Ads by Google Ads by Google

Rev. Tofaeono: "leai o ni mau e lagolago ai le fa’aiuga a le EFKAS"

ausage@samoanews.com

E ui i le fa’aiuga a le Komiti a le Au Toeaiina a le Ekalesia Faapotopotoga Kerisiano i Amerika Samoa (EFKAS) e fa’amalolo ai le tofi Faifeau o le susuga Rev. Amaama Tofaeono, atoa ai ma lona tofi o le Failautusi Aoao o le Ekalesia, ona o tu’uaiga i lona le ausia lea o tapula’a maualuga e tatau ona soifua ai Faifeau fa’au’uina a le Ekalesia, peita’i na molimau le ali’i fa’ifeau i le leai o ni mau e lagolago ai le fa’aiuga a le Ekalesia.

 

“Ou te le i mulilua, ou te le i sauaina lo’u to’alua, ou te le i sauaina lo’u afafine, ou te le i faia lava se fa’amatalaga i se tasi o le Komiti a le Au Toeaiina e ioeina ai ni tu’uaiga fa’asaga ia te a’u”, o se vaega lea o le molimau a Rev. Tofaeono i luga o le nofoa molimau.

 

Na taua atili e Rev. Tofaeono i lana molimau, ua avea lona taumafai e fa’asa’o ni isi o tulaga e le o sa’o i le fa’agasoloina o tiute ma galuega fa’atino a le Ekalesia ma auala ua faia ai le fa’aiuga ina ia fa’amalolo o ia mai ona tofiga.

 

E tusa ai ma fa’amaumauga a le Ekalesia ua i luma o le fa’amasinoga, o Rev. Tofaeono ma lona faletua ia Joan Aleluia Tofaeono, e 3 tausaga lea ua fa’amalolo ai le tofi faifeau o Rev. Tofaeono ae 1 le tausaga lea ua fa’amalolo ai le tofi faifeau a lona faletua e tusa ai ma le fa’aiuga a le Komiti a le Au Toeaiina.

 

Ae talu ai ua fa’amalolo le tofi faifeau fa’au’u o Rev. Tofaeono, ua le toe aloaia ai loa le avea o ia ma Failautusi Aoao a le Ekalesia, ma poloaina ai loa i laua ina ia tuua le maota o le Ekalesia o lo o la nonofo ai.

 

O ananafi le aso lona lua o le fa’amasinoga iloilo o lo o fa’agasolo i luma o le Fa’amasinoga Maualuga, fa’asaga lea i le tagi na fa’aulu e le Laulauafono a le Fonotele a le Ekalesia fa’apea ai ma le Komiti a le Au Toeaiina fa’asaga ia Rev. Tofaeono ma lona faletua, i lo la le usitaia lea o le fa’aiuga e tula’i ese ai ma le maota o le Ekalesia i lona laumua i Kanana Fou.

 

O molimau a le itu tete’e na valaauina ai Rev. Tofaeono ma lona faletua mo le fa’amaninoina o le la itu e tusa ai o le tagi a le Ekalesia fa’asaga ia te i laua, lea na taua ai e Rev. Tofaeono lona teena o le fa’aiuga a le Komiti a le Au Toeaiina sa tu’uina atu e fa’amalolo ai lona tofi faifeau, ona e le o fa’amatalaina i totonu o le fa’aiuga sa tu’uina atu mafua’aga na fa’avae ai le fa’aiuga ua faia, e le gata i lea, e lei sainia le fa’aiuga sa tu’uina atu.

 

Sa ia taua atili i lana molimau e fa’apea, e leai ma se taimi na fesiligia ai o ia ma lona to’alua e le Komiti a le Au Toeaiina e tusa ai o tu’uaiga uma fa’asaga i lo la aiga, e lei maua fo’i se avanoa e fa’aleo ai so la lagona i luma o le fonotaga mo le fa’amalamalamaina o le la itu.

 

E tele fetusiaiga sa faia i le va o Rev. Tofaeono ma le Komiti a le Au Toeaiina fa’apea ai ma le Laulauafono a le Fonotele a le Ekalesia, ona o le taumafai lava e fa’amanino lenei mataupu, peita’i na manino i le molimau a Rev. Tofaeono, soo se taimi lava e kiliva atu ai kopi o ana tusi, e toe fa’afoi atu ai e le Laulauafono a le Fonotele ana tusi, se’i vagana ai kopi sa tu’uina atu i le Au Toeaiina e lei toe fa’afo’iina atu.

 

Na fesili le loia a le Ekalesia ia Gwen Tauiliili-Langkilde i le molimau poo ai sa toe fa’afoiina atu ana tusi, ae na tali le molimau, o Rev. Elder Eveni Mamoe o le Taitaifono a le Fonotele, o Rev. Elder Faaeteete Saifoloi o le sui ta’itaifono, ma le Teutupe ia Fiasili Haleck.

 

Na fesili le loia a Rev. Tofaeono ia Tasi Tuiteleleapaga i le molimau pe aisea e toe fa’afo’i atu ai e sui o le Laulauafono ana tusi, ae na tali le molimau, e le manana’o i latou la te toe tali atu ma lona to’alua i le fa’aiuga ua faia.

