Ads by Google Ads by Google

Tala otooto mai le Fa’amasinoga

ausage@samoanews.com

TU’UAIA SE ALI’I FAIAOGA FA’AO’OLIMA TAMAITITI AOGA

 

Ua tu’uaia nei e le malo se ali’i faiaoga mai le Peter Coleman Elementary School i moliaga o le fa’aoolima i le tulaga tolu fa’apea ai ma lona faia o ni gaioiga e ono lamatia ai le saogalemu o fanau laiti, e mafua mai i le fa’alavelave lea na ia sasaina ai se tamaititi aoga o lana vasega i le amataga o le masina nei.

 

O moliaga ua faia fa’asaga i le susuga a Tony Leatualevao, na alia’e mai ina ua faila e le Tina o le tamaititi aoga na a’afia sana tagi i le Ofisa o Leoleo i Fagatogo i le aso 3 Novema 2016, i le mae’a ai lea ona molimauina e le Tina o unaoa i le tino o lana tama e 11 tausaga le matua.

 

I fa’amaumauga a le fa’amasinoga o lo o taua ai e fa’apea, o le fa’alavelave na tula’i mai ina ua le usita’i le tamaititi na a’afia i le fa’atonuga a le ali’i faiaoga ua molia, ma ia sasaina ai loa le tamaititi i se laupapa i luma o le vaega. Na taua e le ua molia i Leoleo, e tusa ma le fa’alua i le fa’atolu ona ia sasaina le ali’i aoga na a’afia i le laupapa.

 

O lo o taua i fa’amaumauga a le fa’amasinoga le fa’atonu e le ali’i faiaoga o le tamaititi aoga na ‘aafia e tu i luma o le vaega, ma tu’u ona lima i luga o le kesi, ona ia sasa lea o ia ao matamata le vasega.

 

Ina ua fesiligia e Leoleo le ua molia e uiga i lenei mataupu, sa ia taua ai lona taumafai e a’oa’i le tamaititi na a’afia, ina ua ia le usita’i i le fa’atonuga sa ia tu’uina atu i ai, ina ia aua ne’i toe taua’imisa ma tamaiti o le Vasega 7, peita’i o le aso na sosoo ai na ia maua ai le tala sa fufusu le ali’i na a’afia ma tamaiti aoga matutua i luga atu o ia.

 

Sa ia taua fo’i i Leoleo le mae’a lea ona la talanoa ma le Tina o le tamaititi na a’afia e uiga i lenei mataupu, ma atagia mai ai fo’i le malie o le Tina e tusa ai o lona fa’amaninoina o le mataupu.

 

E ui na taua e le ali’i ua molia i Leoleo le mae’a lea ona la talanoa ma le Tina o le tamaititi na a’afia e uiga i le mataupu sa tula’i mai, e foliga mai e lei manino lelei le Tina i manu’a sa a’afia ai le tino o lana tama, ae na fa’atoa ia iloaina le ogaoga o unaoa i le tino o lana tama ina ua oo atu i le latou fale, ma ia vaaia ai tulaga le manuia i lona tino, ma ia manatu ai loa e faila lana tagi i le Ofisa o Leoleo, aemaise ai o lona popole ina ua fa’ailoa e lona to’alua lona sauni e alu e fa’afetaui le faiaoga e uiga i le mataupu na ia sasaina ai lona atali’i.

 

O le aso Gafua na te’a nei na tula’i ai le ali’i faiaoga i luma o le fa’amasinoga fa’aitumalo, ma ia teena ai moliaga mama ua faia fa’asaga ia te ia. I lona teena ai o ia moliaga, ua fa’atulaga ai loa e le fa’amasinoga le aso 7 Tesema e toe valaau ai lana mataupu, ae ua tatalaina o ia i tua i lalo o tuutuuga e ao ona ia usita’i i ai.

 

O ni isi o tuutuuga a le fa’amasinoga ua tatala ai o ia i tua e aofia ai le fa’asa lea ona ia toe faia ni gaioiga e atagia mai ai lona sauaina o fanau aoga, fa’asa ona ia toe soli se tulafono, a ia avea o ia ma tagatanu’u e tausisi i tulafono a le malo, ma ia usita’i i poloaiga a le fa’amasinoga.

