Vaega: 91

Alo maia, o le a toe fa’aauau atu la tatou tala mo lenei aso. Na muta mai la tatou tala ina ua toe ala mai Filipina, o lea fo’i na logo e le tuagane o Loleta i a Lilo, ae o le taimi lea, ua amata le talatalanoaga a Lilo ma lona tina o Malia fa’apea ma le uso o lona tina, lea na fa’amuli mai i le fale, ae o Luisa ma Mareta e ave Filipina i le falema’i.

Fai mai, ina ua uma le talanoaga a Lilo ma Lolesio, ua pei o se avega mamafa ua ave’ese atu, ua lagona e le tama le fiafia, aua i lona lava manatu, ua na le iloa po’o le a le tala o le a fai atu i si ona tina. Ua lagona le lo’o fa’afetai i le Ali’i, aua ua ia faia pea silisili mo i tatou uma.

Na saofa’i ifo nei Loleta i talane o le lo’omatua o Malia ma a’apa atu ua u’u mai le lima o le lo’omatua. “Mama, o a mai oe, o e loto tele.” Ua ‘ata le lo’omatua ma tilotilo ane i a Loleta. “O lo’o manuia lava a’u, sa ou fa’atali atu lava mo se tali mai i le ma’i o Filipina, o lona uiga na lua i ai i le falema’i.?”

Na toe tali ane i ai Loleta ioe, e taunu’u atu le ta’avale a le falema’i, ua fa’atali mai la’ua ma Lilo i le falema’i. Na tilotilo ane nei Loleta ia Lilo, e fa’ailoa ane i ai, ia fai loa sana tala e uiga i le ma’i o Filipina. “Malia, ‘aua e te popole ua ola Filipina, o lea na ta’u mai nei e Lolesio ia te a’u, o le tama le tama a Filipina.”

“Oi ta’i fa’afetai, fa’afetai i le Atua, ua maua se tama i si o tatou aiga, agusa, ua na o le teine ma teine, ia a’o lea ua maua se aloali’i o le tatou aiga, fa’afetai i le Atua i mea uma lava. Fai mai, na fa’atei’a Lilo, Loleta ma le uso o le lo’omatua, ina ua fa’alogo mai, ua amata ona toe lau le Losalio a le lo’omatua o Malia, “Si o’u alofa Maria, ua tupu Oe i Kalasia...Fai mai, e lau lava le Losalio a le lo’omatua ma tagi. Ua lagona le loto fiafia ma le loto fa’afetai i le Atua i mea uma lava, ua le toe i ai se popole o le loto o le lo’omatua, aua o lea ua mautinoa ua ola si ana tama teine o Filipina.

O le taimi lea, ua fo’i ane Luisa mai totonu o le potu failele, ma ua talatalanoa nei ma Lolesio le tuagane o Loleta, ma lona tausoga o Mareta. Ua fa’amatalatala nei e Lusia le ‘aulelei o le tamaititi, le tama a si ona uso o Filipina. Fai mai e fai fai a latou tala, ua fetagisi, ua toe mafaufau i le tulaga se manu e o’o i ai Filipina,  ua toe mafaufau i le si o latou tina, pe ana tupu nei se fa’alavelave ia Filipina, o lona uiga, o i’ina lava e tupu ai ma le fa’alavelave i si o latou tina.

O le isi itu na manatu i ai ma talatalanoa i ai Lolesio, Luisa ma Mareta, o le popole o o latou loto, pe o le a fa’afefea ona logo le to’alua o Filipina, le tamaloa Palagi o Roger pe ana fa’apea o le tulaga lea e o’o i ai Filipina. A’o fai pea le talatalanoaga a Lolesio, Luisa ma Mareta, ua amata ona pogisa.

Na tau mafaufau nei, pe o le a le mea o le a fai, ae sa o latou fa’atalitali, se i toe logo ane latou e le foma’i, ona fai loa le o le fa’aiuga mo i latou, pe o i le fale, pe leai. O le taimi lea ua manava ane le galuega a Mataniu, ma ua alu sa’o i le fale, e le o iloa e le teine ua ave Filipina i le fale ma’i.

E manava ane Mataniu, ua na o Vesi ma Lefefe lea o lo’o nofonofo atu i lo latou fale, na fesili loa le teine, po’o fea o i ai Malia, o ona matua ma tagata o lona aiga, ae na alu atu le tali a Vesi, “Mataniu, ua ave Filipina i le falema’i, o lo’o i ai ma ou matua, ma Luisa, ae o le lo’omatua o lo’o i le fale o lona uso e fa’atalitali ai.”

E faia pea...