 

Talu ai o fete’enaiga sa maitauina i le fa’atinoina o le fa’aiuga e pei ona faia fa’asaga ia te ia, e pei o le leai o ni mau fa’amaonia e lagolagoina ai tu’uaiga fa’asaga ia te ia, atoa ai ma le auai o sui o le Laulauafono a le Fonotele i le fono a le Au Toeaiina na afua mai ai le fa’aiuga, ma ua atagia mai ai le le mulimulita’i o nei fa’aiuga i le Fa’avae o le Ekalesia, e manatu ai Rev. Tofaeono, e le o aloaia le fa’aiuga e pei ona fa’amalolo ai o ia mai le tofi Failautusi Aoao atoa ai ma le tofi Faifeau.

 

E tusa ai o lana molimau i le itagia o ia ao taumafai e fa’asa’o ni isi o tulaga o lo o faaletonu i le Ekalesia, na taua ai e Rev. Tofaeono se tasi o fa’ata’ita’iga e fa’avae ai lana molimau, e pei o le soona fa’aaoga le tatau o tupe a le Ekalesia i le malaga a Rev. Elder Mamoe Jr ma lona faletua i atunu’u i fafo, lea na la malaga ai i le pasese mo tagata fa’apitoa (first class), ma fa’aaluina ai le tusa ma le $11,000 o tupe a le Ekalesia, ae o lo o manino le fautauga a le Ekalesia i tulaga o malaga faapenei, e tatau ona saili le pasese taugofie.

 

Sa ia taua fo’i lona taumafai e fa’asa’o ni isi o tulaga fa’aletonu ua maitauina i le ta’ita’iina o le Ekalesia, ina ua foliga mai ua pulea e le Taitaifono a le Fonotele ia Rev. Mamoe Jr ma le sui taitaifono ia Rev. Elder Saifoloi le Ekalesia, ae le o i laua o ni tagata faigaluega totogi o le Ekalesia.

 

“O lo o manino i tusitusiga ma fa’amaumauga a le Ekalesia i lana Fa’avae, o le Failautusi Aoao, o le Teutupe atoa ai ma Faatonu o Matagaluega taitasi a le Ekalesia, o i latou ia e taitaia galuega ma atina’e a le Ekalesia, aemaise lava i le Failautusi Aoao, o ia lea e vaavaaia tagata faigaluega totogi a le Ekalesia”, o le saunoaga lea a Rev. Tofaeono

 

Ae ui i nei fete’enaiga e pei ona tula’i mai i le va o ia ma lona aiga ma le Ekalesia, na taua e Rev. Tofaeono lona taumafai malosi e saili se auala e mafai ai ona faia se fa’aleleiga i le va o ia ma le Au Toeaiina, aua o ala ia e fa’avae ai le galuega fa’a kerisiano a i latou o Faifeau a le Ekalesia.

 

“E fa’a 4 ona ou taumafai e saili se avanoa mo se leleiga atoa ai ma le fefa’amagaloa’i i le va o i matou o le aufaigaluega, peita’i e le i taliaina”, o le saunoaga lea a Rev. Tofaeono, “Ou te le i faia lea tulaga ona sa ou manatu ou te fa’atoese i se mea sese ua ou faia, ae sa ou manatu e tatau ona fefa’amagaloa’i i matou o le aufaigaluega, ae sa teena lava”.

 

Na fesiligia e le loia a le itu tete’e le molimau lona lua a le Ekalesia, susuga Rev. Elder Leatulagi Fa’alevao, o ia fo’i lea o le Failautusi o le Komiti a le Au Toeaiina, pe sa i ai ni mau fa’amaonia na mafai ona fa’aaoga e fa’avae ai le fa’aiuga a le Au Toeaiina e fa’amalolo Rev. Tofaeono, ae na tali le molimau, e leai ni mau faamaonia sa latou mauaina, sei vagana ai le fa’amatalaga a Rev. Saifoloi na maua mai ina ua latou talanoa ma le ali’i faifeau ma lona faletua ua fa’amalolo, fa’apea ai ma le ripoti a le Ofisa o Leoleo e uiga i le fa’alavelave na tula’i mai i le va o le faletua o le faifeau ma le fafine o lo o masalomia.

 

Na taua e le loia a le itu tete’e ia Tuiteleleapaga e fa’apea, o loo manino le ripoti a Leoleo, o le to’alua o Rev. Tofaeono, o ia lea o lo o taua i le ripoti o le sa a’afia (victim) i le mataupu, ona o manu’a sa a’afia ai lona tino mai le fa’alavelave na tula’i mai i le va o ia ma le fafine o loo taua, ae o le talanoaga fo’i i le va o Rev. Saifoloi ma le ali’i faifeau ua fa’amalolo ma lona faletua e pei ona taua, e le i taua fa’atasi ai lava se tulaga e fa’atatau i se mafutaga fa’alilolilo a Rev. Tofaeono ma le fafine.