 

VESI ILALIO

 

O le vaiaso na te’a nei na faila ai e le malo le moliaga mamafa o le ave ta’avale a o se’i le laisene fa’asaga ia Vesi Ilalio, e mafua mai i le fa’alavelave lea na maua ai o ia e Leoleo i luga o le auala a le malo i Faga’alu, o lo o ia fa’afoeina se ta’avale ae o lo o se’i lona laisene.

 

O le alu saoasaoa o le ta’avale sa fa’afoeina e Ilalio i luga o le alatele, ma ova atu ai maila fa’atulaga mo ta’avale mai maila sa ia fa’aaogaina i le po na tula’i mai ai le fa’alavelave, na mafua ai loa ona tuliloa e Leoleo lana ta’avale ma taofia mai ai o ia i luma tonu o le paka a le malo i Faga’alu lava.

 

Ina ua fesiligia e Leoleo ia Ilalio i le mafua’aga o le alu saoasaoa o lana ta’avale, sa tali le ua molia sa fa’afuase’i ona tautulimoe, ma fa’afuase’i ai ona mamafa lona vae i le vae penisini o le ta’avale ma alu saoasaoa ai loa.

 

I su’esu’ega auiliili a Leoleo na fa’amaonia ai, e 2 tausaga o lo o se’i ai e le fa’amasinoga fa’aitumalo le laisene ave ta’avale a Ilalio, ina ua ta’usala o ia e le fa’amasinoga fa’aitumalo i le masina o Mati 2015 i le moliaga mama o le ave ta’avale ‘ona.

 

Na taua atili i fa’amaumauga a le fa’amasinoga le fa’atoese o Ilalio i Leoleo i le taimi lava lea na fesiligia ai o ia, ina ua ia iloa ua ia le usita’i i le fa’atonuga a le fa’amasinoga sa tu’uina atu ia te ia, e fa’asa ai ona ia toe fa’afoeina se ta’avale mo le umi e 2 tausaga.

 

O le moliaga o le ave ta’avale a o se’i le laisene, o se solitulafono D lea i le fa’atulagaina o solitulafono mamafa, lea e mafai ona fa’asala ai se tasi i le toese mo le umi e le sili atui le 5 tausaga, pe fa’asala i le salatupe e le silia i le $5,000, ae fa’amalosia ai le tuli o aso e 90 i le toese i Tafuna.

 

O le masina fou o Tesema lea ua fa’atulaga e toe valaau ai le mataupu a Ilalio i luma o le fa’amasinoga fa’aitumalo.

 

TOE A’AFIA FO’I TOETU VILIAMU I LE TULAFONO

 

E na o le 2 masina talu ona amata le nofovaavaaia a Toetu Viliamu i luma o le fa’amasinoga fa’aitumalo mo le umi e 12 masina, a e toe taofia mai fo’i o ia e Leoleo i le amataga o le vaiaso nei ma tu’uaia e le malo i le moliaga o le fa’atupu vevesi i nofoaga faitele.

 

O le ita o Viliamu i le ali’i sa ia lafo upu malolosi i le fanau a lona tuafafine, na mafua ai ona ia alu i ai ma lafo i ai upu malolosi ina ua ova lona ‘ona, ma vili ai loa e le ali’i na ‘aafia Leoleo ma taofia fa’apagota ai le ua molia.

 

O le masina o Aokuso na te’a nei na ta’usala ai e le fa’amasinoga fa’aitumalo ia Viliamu i le moliaga mama o le fa’ao’olima i le tulaga tolu, ma faanofovaavaaia ai o ia e le fa’amasinoga o le 12 masina i lalo o tuutuuga e ao ona ia usita’i i ai.

 

O ni isi o ia tuutuuga e aofia ai le aua ne’i ona toe tagofia le ‘ava malosi, aua ne’i ona toe solia se tulafono, a ia avea o ia ma tagatanu’u lelei e tausisi i tulafono a le malo.

 

O le masina foi o Tesema lea ua tolopo i ai le ulua’i iloiloga o le mataupu a Viliamu, ae ua poloaina lona totogiina le tinoitupe e $200 ona fa’atoa mafai lea ona tatala o ia i tua mai le toese i Tafuna.