono taofia o ia i le toese mo le umi e le silia i le 5 tausaga.

Ua tatala nei i tua Salauta e fa’atali ai le masina fou o Ianuari lea ua fa’atulaga e toe valaau ai lana mataupu, i lalo o tuutuuga e fa’asa ona ia toe aveina se ta’avale pe na te toe soliina fo’i se tulafono a le malo, a ia avea o ia ma tagatanu’u lelei  tausisi i tulafono a le malo.

O le moliaga o le ave ta’avale ao se’i laisene, e mafai ona fa’asala ai se tasi i le toese mo le umi e le silia i le 5 tausaga, pe fa’asala fo’i i le salatupe e le silia i le $5,000, ae fa’amalosia ai le tuli o aso e 90 i le totonu o le falepuipui.

E pei ona taua i fa’amaumauga a le fa’amasinoga, e fa’alua ona ta’usala e le fa’amasinoga ia Salauta i le moliaga mama o le ave ta’avale ‘ona, ma ua atagia mai ai i le silasila a le fa’amasinoga, e i ai le a’afiaga o le ua molia i le tulaga o le tagofia lea o le ‘ava malosi.

RAY VILIAMU

E 12 masina lea ua nofovaavaaia ai le ali’i o Ray Viliamu i luma o le fa’amasinoga fa’aitumalo, ina ua ta’usala e le fa’amasinoga o ia i le moliaga mama o le gaoi, i le mae’a ai lea ona talia e le fa’amasinoga o se maliliega na latou sainia ma le malo.

I le talia ai e le fa’amasinoga o le tali ioe a Viliamu, na talosaga ai loa le malo ina ia solofua moliaga o lo o totoe ai i le pepa o tagi sa latou fa’aulu, lea fo’i na talia e le fa’amasinoga.

O le mataupu e pei ona ta’usala ai Viliamu na alia’e mai i le masina o Oketopa na te’a nei, ina ua gaoi e le ua molia ni mea faigaluega ma totonu o se fale a se aiga, lea na mulimuli ane toe fa’afo’i ina ua iloa e le ua molia ua faila e le aiga le latou tagi i le malo. Sa tu’uaia fo’i o ia i le moliaga o le soli fua o le fanua o le isi aiga atoa ai ma le fa’atupu vevesi i nofoaga faitele.

Na taua e le malo i le fa’amasinoga e fa’apea, e ui na toe fa’afo’i e le ua molia mea faigaluega sa ia gaoia, peita’i sa manatu pea le aiga na a’afia e fa’aauau le failaina o le latou tagi i le malo, ina ia taofia ai le toe tula’i mai o se isi fa’alavelave fa’apea i le lumana’i.

Na fa’atoese le ua molia i le fa’amasinoga e tusa ai o lana solitulafno sa faia, ma ia talosagaina ai se isi avanoa mo ia e fa’aauau ai pea lona mafuta atu i lona aiga aemaise ai o lea faatoa maua lana galuega e galue tumau ai

Na talia e le fa’amasinoga fa’afinauga a itu e lua mo se fa’asalaga faanofovaavaaia, peita’i na fa’ailoa e le afioga i le ali’i fa’amasino ia Elvis P. Patea ia Viliamu e fa’apea, afai e toe a’afia o ia i se isi solitulafono i le lumana’i, o le a le toe taliaina loa e le fa’amasinoga se isi ana fa’atoesega, ae o le a tu’u sa’o loa o ia i le toese i Tafuna.

O isi tuutuuga o le nofovaavaaia a le ua molia e aofia ai le fa’asa lea ona ia toe soli se tulafono, faasa nei ona toe tagofia se ava malosi, fa’asa fo’i ona toe alu i le fale o le aiga na a’afia, a ia avea o ia ma tagatanu’u lelei e tausisi i tulafono a le malo i taimi uma.